ލަންޑަން، އިނގިރޭސިވިލާތް (އޯގަސްޓު 13) - އެމެރިކާ ސިފައިން އަފްގާނިސްތާނުން ފޭބުމަކީ ހަދާ ބޮޑު ގޯހެއް ކަމަށާއި އޭގެ ސަބަބުން ހަރުކަށި ފިކުރުގެ ނުރައްކާތެރި މީހުން ނުވަތަ ޓެރަރިސްތުން އުފެދެން ފަށާނެ ކަމަށް އިނގިރޭސިވިލާތުން ބުނެފި އެވެ.
ސްކައި ނިއުސް އަށް ދެއްވި އިންޓަވިއުއެއްގައި ވޮލެސް ވިދާޅުވީ އެމެރިކާ ސިފައިން ފޭބުމުން "އަފްގާނިސްތާނުގައި ނުރައްކާތެރި މައްސަލައެއް އުފެދިފައިވާ" ކަމަށެވެ.
އޭނާ ލަފާކުރެއްވި ގޮތުގައި ތާލިބާނުންނަށް ލިބޭ ކާމިޔާބީގެ ފައިދާ އޮތީ އަލް ގައިދާ އަށެވެ. ސެޕްޓެމްބަރު 11، 2001 ގައި އަލް ގައިދާއިން އެމެރިކާއަށް ހަމަލާ ދިން އިރު، އެ ގްރޫޕުން ފާޅުގައި އަފްގާނިސްތާނުގައި ހަރަކާތްތެރިވުމަށް ތާލިބާން ސަރުކާރުން ތިބީ ހުއްދަ ދީގެންނެވެ.
އެ ހަމަލާއަށް ފަހު އެމެރިކާގެ ސިފައިން އަފްގާނިސްތާނަށް އެރުމާއެކު 1996 އިން ފެށިގެން އޮތް ތާލިބާނުންގެ ވެރިކަން ނިމުނެވެ. އެމެރިކާ ސިފައިން އެނބުރި ގައުމަށް ދާން ފަށާފައި ވަނީ 20 އަހަރު އަފްގާނިސްތާނުގައި ހޭދަކުރުމަށް ފަހު އެވެ.
"އަޅުގަނޑު އެންމެ ބޮޑަށް ކަންބޮޑުވަނީ ފެއިލްވެފައިވާ ދައުލަތްތަކަކީ އެފަދަ މީހުން [ޓެރަރިސްޓުން] އުފެދެން އެންމެ އެކަށޭނަ މާހައުލަށް ވާތީ،" ވޮލެސް ވިދާޅުވި އެވެ.
"ވަރަށް ބޮޑަށް ޔަގީންވާ ކަމަކީ އަލް ގައިދާ އެނބުރި އަންނާނެކަން،" އޭގެ ސަބަބުން އިނގިރޭސިވިލާތާއި އެ ގައުމުގެ މަސްލަހަތަށް ނުރައްކާ ވާނެ ކަމުގެ އިންޒާރު އޭނާ ދެއްވި އެވެ.
"އަޅުގަނޑަށް ގަބޫލުކުރެވޭ ގޮތުގައި އެކަން [އެމެރިކާ ސިފައިން ފޭބުން] އެގޮތަށް ކުރުމަކީހަދާ ގޯހެއް. އޭގެ އަގު އަދާ ކުރަންޖެހޭނެ އަޅުގަނޑުމެން އެންމެން،" ތާލިބާނުންނާއި އެމެރިކާއާ ދެމެދު ސޮއިކުރި އެއްބަސްވުމާ ގުޅޭ ގޮތުން ވިދާޅުވި އެވެ.
މިދިޔަ އަހަރު ދޯހާގައި ތާލިބާނުންނާއި އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ސަރުކާރާ ދެމެދު ސޮއިކުރި އެއްބަސްވުމުގެ ދަށުން އެމެރިކާއާ އެކު އަފްގާނިސްތާނަށް ދިޔަ ނޭޓޯގެ ފައުޖުގައި ހިމެނޭ އިނގިރޭސި ސިފައިން އަނބުރާ ގައުމަށް ގެންދިޔުން މަޖުބޫރެވެ.
ބޮޑު ހިޔާނާތެއް
މިދިޔަ މޭ މަހުން ފެށިގެން އެމެރިކާ އާއި ނޭޓޯގެ ސިފައިން އަފްގާނިސްތާން ދޫކޮށް ދާން ފެށުމުގެ ކުރިން އެ ގައުމުގައި ތިބީ އިނގިރޭސިވިލާތުގެ 750 ސިފައިންނެވެ. މި ވަގުތު ހަނގުރާމައިގައި ތާށިވެފައިވާ އިނގިރޭސި އާއްމު ރައްޔިތުން ރައްކާތެރިކަމާ އެކު އަނބުރާ ގައުމަށް ގެނައުމަށް އަލުން އަފްގާނިސްތާނަށް ފޮނުވަން ނިންމީ 600 ސިފައިންނެވެ.
ވޮލެސް ވިދާޅުވީ އަފްގާނިސްތާނުގައި ތިބި 3،000 އެއްހާ އިނގިރޭސި ރައްޔިތުން އަނބުރާ ގައުމަށް ގެނައުމަށް އެ ސިފައިން އެހީވާނެ އެވެ.
ޑިފެންސް ސެކެޓްރީގެ އިތުރުން އިނގިރޭސިވިލާތުގެ އިސް ބައެއް ސިޔާސީ ބޭފުޅުންނާއި އަސްކަރީ އޮފިޝަލުން ވެސް ވަނީ ސިފައިން ފޭބުމަކީ ގޯހެއް ކަމަށް ވިދާޅުވެފަ އެވެ.
ކުރީގެ އިންޓަނޭޝަނަލް ޑިވެލޮޕްމަންޓް މިނިސްޓަރު ރޯރީ ސްޓިވޯޓް ސިފަކުރެއްވި ގޮތުގައި ސިފައިން ފޭބުމަކީ "އެމެރިކާ އާއި އިނގިރޭސިވިލާތުން އަފްގާނިސްތާނަށް ވީ ބޮޑު ހިޔާނާތެކެވެ".
އެމެރިކާގެ ބައެއް އިސް ފަރާތްތައް ވެސް ވަނީ ސިފައިން ފައިބާތީ އެމެރިކާ ސަރުކާރާއި ރައީސް ޖޯ ބައިޑެން އަށް ފާޑުކިޔާފަ އެވެ. އޭގެ ތެރޭގައި ޓްރަމްޕާއި އަފްގާނިސްތާނަށް ސިފައިން ފޮނުވި ކުރީގެ ރައީސް ޖޯޖް ޑަބްލިއު ބުޝް ހިމެނިވަޑައިގަންނަވަ އެވެ.
