ވެރިކަން ކުރާ ކޯލިޝަނުގައި ހިމެނޭ މައި ޕާޓީ, އެމްޑީޕީއަކީ ރާއްޖޭގައި އެންމެ ބޮޑު ސިޔާސީ ޕާޓީ އެވެ. މެމްބަރުންގެ އަދަދަށް ބަލާއިރު، އެމްޑީޕީގެ ފިކުރަށް ތާއީދުކުރާ ބައި ލައްކައަށް ވުރެ ގިނަ މެމްބަރުން އެބަތިއްބެވެ.
އެ ނިސްބަތުން، އެ ޕާޓީގެ މައި ގުނަން ކަމަށްވާ ގައުމީ މަޖިލީހުގައި ޖުމްލަ 146 މެމްބަރުން ތިބެ އެވެ. އެއީ ވަޒީރުންގެ މަޖިލީހުގެ މެމްބަރުންނާއި މަޖިލީހުގެ މެމްބަރުންނާއި 87 ދާއިރާ ތަމްސީލުވާ ގޮތަށް، ރާއްޖޭގައި އޮތް އެންމެ ބިޔަ ގައުމީ މަޖިލީހެވެ.
ނަމަވެސް، އެ ޕާޓީގެ އެންމެ އިސްކޮށް ތިއްބެވި ޕާޓީގެ ރައީސް މުހައްމަދު ނަޝީދާއި ރައީސް އިބްރާހިމް މުހައްމަދު ސޯލިހާ ދެމެދު އުފެދިފައިވާ ހިޔާލުތަފާތުވުންތަކުގެ އަސަރު ގައުމީ މަޖިލީހުގެ ތެރެއިން ވެސް ދަނީ ފެންނަމުންނެވެ.
ދިރިއުޅުއްވާ ގެކޮޅު ކައިރިން މިދިޔަ މެއި މަހުުގެ ހަ ވަނަ ދުވަހުގެ ރޭ ކާރުކޮޅަށް އަރައިވަޑައިގަންނަވަނިކޮށް ސައިކަލެއްގައި ހަރުކޮށްގެން ބޮމެއް ގޮއްވާފައި ވަނީ އެމްޑީޕީގެ ތެރޭގައި ރެނދުލައިގެން، ކޯޅުމެއްގެ މަލަމަތި ފެންނަމުންދިޔަ ދަނޑިވަޅެއްގަ އެވެ.
ނަމަވެސް ހަމަލާއަށްފަހު އެ ރެނދު ވަނީ ފުޅާވެ، ޕާޓީގެ ތެރޭގައި ރަނގަޅަށް ވެސް ދެ ފެކްޝަނެއް އުފެދިފަ އެވެ.
ނަޝީދުގެ ފަޅީގައި ތިއްބެވި ޕާޓީގެ އިސް ބޭފުޅުން ދަނީ ސަރުކާރަށް އަމާޒުކޮށް ބޮޑެތި ތުހުމަތުތައް ކުރަމުންނެވެ. އެ ހަމަލާގެ ތަހުގީގާމެދު ހިތްހަމަނުޖެހޭކަން ފާޅުކޮށް، އެ ހަމަލާގެ ފަހަތުގައި ތިބި ބަޔަކު ފޮރުވަން މަސައްކަތް ކުރާ ކަމުގެ ތުހުމަތާ އެކު އެވެ.
އެއާއެކު އެމްޑީޕީގެ ގައުމީ މަޖިލީހުން ވަނީ "މެއި6"ގެ ނަމުގައި ކޮމިޓީއެއް އުފައްދައި، އެ ތަހުގީގުގެ ކަންކަން ދާ ގޮތެއް ބެލުމުގެ މަސައްކަތް ފަށައިފަ އެވެ.
ހަފްތާއެކު އެއް ފަހަރު އެ ކޮމިޓީން ހޯދުނު މައުލޫމާތު ގައުމީ މަޖިލީހާ ހިއްސާކުރާ ގޮތަށް ގަރާރެއް ފާސްކުރި ނަމަވެސް، އެ ބައްދަލުވުންތަކުގެ ބައިވެރިވުން ކުޑަ އެވެ.
