ވަގު ބުކިން ހައްދައިގެން ޓޫރިސްޓުން ގެނެސް މަގުމަތިކުރާ މައްސަލަ ހުއްޓުވައިދޭން އިންޑިއާ ސަރުކާރުން ރާއްޖޭގެ ކަމާބެހޭ ފަރާތްތަކުގައި އެދިއްޖެ އެވެ.
ފަހަކަށް އައިސް އޮޅުވާލައިގެން ރާއްޖެއަށް ފަތުރުވެރިން އެތެރެކުރަމުންދާ މައްސަލަ ބޮޑުވެފައިވާއިރު، އެކަމުގެ އެންމެ ބޮޑު ޝިކާރައަކަށްވެފައިވަނީ އިންޑިއާގެ ޓޫރިސްޓުންނެވެ.
ރާއްޖެއަކީ މިހާރު މެދުއިރުމައްޗާއި ޔޫރަޕަށް ދަތުރު ކުރާ އިންޑިއާ މީހުން ޓްރާންސިޓްވުމާއި ކަރަންޓީން ވުމަށް މަގުބޫލު މަންޒިލެކެވެ. ހުޅުމާލޭ ގޮނޑުދޮށް ވެސް ފުރިފައި އެވަނީ އިންޑިއާގެ ޓޫރިސްޓުންނާ އެކު އެވެ.
ރާއްޖެ އެތެރެވުމުގެ ކުރިން ޓޫރިސްޓުން ތިބޭނެ ތަނެއް އިމިގްރޭޝަން ޕޯޓަލް މެދުވެރިކޮށް ހުށަހަޅަން ޖެހެ އެވެ. އެހެން ހުށަހަޅާއިރު މަދު ރޫމް ހުންނަ ގެސްޓް ހައުސްތަކުގެ ނަމުގައި ދުވާލެއްގެ މައްޗަށް އެތައް ބައިވަރު މީހުން ރާއްޖެ އެތެރެވާތީ އެފަދަ ތަންތަނަށް ގުޅައި ޗެކް ކުރަން އިމިގްރޭޝަނުން މިވަނީ ފަށައިފަ އެވެ.
އެގޮތަށް ޗެކް ކުރާއިރު އެނގެނީ ހޮޓާތަކާއި ގެސްޓް ހައުސްތަކުގެ ނަމުގައި ފޭކް ބުކިން ހަދައިގެން އެތައް ބަޔަކު އެތެރެވާ ކަމެވެ.
އޭގެ އިތުރުން ވަގު ބުކިން ހައްދައިގެން ޓޫރިސްޓުން ގެނެސް މަގުމަތި ކުރާ މައްސަލަ ވެސް ބޮޑެވެ. އެކަމުގައި އިސްކޮށް ބިދޭސީން ހަރަކާތްތެރިވެ އެވެ.
އެގޮތުން، އޮޅުވާލައިގެން ޓްރެފިކް ކުރި 180 އަށް ވުރެ ގިނަ ބިދޭސީން ރާއްޖެ އެތެރެވުމުގެ ހުއްދަ ނުދީ ހޯމަ އަނބުރާ ފޮނުވާލާފައިވާއިރު، އޭގެ ކުރިން ރޭ ރާއްޖެ އައި ބަޔަކަށް ފަސް ތަރީގެ ހޮޓަލެއް ކަމަށް ބުނެ ބުކިން ހައްދާފައި އޮތީ ފަޅު ގެއެއްގެ ނަމުގަ އެވެ.
ރާއްޖޭގައި ހުންނަ އިންޑިއާ ހައިކޮމިޝަނުގެ ޑެޕިޔުޓީ ހައިކޮމިޝަނަރު ރޯހިތު ރަތިޝް މިއަދު "އަދަދު"އަށް ވިދާޅުވީ އެ މައްސަލައިގައި ރާއްޖޭގެ ކަމާގުޅޭ އިދާރާތަކާއެކު މަޝްވަރާ ކުރަމުން އަންނަ ކަމަށެވެ.
"އަޅުގަނޑުމެން އެދެފިން މުސްތަގުބަލުގައި މިކަން ތަކުރާރުނުވުމަށް ފޭކް ބުކިން ހައްދައިދޭ އޭޖަންޓުންނަށް ފިޔަވަޅުއަޅައި އެކަން ހުއްޓުވައި ދިނުމަށް،" ރޯހިތު ވިދާޅުވި އެވެ.
އޭގެ އިތުރުން، މި މައްސަލަ އިތުރުވަމުންދާކަން އިންޑިއާގެ ކަމާގުޅޭ އިދާރާތަކުގެ ސަމާލުކަމަށް ވެސް މިހާރު ގެނެސްފައިވާކަމަށް ވެސް އޭނާ ވިދާޅުވި އެވެ.
ޓޫރިސްޓުން ތިބޭނެ ތަނެއް ނެތިގެން ޑިމާންޑް ބޮޑުވެފައިވާއިރު މީހުން ދިރިއުޅޭ ގެތަކުގައި ޓޫރިސްޓުން ބަހައްޓާ މައްސަލަ ވެސް މިފަހުން ވަނީ ފެންމަތިވެފަ އެވެ.
އެއާއެކު ހެލްތް ޕްރޮޓަކްޝަން އެޖެންސީ (އެޗްޕީއޭ) އިން އިންސްޕެކްޝަންތަކެއް ވެސް ފަށާފައިވާއިރު، ދެކުނު އޭޝިއާ ގައުމުތަކުން ޓްރާންސިޓް ކަރަންޓީނު މަންޒިލެއްގެ ގޮތުގައި ރާއްޖެ އަންނަ ޓޫރިސްޓުން މީހުން ދިރިއުޅޭ ގޭގޭގައި ބޭތިއްބުން ހުއްޓުވާނެ ކަމަށް ރައީސް އިބްރާހިމް މުހައްމަދު ސޯލިހު ވެސް ވަނީ ވިދާޅުވެފަ އެވެ.
