އޭއެފްސީ ކަޕްގެ ޕްލޭއޮފްގައި މިރޭ އިންޑިއާގެ ބެންގަލޫރު އެފްސީއާ ދެކޮޅަށް ކްލަބް އީގަލްސް ކުޅޭއިރު, ތަމްސީލް ކުރަނީ ރާއްޖެ ކަމަށާއި މިއީ ގައުމީ ކަމެއްގެ ގޮތުގައި ދެކި އީގަލްސް އަށް ސަޕޯޓްކޮށްދޭން އީގަލްސްގެ ކެޕްޓަން ހުސެއިން ސިފާއު ޔޫސުފް (ކުރޯ) އެދިއްޖެ އެެވެ.
ގަލޮޅު ދަނޑުގައި މިރޭ 8 ޖަހާއިރު ފަށާ މެޗު ބަލަން ދަނޑަށް ސަޕޯޓަރުން ވަނުމުގެ ހުއްދަ ނެތީ ކޮވިޑް-19ގެ ސަބަބުންނެވެ.
މިރޭގެ މެޗުގެ ކުރިން އިއްޔެ މެންދުރު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން އީގަލްސްގެ ކެޕްޓަން ކުރޯ ބުނީ އީގަލްސް ކުޅުނަސް މިއީ ހަގީގަތުގައި ގައުމީ ކަމެއް ކަމަށާއި އެ ޓީމު މޮޅުވެއްޖެނަމަ ރާއްޖެ އަށް ވެސް ރީތި ނަން ލިބޭނެ ކަމަށެވެ.
"އީގަލްސްގެ ނަމުގައި ނުކުތަސް މިއީ ގައުމީ ކަމެއް. ތަމްސީލް މި ކުރަނީ ދިވެހިރާއްޖެ. އެންމެން ވެސް އީގަލްސްއާ އެކީގައި އީގަލްސް އަށް ސަޕޯޓްކުރުން އެދެނީ،" ގައުމީ ޓީމާ އެކު 2018 ވަނަ އަަހަރުގެ ސާފް ސުޒުކީ ކަޕް ކާމިޔާބުކުރި ކުރޯ ބުންޏެވެ.
ދިވެހި ޕްރިމިއާ ލީގުގެ މެޗެއްގެ ތެރެއިން ކުރޯ (ވ) ބޯޅަ ފޮނުވާލަނީ.-- ފޮޓޯ: ހުސެއިން ވަހީދު/ އަދަދު
އީގަލްސް އިން އޭއެފްސީ ކަޕްގެ ޕްލޭއޮފް މެޗަށް އައީ ޕްރިލިމިނަރީ ދެ ބުރު ފަހަނައަޅައިފަ އެވެ. ޕްރިލިމިނަރީ ފުރަތަމަ ބުރުގައި އޭޕްރީލް މަހު މާލޭގައި ބޫޓާންގެ ތިމްޕޫ ސިޓީ އަތުން 2-0 އިން އީގަލްސް މޮޅުވި އެވެ. ދެ ވަނަ ބުރުގައި ބަންގްލަދޭޝްގެ ޑާކާ އަބަހާނީއާ ދެކޮޅަށް ކުޅެން އޮތް މެޗަށް އެ ޓީމަށް ކަންތައްތަކެއް ހަމަނުޖެހި ކުޅެވޭގޮތް ނުވުމުން އެންމެ ފަހުން އޭއެފްސީން ނިންމީ އީގަލްސް އަށް މެޗު ލިބުނީ ކަމަށެވެ.
ޕްލޭއޮފް މެޗު އެންމެ ފުރަތަަމަ ކުޅެން އޮތީ މިދިޔަ މެއި މަހު އެވެ. އެކަމަކު، އީގަލްސްއާ ދެކޮޅަށް ކުޅެން އޮތް ބެންގަލޫރު މެޗަށް މާލެ އައިސް ތިބިއިރު، ކޮވިޑް ޕްރޮޓޮކޯލް މުގުރާލުމުން އޭރު މެޗުތައް ނުކުޅެވި ޖެހުނީ ފަސްކުރާށެވެ. މިރޭ މެޗު ކުޅޭއިރު އޭރުގެ ހާލަތާ ވަރަށް ތަފާތެވެ. އީގަލްސް އާއި ބެންގަލޫރަށް ވެސް ވަނީ ގިނަ ކުޅުންތެރިންތަކެއް ގެެނެސްފަ އެވެ.
