ތ. ވިލުފުށީގައި ނޫމަޑިން އިމާރާތް ކުރަން ފެށި 100 ހައުސިން ޔުނިޓްގެ ތެރެއިން މަސައްކަތް ނުނިމި ހުރި 64 ހައުސިން ޔުނިޓާއި އަލަށް އަޅަން ޖެހޭ 36 ހައުސިން ޔުނިޓްގެ މަސައްކަތް އަމީން ކޮންސްޓްރަކްޝަންއާ މިއަދު ހަވާލުކޮށްފި އެވެ.
އަމީން ކޮންސްޓްރަކްޝަންއާ އެ މަސައްކަތް ހަވާލު ކުރީ އަށް މަސް ދުވަހުގެ ތެރޭގައި ނިންމާގޮތަށް 82.1 މިލިއަން ރުފިޔާއަށެވެ.
އެ އެއްބަސްވުމުގައި މިއަދު ސޮއިކުރިއިރު ޕްލޭނިން މިނިސްޓްރީގެ ފަރާތުން ސޮއި ކުރެއްވީ ހައުސިން ޑިޕާޓްމަންޓްގެ ޑިރެކްޓާ ޖެނެރަލް އަހުމަދު ވިޝާން ނަސީމެވެ. އަމީންގެ ފަރާތުން ސޮއި ކުރެއްވީ މެނޭޖިން ޑިރެކްޓާ އަބްދުﷲ މުހައްމަދެވެ.
މިއީ މިއަހަރުގެ ޕަބްލިކް ސެކްޓާ އިންވެންޓްމަންޓް ޕްރޮޖެކްޓް (ޕީއެސްއައިޕީ)ގެ ދަށުން ހިންގާ މަޝްރޫއެކެވެ.
މިމަޝްރޫއު ނޫމަޑިން ފަށާފައިވަނީ 2011 ވަނަ އަހަރުގަ އެވެ. ނަމަވެސް 2014 ވަނަ އަހަރު މަޝްރޫއު ވަނީ ހުއްޓިފަ އެވެ.
