ބޮޒްކުރްތު، ތުރުކީ (އޯގަސްޓު 17) - މިދިޔަ ހަފްތާގައި ތުރުކީގެ ބްލެކް ސީ ސަރަހައްދުގައި ކުއްލިއަކަށް ހިނގި ފެންބޮޑުވުމުގެ ހާދިސާތަކުގައި މަރުވި މީހުންގެ 77 އަށް އަރައިފި އެވެ.
އަދި އިތުރު 40 މީހަކު ގެއްލިގެން ހޯދުމުގެ މަސައްކަތް އަންނަނީ ކުރަމުންނެވެ. ބިމާ ހަމަވެފައިވާ އިމާރާތްތަކުގެ ދަށުން މީހުން ފެނޭތީ އެތަންތަން ވެސް އަންނަނީ ބަލަމުންނެވެ.
ތިރީހަށް ވުރެ ގިނަ އަވަށަށް އަދިވެސް ކަރަންޓުގެ ހިދުމަތް ނުލިބޭ އިރު ބައެއް ހިސާބުތަކުން ފެނުގެ ހިދުމަތް ވެސް ވަނީ ކެނޑިފައި ކަމަށް އެމެޖެންސީ ހިދުމަތްތަކުން ބުނެ އެވެ.
އެމެޖެންސީ ޓީމުތަކުން ވަނީ ހާލުގައި ޖެހިފައިވާ މީހުންނާ ފަސޭހައި މުއާސަލާތު ކުރެވޭ ގޮތް ހެދުމަށް ވަގުތީ ރިސީވަރުތަކާއި ޓްރާންސްމިޓަރުތައް ބަހައްޓާފަ އެވެ.
ތުރުކީގެ އުތުރުގައި ފެންބޮޑުވެ ބޮޑެތި ގެއްލުންތަކެއް ވެފައި މި ވަނީ ދެކުނު އައްސޭރިފަށާ ދިމާލުން ޖަންގަލިތަކުގައި ރޯވެ އަނދަމުންދާ އަލިފާންގަނޑުތައް ކޮންޓްރޯލް ކުރުމުގެ މަސައްކަތް ކުރަނިކޮށެވެ.
ޖަންގަލިތަކުގައި 100 އަށް ވުރެ ގިނަ އަލިފާންގަނޑު ރޯވެފައި ވާއިރު، އަލިފާނުގެ ސަބަބުން މިހާތަނަށް އަށް މީހުން މަރުވެފައިވެ އެވެ.
އަލިފާން ނިއްވަން އުޅުނު މަތިންދާ ބޯޓެއް ހޮނިހިރު ދުވަހު ދެކުނުގެ ފަރުބަދަ މަތީ ސަރަހައްދަކަށް ވެއްޓި، އޭގައި ތިބި ރަޝިއާގެ ފަސް މީހުންނާއި ތުރުކީގެ ތިން މީހުން ވެސް މަރުވި އެވެ.
ސައިންޓިސްޓުން ބުނެފައި ވަނީ ޖަންގަލީގައި ރޯވުމާއި ކުއްލިއަކަށް ފެންބޮޑުވުން ފަދަ ގުދުރަތީ ކާރިސާތަކުގެ ބާރުގަދަވެ، ގިނައިން ދިމާވަނީ ވިހަ ގޭސްތަކުގެ ސަބަބުން ދުނިޔެ ހޫނުވެ ކުރިމަތިވެފައިވާ މޫސުމީ ބަދަލާ ހެދި ކަމަށެވެ.
