ވޮޝިންޓަން، އެމެރިކާ (އޯގަސްޓު 16) - ވިހި އަހަރަށް ފަހު އެމެރިކާ ސިފައިން އަފްގާނިސްތާނުން ފޭބުމާއެކު ތާލިބާނުން ކުޑަ ދުވަސްކޮޅެއްގެ ތެރޭގައި ބާރު ހޯދުމުން އެމެރިކާގެ ރައީސް ޖޯ ބައިޑެންގެ އިސްތިއުފާ އަށް ކުރީގެ ރައީސް ޑޮނަލްޑް ޓްރަމްޕް ގޮވާލައްވައިފި އެވެ.
"އަފްގާނިސްތާނު އެ ހާލަތަށް ދާން ދޫކޮށްލި ކަމަށް ޓަކައި ބައިޑެން އިސްތިއުފާ ދެއްވަން ޖެހޭ ވަގުތު އައިސް ޖެހިއްޖެ،" ޓްރަމްޕް ނެރުއްވި ބަޔާނެއްގައި ވިދާޅުވި އެވެ.
ޓްރަމްޕްގެ ބަޔާނުގައި ވަނީ އަފްގާނިސްތާނުގެ މައްސަލައިގެ އިތުރުން ކޮވިޑްގެ ހާލަތު ގޯސް ވާތީ އާއި އިމިގްރޭޝަނާއި އިގްތިސާދާއި ހަކަތައާ ގުޅޭ ސިޔާސަތުތަކަށް ވެސް ފާޑުވިދާޅުވެފަ އެވެ.
މީގެ ކުރިން ވެސް ޓްރަމްޕް ވަނީ އަފްގާނިސްތާނުން އެމެރިކާ ސިފައިން ފައިބަމުންދާ ގޮތަށް ފާޑުވިދާޅުވެފަ އެވެ. އަދި އެމަނިކުފާނުގެ ވެރިކަމެއްގައި މާ ކާމިޔާބުކަމާއެކު އެކަން ކުރައްވާނެ ކަމަށް ވިދާޅުވި އެވެ.
"ޖޯ ބައިޑެން އަފްގާނިސްތާނުގައި މި ކުރެއްވި ކަމަކީ އާދަޔާ ހިލާފު ކަމެއް. އެމެރިކާގެ ތާރީހުގައި އެކަން ލިޔެވިގެން ދާނީ ބޮޑު ނާކާމިޔާބެއްގެ ގޮތުގައި،"
ރައްދުގައި ބައިޑެންގެ ސަރުކާރުން ބުނީ އެމެރިކާ ސިފައިން ފޭބުމާ ގުޅޭ އެއްބަސްވުމަކަށް ތާލިބާނުންނާއެކު އައީ ޓްރަމްޕްގެ ސަރުކާރުން ކަމަށާއި އަދި ސިފައިން ގައުމަށް ގެނައުމަށް އާއްމު ރައްޔިތުން އެދޭ ކަމަށެވެ.
ސަރުކާރުން އެހެން ބުނި ނަމަވެސް ސިފައިން ގައުމަށް ގެނައުމުގެ ކަންކަން ރަނގަޅަށް މެނޭޖު ކުރެވިފައި ނުވާ ކަމަށް ބުނެ އެމެރިކާ ރައްޔިތުން ވެސް ދަނީ ފާޑުކިޔަމުންނެވެ.
އަފްގާނިސްތާނުގައި އެމެރިކާ ސިފައިން މިހާރު އަވަސްވެގަނެފައި ވަނީ އެމްބަސީގެ މުވައްޒަފުންނާއި އެހެން އެމެރިކާ ރައްޔިތުން ވީ އެންމެ އަވަހަކަށް ގައުމަށް ގެނައުމަށެވެ.
ޓްރަމްޕްގެ އިތުރުން އިދިކޮޅު ރިޕަބްލިކަން ޕާޓީގެ ސެނެޓް ލީޑަރު މިޗް މެކްކޮނެލް ވެސް ވަނީ ބައިޑެން އަށް ފާޑުވިދާޅުވެ، އެއީ އެމެރިކާގެ ލީޑަރުން ފެއިލްވިކަމުގެ ރަމްޒެއް ކަމަށް ވިދާޅުވެފަ އެވެ.
