ޕެރިސް (އޮގަސްޓް 17) - ހިލޭ ޓްރާންސްފާއެއްގައި ޕީއެސްޖީއާ ގުޅުނު ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ ލިއޮނަލް މެސީ އެ ކްލަބަށް ކުޅޭނެ ފުރަތަމަ މެޗަކީ މި މަހު 29 ވަނަ ދުވަހު ފްރެންޗް ލީގުގައި ޕީއެސްޖީން ރެއިމްސްއާ ބައްދަލުކުރާ މެޗު ކަމަށް ފްރާންސްގެ މީޑިއާ ރިޕޯޓްތައް ބުނެފި އެވެ.
މީގެ ކުރިން ޕީއެސްޖީގެ ކޯޗު މައުރީސިއޯ ޕޮޗެޓީނޯ ވަނީ އަވަސް އަރުވާލައިގެން މެސީ މެޗުތަކުގައި ބޭނުން ނުކުރާނެ ކަމަށާއި އޭގެ އެންމެ ބޮޑު ސަބަބަކީ މެސީ އަށް ރަނގަޅު ޕްރީ ސީޒަނެއް ލިބިފައިނުވުން ކަމަށެވެ.
މިދިޔަ ހޮނިހިރު ދުވަހުގެރޭ ޕީއެސްޖީން 4-2 އިން ސްޓްރާސްބާގް ބަލިކުރި މެޗުގެ ކުރިން މެސީ ހިމެނޭ ގޮތަށް ޕީއެސްޖީން މި ފަހަރު ސޮއިކުރި ކުޅުންތެރިންތައް ވަނީ އެ ކްލަބްގެ ފަރާތުން ޓީމުގެ ސަޕޯޓަރުންނަށް ތައާރަފްކޮށްފަ އެވެ.
ޕީއެސްޖީން ދެން ކުޅޭ މެޗުގައި ހުކުރު ދުވަހުގެރޭ ރަށުންބޭރުގައި ކުޅޭނީ ބްރެސްޓާ ދެކޮޅަށެވެ. އެ މެޗުގައި ވެސް މެސީ ފެނުމުގެ ފުރުސަތު ކުޑަކަމަށް ފްރާންސްގެ ލަ ޕެރީސިއަން ނޫހުން ވަނީ ރިޕޯޓްކޮށްފަ އެވެ.
ބްރެސްޓް މެޗަށް ދަތުރުކުރާ ޕީއެސްޖީ ޓީމުގައި މެސީ ހިމެނުނު ނަމަވެސް އޭނާ އެ މެޗުގައި ނުކުޅޭނެ ކަމަށް ސްކައި ސްޕޯޓްސް އިން ވެސް ވަނީ ރިޕޯޓްކޮށްފަ އެވެ. އަދި މެސީ ރަސްމީކޮށް ޕީއެސްޖީ އަށް ކުޅޭނެ މެޗަކީ މި މަހު 29 ވަަނަ ދުވަހު އެ ޓީމުން ރެއިމްސްއާ ދެކޮޅަށް ކުޅޭ މެޗުގަ އެވެ. އެ މެޗުގައި ޕީއެސްޖީގެ އާ ކީޕަރު ޖިއަންލުއީޖީ ޑޮންނަރުންމާ ވެސް ފެނުމުގެ ފުރުސަތު އެބައޮތެވެ.
މި ފަހަރުގެ ޓްރާންސްފާ މާކެޓްގައި ހިލޭ ޓްރާންސްފާއެއްގައި ޕީއެސްޖީން ގެނައި ރެއާލް މެޑްރިޑްގެ ކުރީގެ ކެޕްޓަން ސާޖިއޯ ރާމޯސް އަށް ލިބިފައިވާ އަނިޔާ އިން ރަނގަޅުވެ، އޭނާ އަށް ކުޅުމުގެ ތެރެއަށް އެނބުރި އާދެވޭނީ ސެޕްޓެމްބަރު މަހުގެ ތެރޭގަ އެވެ. ޕީއެސްޖީން މި ފަހަރު ގެނައި އަޝްރަފް ހަކީމީ އާއި ޖިއޮޖީނިއޯ ވައިނަލްޑަމް ވަނީ އެ ޓީމުގެ މެޗުތަކުގައި ކުޅެފަ އެވެ.
