ކުރީގެ ރައީސް މުހައްމަދު ނަޝީދާއި މި ސަރުކާރުގެ ހާރިޖީ ވަޒީރު އަބްދުﷲ ޝާހިދު ނުރަސްމީކޮށް އިނގިރޭސިވިލާތުގައި މިއަދު ބައްދަލު ކުރައްވައިފި އެވެ.
މިއީ، ބޮމުގެ ހަމަލާއިން ފަރުވާ ހޯއްދެވުމަށް މެއި 13، ގައި ނަޝީދު ފުރާވަޑައިގެންނެވި ފަހުން ސަރުކާރުގެ ވަޒީރަކާ ބައްދަލު ކުރެއްވި ފުރަތަމަ ފަހަރެވެ.
ޝާހިދާއި ނަޝީދު ބައްދަލު ކުރައްވާފައި މި ވަނީ ރައީސް އިބްރާހިމް މުހައްމަދު ސޯލިހާއެކު ސިޔާސީ ގޮތުން ހުރެވެން ނެތް ކަމަށް ނަޝީދު އިއުލާން ކުރައްވާފައި އޮއްވަ އެވެ. އަދި ހިނގަމުންދާ މި ރިޔާސީ ދައުރު ނިމުމުގެ ކުރިން ވެރިކަން ހިންގާ ނިޒާމު ބަދަލުކޮށް ބޮޑުވަޒީރުގެ މަގާމަށް ވަޑައިގަތުމަށް ބޭނުންފުޅުވާ ކަމަށް އޭގެ ކުރިން ވިދާޅުވެފައި އޮއްވަ އެވެ.
އޭގެ އިތުރުން، އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް އާއި ކުރީގެ ރައީސް އަބްދުﷲ ޔާމީނާއެކު ކޯލިޝަނެއް ހަދަން ބޭނުންވެވަޑައިގަންނަވާ ކަމަށް ވެސް ރައީސް ނަޝީދު ވިދާޅުވެފައިވެ އެވެ. ނަމަވެސް ރައީސް ސޯލިހު ވަނީ އެކަމަށް ރައްދު ދެއްވައިފަ އެވެ.
"އަޅުގަނޑަށް ގަބޫލެއް ނުކުރެވޭ މަލްޓި ޕާޓީ ނިޒާމެއްގައި އެމްޑީޕީ އާއި ޕީޕީއެމް ގުޅިގެން މަސައްކަތް ކުރުމުގެ ފުރުސަތު އޮތް ކަމަކަށް. ސިޔާސީ ނިޒާމަށް އަދި މަސްލަހަތަށް ވެސް އެންމެ ރަނގަޅު ގޮތަކީ އެ ދެ ޕާޓީ ދެ ފަރާތުގައި ތިބުން. އެއް ބަޔަކު އަނެއް ބަޔަކާ ސުވާލު ކުރެވި ފާޑުކިޔައިގެން،" މިދިޔަ ބުދަ ދުވަހު ރައީސް ސޯލިހު ވިދާޅުވެފައިވެ އެވެ.
ސިޔާސީ ގޮތުން ރައީސް ސޯލިހާއެކު ހުރެވެން ނެތް ކަމަށް އިއުލާން ކުރެއްވުމަށްފަހު ނަޝީދު ވަނީ ސަރުކާރު ކޯލިޝަންގައި ހިމެނޭ އަދާލަތު ޕާޓީއަށް ވަރަށް ބޮޑަށް ފާޑުވިދާޅުވެ އެ ޕާޓީއަކީ ހަރުކަށި ވިސްނުމަށް ތާއީދު ކުރާ ޕާޓީއެއްގެ ގޮތުގައި ސިފަ ކުރައްވައިފަ އެވެ.
މެއި 6، ވަނަ ދުވަހު އޮތް ތަރާވީސް ބައްދަލުވުމަށް ވަޑައިގެންނެވުމަށް ގެއިން ނިކުމެވަޑައިގެން ކާރުކޮޅަށް އަރާ ހަމަވިތަނުން ގޮއްވާލި ބޮމުގެ ސަބަބުން ލިބުނު ގެއްލުންތަކަށް އަށް ދުވަހު އޭޑީކޭ ހޮސްޕިޓަލުގައި ނަޝީދު ފަރުވާ ހޯއްދެވި އެވެ.
ދީނީ ގޮތުން ހަރުކަށި ވިސްނުން ގެންގުޅޭ ޓެރަރިސްޓު ގްރޫޕަކުން ދިން އެ ހަމަލާއަށް ރާއްޖެއިން ފަރުވާ ހޯއްދެވުމަށްފަހު އިތުރު ފަރުވާއަށް ވަރުގަދަ ސެކިއުރިޓީއާއެކު ވަޑައިގެންނެވީ ޖަރުމަނަށެވެ. އިނގިރޭސިވިލާތަށް ވަޑައިގެންނެވީ ގާތްގަނޑަކަށް އެއް މަސް ދުވަހަށްފަހު ހޮސްޕިޓަލުން ޑިސްޗާޖުކޮށްލެއްވުމުންނެވެ.
ބޮން ގޮވުމާއެކު އެއަށް އަޅާފައި ހުރި ބެއަރިން ބޯޅައިގެ 10 ފުށް ނަޝީދުގެ ހަށިކޮޅު ފޫއަޅުވާލި އެވެ. އަދި ބޮން ހަރުކޮށްފައި އިން ވޭވް ސައިކަލުގެ ޕްލާސްޓިކް ކޮޅެއް ވެސް އެމަނިކުފާނުގެ ހަށިގަނޑަށް ވަނެވެ. ނަޝީދުގެ ފުރާނަ ސަލާމަތްވީ މެދުނުކެނޑި 16 ގަޑިއިރު ވަންދެން އެމަނިކުފާނުގެ ހަށިކޮޅުގައި އޭޑީކޭ ހޮސްޕިޓަލުގެ ޑޮކްޓަރުންގެ ޓީމަކުން ކުރެއްވި ސާޖަރީތަކަކަށްފަހު އެވެ.
ބޮމުގެ ބައިތައް ނަޝީދުގެ ފުއްޕާމޭ، ބޯ، ބަނޑު، އަތް، އަދި ފަޔަށް ވެސް އަމާޒުވެފައި ހުރިއިރު އެމަނިކުފާނުގެ ހިތާ އެންމެ ސެންޓިމީޓަރެއް ދުރުން ވެސް ބެއަރިން ބޯޅައެއް ހަށިގަނޑަށް ވަދެފައިވެ އެވެ.
