އއ. ހިމަންދޫގައި ބަލިމީހުން އުފުލަން ބޭނުން ކުރާ އެމްބިއުލަންސް ހަލާކުވެފައި އޮންނަތާ ދެ އަހަރުވެފައިވާ ކަމަށާއި ބަލި މީހުން އުފުލަން ބޭނުން ކުރަނީ ރައްޔިތުންގެ ރަށު ޕިކަޕުތައް ކަމަށް އެ ރަށު ހެލްތު ސެންޓަރުން މިއަދު ބުނެފި އެވެ.
ގާތްގަނޑަކަށް 700 މީހުން ދިރިއުޅޭ އެ ރަށުގައި ކޮވިޑް ހާލަތު ގޯސްވެ 270 މީހުން ވަނީ ކޮވިޑަށް ޕޮޒިޓިވްވެފަ އެވެ. އޭގެތެރެއިން ދެ މީހަކު ވަނީ ހުޅުމާލެ މެޑިކަލް ފެސިލިޓީއަށް ބަދަލުކޮށްފަ އެވެ. އެ ރަށުގެ ޖުމްލަ 54ގެ ވަނީ ކަރަންޓީންގަ އެވެ.
މި ހާލަތުގައި ހިމަންދޫ އޮތް އިރު، އެ ރަށުގައި ބަލި މީހުން އުފުލަން ރަށު ޕިކަޕު ބޭނުން ކުރާ ފޮޓޯތައް ސޯޝަލް މީޑިއާގައި ވަނީ އާއްމުވެފަ އެވެ.
ހިމަންދޫ ހެލްތު ސެންޓަރުގެ މެނޭޖަރު އަބްދުﷲ ޝަރީފް "އަދަދު" އަށް ވިދާޅުވީ އެމްބިއުލަންސް މައްސަލަޖެހި ބޭނުން ނުކުރެވޭތާ ދެ އަހަރަ ށްވުރެ ގިނަ ދުވަސް ވެފައިވާ ކަމަށެވެ. އަދި އެކަން ސަރުކާރުގެ ސަމާލުކަމަށް ގެނެސްފައިވާނެ ކަމަށް އޭނާ ވިދާޅުވި އެވެ.
"ލިޔެކިޔުންތައް ފޮނުވާ، ބައްދަލުވުންތައް ވެސް ބޭއްވިފަ ވަނީ. މިނިސްޓަރާ ވެސް ހިއްސާ ކޮށްފަ ވަނީ. މި ހުކުރު ނޫނީ ހޮނިހިރުގަ ލިބޭނެ ކަމަށް ބުނީ. އެކަމަކު އަދި ހަބަރެއް ނުވޭ، " ޝަރީފް ވިދާޅުވި އެވެ.
"މިދިޔަ ދެ އަހަރު އެމްބިއުލަންސްގެ ބަދަލުގައި ބޭނުންކުރީ އަމިއްލަ މީހުންގެ ބަގީ. އެކި ފަހަރު އެކި މީހުންގެ ބަގީ ބޭނުން ކުރަނީ. އެއީ ހިލޭ ސާބަހަށް."
އެމްބިއުލަންސްގެ ދަތިކަން ހިމަންދުއަށް ކުރިމަތި ވެފައި ވާއިރު، މިއީ މުޅި ރާއްޖެއަށް ވެސް ކުރިމަތިވެފައިވާ މައްސަލައެކެވެ. ބައެއް ރަށްރަށުގައި އެމްބިއުލާންސް ނެތިގެން ގާޑިޔަލުގައި ވެސް ބަލި މީހުން އުފުލާފައިވެ އެވެ.
އޭގެތެރޭގައި ގދ. ނަޑެއްލާ ހިމެނެ އެވެ. އެ ރަށުގެ އެމްބިއުލަންސް ނެތިގެން ފޮނުވި އެމްބިއުލަންސް ވެސް ހަލާކުވެ ބޭނުމެއް ނުކުރެވެ އެވެ.
