ވޮޝިންޓަން، އެމެރިކާ (އޯގަސްޓު 17) - އަންހެނުންގެ ހައްގުތަކަށް އިހްތިރާމުކޮށް، އަލް ގައިދާ ފަދަ ޓެރަރިސްޓް ގްރޫޕުތަކަށް ހަރަކާތްތެރި ނުވެވޭ ގޮތް ހަދައިފި ނަމަ ތާލިބާން ސަރުކާރު ބަލައިގަންނާނެ ކަމަށް އެމެރިކާ އިން ބުނެފި އެވެ.
"އަފްގާނިސްތާނުގައި ކުރިމަގުގައި އުފެދޭ ސަރުކާރަކާ މެދު އަޅުގަނޑުމެން ގޮތެއް ނިންމާނީ އެ ސަރުކާރެއްގެ އަމަލުތަކަށް ބެލުމަށް ފަހު. އެ ނިންމުން ބިނާވާނީ ތާލިބާނުންގެ އަމަލުތަކަށް ބެލުމަށް ފަހު،" ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިޒް ވިދާޅުވި އެވެ.
"ކުރިމަގުގައި އުފެދޭ އަފްގާން ސަރުކާރުން ރައްޔިތުންގެ އަސާސީ ހައްގުތައް ކުރިއަށް ނެރެ، ޓެރަރިސްޓުންނަށް ރައްކާތެރިކަން ނުދީ، އާބާދީގެ ދެބައިކޮށްފައި އެއްބައި ކަމުގައިވާ އަންހެނުންނާއި އަންހެން ކުދިންގެ ހައްގުތަކަށް އިހްތިރާމް ކުރާ ނަމަ އެ ސަރުކާރާއެކު އަޅުގަނޑުމެންނަށް މަސައްކަތް ކުރެވިދާނެ."
ޕްރައިޒް ވިދާޅުވީ އަފްގާނިސްތާނާ ގުޅޭ ކަންކަމުގައި އެމެރިކާގެ އެންމެ އިސް ނެގޯޝިއޭޓަރު ޒަމްލޭ ހަލީލްޒާދް މި ވަގުތު ވެސް ހުންނެވީ ތާލިބާނުންގެ ޑިޕްލޮމެޓިކް މަރުކަޒު، ގަތަރުގައި ކަމަށެވެ. ގަތަރުގައި އެމެރިކާގެ އޮފިޝަލުން ދަނީ ތާލިބާނުންނާ އެކު މަޝްވަރާތައް ކުރަމުންނެވެ.
"އޭގެ ތެރެއިން ބައެއް މަޝްވަރަތައް ވަރަށް ކާމިޔާބު," ކަމުގައި ޕްރައިޒް ފާހަގަކުރެއްވި އެވެ.
"އެކަމަކު މިއީ ތާލިބާނުންނަށް ވާތީ، ބަސްތަކަކަށް އަޑުއެހުމުގެ ބަދަލުގައި އަޅުގަނޑުމެން ބަލާނީ އަމަލަށް."
އެމެރިކާގެ ސިފައިން ވެސް ވަނީ ކާބުލް އެއާޕޯޓުގެ ސެކިއުރިޓީ ކަންކަމާ ގުޅޭ ގޮތުން ތާލިބާނުންނާ މަޝްވަރާކޮށްފަ އެވެ. އެމެރިކާ ރައްޔިތުންނާއި އެމެރިކާއާ ގުޅުން ހުރި އަފްގާން ރައްޔިތުން ކާބުލް އެއާޕޯޓުން ފުރަމުން ދާއިރު، އެ ތަނުގެ ސެކިއުރިޓީ ބަލަހައްޓާނީ އެމެރިކާ ސިފައިންނެވެ.
ތާލިބާނުން 1996 އިން 2001 އަށް އަފްގާނިސްތާނުގައި ވެރިކަން ކުރިއިރު، އަންހެނުންނާއި އަންހެން ކުދިންގެ ހައްގުތައް އޮތީ ވަރަށް ބޮޑަށް ހިފަހައްޓާފަ އެވެ. އެގޮތުން އަންހެނުން ވަޒީފާ އަދާ ކުރުން މަނާކޮށް އަންހެނުން ކުދިންގެ ސްކޫލުތައް ބަންދުކުރި އެވެ.
އޭރު އެ މީހުންގެ ވެރިކަން ވެއްޓުނީ ސެޕްޓެމްބަރު 11، 2001 ގައި އަލް ގައިދާ އިން ދިން ޓެރަރިސްޓް ހަމަލާތަކާ ގުޅިގެން އެމެރިކާ ސިފައިން އަފްގާން ފަސްގަނޑަށް އެރުމުންނެވެ. ވިހި އަހަރަށް ފަހު އާދީއްތަ ދުވަހު ތާލިބާނުން އަނެއްކާ ވެސް ވަނީ އަފްގާނިސްތާނުގެ ވެރިކަމަށް އައިސްފަ އެވެ.