އީގަލްސް އިން އޭއެފްސީ ކަޕަށް ތައްޔާރުވުމުގެ ގޮތުން ވަނީ ގައުމީ ޓީމުގެ ތަޖުރިބާކާރު ރަނގަޅު ކުޅުންތެރިންތަކެއްގެ ސޮއި ހޯދައިފަ އެވެ. އެ ކުޅުންތެރިންނަކީ ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި ގައުމީ ޓީމުގެ ކެޕްޓަން އަކުރަމް އަބްދުލް ގަނީ (އަކޫ) އާއި ގޯލްކީޕަރު މުހައްމަދު ފައިސަލް، އަލީ ފާސިރު (ސެންޓޭ)، މުހައްމަދު އާރިފް (ބަކާ)، އިސްމާއިލް އީސާ (މެސީ) އަދި ގްރީން ސްޓްރީޓްސް އާއި މާޒިޔާ އަދި ދަ ގްރާންޑޭ އިން ކުރިން ފެނުނު އަހުމަދު ހަސަން (އައްމަޑޭ) އެވެ.
އީގަލްސްގެ ޕްރެކްޓިހުގެ ތެރެއިން އަޑޭ (ކ)، ބަކާ (މ) އަދި ކުރޯ (ވ).-- ފޮޓޯ: ހުސެއިން ޝަޔާހު/ އަދަދު
ކުރޯ ބުނީ ސީނިއާ ކުޅުންތެރިންތަކެއް އީގަލްސްއާ ގުޅުނީމަ އެ ޓީމުގައި ތިބި މި ލެވަލް (އޭއެފްސީ ކަޕް)ގެ ބައިނަލްއަގުވާމީ ތަޖުރިބާ މަދު ކުޅުންތެރިންނަށް ވެސް ފައިދާ އެބައޮތް ކަމަށެވެ.
"ސީނިއާ ޕްލޭޔަރުންނާ އެކީގައި ކުޅެލަން ލިބުމާ އެ މީހުން ބުނާގޮތް ހަދައިގެން މަސައްކަތް ކޮށްލީމަ ވަރަށް ފަސޭހަ. ވަރަށް ބޮޑަށް އެތަން ފެނިގެންދޭ. އެކްސްޕީރިއަންސް (ތަޖުރިބާކާރު) މީހުން ވީމަ އެ މީހުން ކިޔައިދިނީމަ އިނގޭނެ. އެ ގޮތަށް ވަރަށް ފަސޭހަ. އެކީގަ އެންމެން ވެސް ޓީމުވަންތަކަން އިނދޭ،" 2013 ވަނަ އަހަރުން ފެށިގެން އީގަލްސް އަށް ކުޅެމުން އަންނަ ކުރޯ ބުންޏެވެ.
ބެންގަލޫރާ ދެކޮޅަށް އީގަލްސް ކުޅޭ މެޗުން މޮޅުވެއްޖެނަމަ އޭއެފްސީ ކަޕްގެ ދެކުނު އޭޝިއާގެ ގްރޫޕްގެ ފަހު ޖާގަ ލިބޭނެ އެވެ.
އޭއެފްސީ ކަޕްގެ ދެކުނު އޭޝިއާގެ ކްލަބްތަކަށް ހާއްސަ ގްރޫޕް ޑީގައި އޮތީ ރާއްޖޭގެ ޗެމްޕިއަން މާޒިޔާ އާއި އިންޑިއާގެ ސުޕަ ލީގު ކްލަބް އޭޓީކޭ މޯހަން ބަގާން އަދި ބަންގްލަދޭޝްގެ ޗެމްޕިއަން ބަޝުންދުރާ ކިންގްސް އެވެ. ޕްލޭއޮފާއި ގްރޫޕް ސްޓޭޖުގެ މެޗުތައް އޮތީ މާލޭގަ އެވެ.
އީގަލްސް އަށް ގްރޫޕް ސްޓޭޖަށް ވަދެވިއްޖެނަމަ ޖެހިޖެހިގެން ދެ ސީޒަނުގައި އޭއެފްސީ ކަޕްގެ އެއް ގްރޫޕެއްގައި ރާއްޖޭގެ ދެ ކްލަބް އޮންނާނެ އެވެ. މިދިޔަ އަހަރުގެ އޭއެފްސީ ކަޕްގެ ދެކުނު އޭޝިއާގެ ގްރޫޕްގައި ރާއްޖޭގެ މާޒިޔާ އާއި ޓީސީ ސްޕޯޓްސް ކްލަބް ވާދަކުރި އެވެ. ކޮންމެ ޓީމެއް އެއް މެޗު ކުޅެފައިވަނިކޮށް އޭއެފްސީން ނިންމީ ކޮވިޑާ ހެދި މުބާރާތް ކެންސަލްކުރާށެވެ.
