މި ވެރިކަމުގައި ކުރިއަށް ގެންދަން ރާވާފައިވާ އުމްރާނީ ތަރައްގީގެ ބިޔަ އެއް މަޝްރޫއު, މާލެ ސަރަހައްދު ގުޅާލާ ބްރިޖް އަޅަން ވަރަށް އަވަހަށް ސޮއިކޮށް މަސައްކަތް ފަށާނެ ކަމަށް ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެ އެވެ.
މާލެ އާއި ވިލިމާލެ އާއި ގުޅިފަޅު އަދި ތިލަފުށި ގުޅުވައިދޭ ބްރިޖުގެ މަސައްކަތް ފަށަން ސަރުކާރުން އިއުލާންކުރި ތާރީހުތަކުގައި އެކަން ނުވެ ލަސްވެއްޖެ އެވެ. ބްރިޖް މަޝްރޫއުގައި، މާލެ އިން ގުޅީފަޅަށް 67 ކިލޯމީޓަރު ބްރިޖް އަދި ކޯޒްވޭއެއް ގާއިމްކުރަން އޮތީ ނިންމައިފަ އެވެ.
އަކްރަމް "އަދަދު"އަށް މިއަދު ވިދާޅުވީ ބްރިޖް އަޅަން ހަވާލުކުރި ކުންފުންޏާ އެކު ކުރިއަށްދާ މަޝްވަރާތައް އޮތީ ނިމުމާ ހިސާބުގައި ކަމަށެވެ. އެހެންކަމުން ދެން އޮތީ ސޮއިކޮށް މަސައްކަތް ފެށުން ކަަމަށް ވިދާޅުވި އެވެ.
"މާ ލަހެއް ނުވެ އެ މަސައްކަތް ފެށޭނެ," އަކްރަމް ވިދާޅުވި އެވެ.
ބްރިޖް އަޅަން މަޝްވަރާ ކުރަމުން އަންނަނީ ކޮން ކުންފުންޏަކާ ކަމެއް އަކްރަމް ވިދާޅެއް ނުވެ އެވެ. އަދި ސަރުކާރުން ވެސް މިހާތަނަށް އިއުލާންކޮށްފައެއް ނުވެ އެވެ.
އެކަމަކު "އަދަދު"އަށް ލިބިފައިވާ މި މަޝްރޫއާ ގުޅޭ މައުލޫމާތުތަކުގައިވާ ގޮތުގައި "ގްރޭޓާ މާލެ ކަނެކްޓިވިޓީ ޕްރޮޖެކްޓް"، ހަވާލުކުރަނީ އންޑިއާގެ އެފްކޮން އިންފްރަސްޓްރަކްޗާ ލިމިޓެޑާ އެވެ. އެ ކުންފުންޏާ ހަވާލުކުރަން, އިންޑިއާގެ އެގްޒިމް ބޭންކަށް ފޮނުވައި ހުއްދަ ވެސް ވަނީ ހޯދައިފަ އެވެ.
އެފްކޮންއަކީ އައްޑޫގެ މަގުތައް ހެދުމާއި ފެން ހިންދުމުގެ ނިޒާމު ގާއިމްކުރަން ވެސް ހަވާލުކޮށްފައިވާ ކުންފުންޏެވެ.
އިންޑިއާގެ ކުންފުންޏެއް ކަމަށްވާ ޝަޕޫރުޖީ ޕައްލޮންޖީ ކުންފުނިން މެޖޯރިޓީ ހިއްސާ ގަނެފައިވާ އެފްކޮން އިން ވަނީ އިންޑިއާގައި އުމްރާނީ ތަރައްގީގެ ބިޔަ މަޝްރޫއުތައް ކާމިޔާބުކަމާ އެކު ނިންމައިފަ އެވެ.
އިންޑިއާގެ ޓާޓާ ކުންފުންޏާ ވެސް ގުޅުން އޮންނަ އެފްކޮންގެ މަޝްރޫއުތަކުގެ ތެރޭގައި، ގަބޯންގައި އެ ގައުމުގެ އިރުން ހުޅަނގަށް ގުޅުވައިދޭ ޓްރާންސް ގަބޮނީސް ރޯޑް ޕްރޮޖެކްޓެއް ވެސް އެފްކޮން އިން ވަނީ ކާމިޔާބުކޮށްފަ އެވެ. އަދި އެފްރިކާގެ ގާނާގައި އަޅާ ވޮލްޓާ ރެއިލްވޭ ބްރިޖްގެ މަސައްކަތް ހަވާލުކޮށްފައި ވަނީ އެފްކޮންއާ އެވެ. މިއީ ޖަޕާނުގެ ސަރުކާރުން 100 މިލިއަނަށް ވުރެން ގިނަ ޑޮލަރުގެ ލޯނެއްގެ ދަށުން ގާނާގައި ތަރައްގީކުރާ ޕްރޮޖެކްޓެވެ.
އެގްޒިމް ބޭންކުގެ ލޯނާ އެކު ތިލަމާލެ ބްރިޖް މަޝްރޫއަށް ދެން ފަންޑުކުރާނީ އިންޑިއާ ސަރުކާރުގެ ހިލޭ އެހީގެ ގޮތުގައި ދީފައިވާ 100 މިލިއަން ޑޮލަރާއި ދިވެހި ދައުލަތުގެ ފައިސާއިންނެވެ. ސަރުކާރުން ކުރިން ބުނެފައި ވަނީ ތިލަފުށްޓާއި މާލެ ގުޅާލާ ބްރިޖްގެ މަޝްރޫއު އަށް 500 މިލިއަން ޑޮލަރު ހަރަދުވާނެ ކަމަށް އަންދާޒާ ކުރެވޭ ކަމަށެވެ. މި އަހަރަށް ކަނޑައެޅި ބަޖެޓުގައި މި ބްރިޖަށް 411 މިލިއަން ހިމަނާފައިވެ އެވެ.
