ދެ ބިލިއަނަށް ވުރެ ގިނަ ރުފިޔާގެ ޓްރެޝަރީ ބިލު ވިއްކަން ފިނޭންސް މިނިސްޓްރީން ހުޅުވާލައިފި އެވެ.
ދައުލަތަށް ފައިސާ ހޯދަން ހަތަރު މުއްދަތަކަށް ބަހާލައިގެން 2.02 ބިލިއަން ރުފިޔާގެ ޓީ-ބިލު ވިއްކަން ހުޅުވާލާފައިވަނީ މިއަދެވެ.
މިފަހަރު ހުޅުވައިލި ޓީ-ބިލްގައި ހިމެނެނީ 28 ދުވަހުގެ ތެރޭގައި އަނބުރާ ދައްކާ ގޮތަށް ހުޅުވާލި 40 މިލިއަން ރުފިޔާގެ އިތުރުން 98 ދުވަހުން އަނބުރާ ދައްކާ ގޮތަށް ހުޅުވާލި 240 މިލިއަން ރުފިޔާގެ ޓީބިލެވެ.
މީގެ އިތުރުން 182 ދުވަހުން އަނބުރާ ދައްކާ ގޮތަށް ހުޅުވާލި 135 މިލިއަން ރުފިޔާގެ ޓީބިލެއްގެ އިތުރުން އެއް އަހަރުން އަނބުރާ ދައްކަން ޖެހޭ 1.6 ބިލިއަން ރުފިޔާގެ ޓީބިލެއްވެސް ހިމެނެ އެވެ.
އެ ޓީ-ބިލުތަކުގެ އިންޓަރެސްޓް ރޭޓު އުޅެނީ 3.50 ޕަސަންޓާއި 4.60 ޕަސަންޓާ ދެމެދުގަ އެވެ.
އާންމުކޮށް ކޮންމެ ހަފްތާއާއެކު ދައުލަތުން ޓީ-ބިލު ވިއްކާއިރު، މިދިޔަ ހަފްތާގައި ވެސް ގާތްގަނޑަކަށް 2.51 ބިލިއަން ރުފިޔާގެ ޓީ-ބިލު ވިއްކަން ހުޅުވައިލި އެވެ.
ސަރުކާރުން ވިއްކާ ޓީ-ބިލްތައް އާންމުކޮށް ގަންނަނީ ޕެންޝަން ފަންޑާއި ބޭންކުތަކާއި ސަރުކާރު ހިއްސާވާ ބައެއް ކުންފުނިތަކުންނެވެ.
ފިނޭންސް މިނިސްޓްރީގެ ތަފާސް ހިސާބުތައް ދައްކާ ގޮތުން ދައުލަތުގެ އަނބުރާ ދައްކަންޖެހޭ ޓީ-ބިލްގެ އަދަދު މިހާރު އުޅެނީ 27 ބިލިއަން ރުފިޔާގަ އެވެ.
ކޮންވެންޝަނަލް ޓްރެޝަރީގެ އިތުރުން ސަރުކާރުން ވަނީ ދާދިފަހުން އިސްލާމިކް ޓްރެރިޝަރީއެއް ވެސް ވިއްކައިފަ އެވެ.