ކޮންމެ ހަފްތާއެއްގެ ބުރާސްފަތި ދުވަހު ބާއްވާ ގޮތަށް ހަމަޖެއްސުމަށްފަހު، އެ ބައްދަލުވުން ބުދަ ދުވަހަށް ބަދަލުކުރީ މެމްބަރުން އެދިގެންނެވެ.
އެކަމަކު ކޮވިޑާ ހެދި އޮންލައިންކޮށް ބާއްވަމުން ގެންދާ އެ ބައްދަލުވުންތަކުން ފެންނަނީ އެއް މޫނުތަކެކެވެ. އިވެނީ ހަމައެކަނި އެއް ފެކްޝަނުގެ އަޑެވެ.
އެމްޑީޕީ އުފެއްދުނީއްސުރެ ޕާޓީގެ އިސް ސަފުގައި ތިއްބެވި ޑިފެންސް މިނިސްޓަރު މާރިޔާ އަހުމަދު ދީދީ އާއި ހައުސިން މިނިސްޓަރު މުހައްމަދު އަސްލަމާއި އިކޮނޮމިކް މިނިސްޓަރު ފައްޔާޒް އިސްމާއިލް ފަދަ ބޭފުޅުން ބައިވެރިވެވަޑައިނުގަންނަވަ އެވެ.
ރައްޔިތުންގެ މަޖިލީހުގައި އެމްޑީޕީ ތަމްސީލުކުރާ 65 މެމްބަރުން ތިއްބެވި ނަމަވެސް، އެ ބައްދުވުންތަކުން ގިނަ މެމްބަރުން ނުފެނެ އެވެ.
އެއާއެކު، މެއި6 ކޮމިޓީގެ ހޯދުންތައް ހިއްސާކުރަން ގައުމީ މަޖިލީހުގެ ބައްދަލުވުން ބޭއްވުން މިހާރު ވަނީ ހަނގުރާމައަކަށް ބަދަލުވެފަ އެވެ.
އެ ބިޔަ މަޖިލީހުގެ ކޯރަމް ހަމަވާން އެންމެ 37 މެމްބަރުން ބޭނުންވި ނަމަވެސް، އެ އަދަދު ހަމަވަނީ ކިރިޔާ އެވެ. ރޭގެ ބައްދަލުވުން ވެސް ފެށުނީ ކަނޑައެޅި ގަޑިއަށް ވުރެ ބައި ގަޑިއިރެއްހާ ފަހުން 38 މެމްބަރުންނާ އެކު އެވެ.
އެއާއެކު އެ ހަމަލާގެ މައުލޫމާތު ހިއްސާކުރެވޭ ގައުމީ މަޖިލީހުގެ ބައްދަލުވުންތަކުގައި ބައިވެރިނުވަނީ ގަސްދުގައި އެކަމުގެ ސީރިއަސްކަން ކަނޑުވާލަން ކަމުގެ ތުހުމަތުތައް ވެސް ރޭ ކުރެވުނެވެ.
މަގުސަދު ހާސިލުނުވާތީ، ގައުމީ މަޖިލީހުގެ ބައްދަލުވުންތައް މެމްބަރުން ހާޒިރުވެގެން ބޭއްވުމުގެ އިތުރުން މެއި6 ކޮމިޓީން އެމްޑީޕީގެ ހަރުގޭގައި މަހަކު ދެ ފަހަރު ބައްދަލުވުމެއް ބާއްވައި، އާންމު މެމްބަރުންނަށް އެ މައުލޫމާތު ހިއްސާކުރަން ރޭގެ ބައްދަލުވުމަށް ހުށަހެޅުނެވެ.
އެ ހުށަހެޅުންތައް ސާފުކޮށް، ވޯޓަށް އަހަން ޗެއާޕާސަން ހަސަން ލަތީފް ތައްޔާރުވަނިކޮށް ރޭގެ ބައްދަލުވުމުގެ ކޯރަމް ކުއްލިއަކަށް ގެއްލުނެވެ.
އެވަގުތު ބައްދަލުވުމަށް ހާޒިރުވެ ތިބީ އެންމެ 35 މެމްބަރުންކަމަށް ހަސަން ލަތީފް ވިދާޅުވެ ރޭގެ ބައްދަލުން މެދުކަނޑާލަންޖެހުނީ އެ ހުށަހެޅުމަށް ވޯޓަށް ވެސް ނޭހި އެވެ.
