ބޮމެއް ގޮއްވާލައި އަވަހާރަކޮށްލަން ދިން ހަމަލާގައި ލިބުނު އަނިޔާއަށް އިނގިރޭސި ވިލާތުން ފަރުވާ ހޯދަވަމުން ގެންދަވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވީހާވެސް އަވަހަކަށް ރާއްޖެ ވަޑައިގެންނެވުމަށް ބޭނުންފުޅުވާ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
ނަޝީދު އަވަހާރަކޮށްލަން ބޮމެއް ގޮއްވާލައި ދިން ހަމަލާއާ ގުޅިގެން ސަލާމަތީ ހިދުމަތްތަކާ ބެހޭ ކޮމިޓީން ކުރިއަށް ގެންދިޔަ އިންކުއަރީގެ ރެކޮމެންޑޭޝަންސްތަކަށް އަމަލުކުރަން ރާވާފައިވާ ގޮތް އެނގުމުން ނޫނީ އެމަނިކުފާނު ރާއްޖެ ވަޑައިގަތުމަކީ ރުހޭ ކަމެއް ނޫން ކަމަށް އެމްޑީޕީގެ ޗެއާޕާސަން ހަސަން ލަތީފް މިދިޔަ ހަފްތާގައި ވަނީ ވިދާޅުވެފަ އެވެ.
އެކަމަށް ޖަވާބު ދެއްވައި ނަޝީދު ވިދާޅުވެފައިވަނީ އެމްޑީޕީގެ ޗެއާޕާސަން ދެކިވަޑައިގަންނަވާ ގޮތް އެއީ އަބަދުވެސް އެމަނިކުފާން ވިސްނަވާނެ ކަމެއް ކަމަށެވެ. އަދި ސަރުކާރުން ވެސް އެމްޑީޕީ ދެކޭގޮތާ މެދު ވިސްނާނެ ކަމަށް ދެކެލައްވާ ކަމަށް ނަޝީދު ވިދާޅުވި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި, ރައީސް ބޭނުންފުޅުވަނީ ނަޝީދު ރާއްޖެ ވަޑައިނުގަންނަވަންތޯ ނޫސްވެރިއަކު ސުވާލު ކުރުމުން ވިދާޅުވީ ވީހާވެސް އަވަހަކަށް އެމަނިކުފާނު ރާއްޖެ ވަޑައިގެން އުޅުއްވަން ބޭނުންފުޅުވާ ކަމަށާއި އެކަމަށް ހުރަސް ނާޅުއްވާނެ ކަމަށެވެ.
އަޅުގަނޑު ބޭނުންވޭ ވީހާވެސް އަވަހަކަށް ރައީސް ނަޝީދު ފަރުވާއިން ސަލާމަތްވެ މިނިވަންކަމާއެކީގައި ހަމަޖެހިގެން ރާއްޖޭގައި އުޅެވޭތަން ފެނުން. އެއީ އަޅުގަނޑު އެދޭ އެދުމެއް،-- ރައީސް
ނަޝީދުގެ ރައްކާތެރިކަމަށް ކޮށްދެވެން ހުރި ހުރިހާ ކަމެއް ސަރުކާރުންނާއި ސިފައިން ކޮށްދެއްވާނެ ކަމަށް ވެސް ރައީސް ވިދާޅުވި އެވެ. ސަލާމަތީ ކަންކަން އިތުރަށް ރަނގަޅު ކުރުމަށް ހޯދަން ޖެހޭ ތަކެތި ހޯދައި ކުރަން ޖެހޭ ކަންކަން މިހާރު ވެސް ކުރައްވަމުން ގެންދަވާ ކަމަށް ރައީސް ވިދާޅުވި އެވެ.
އެ ހަމަލާއާ ގުޅިގެން ސަލާމަތީ ހިދުމަތްތަކާ ބެހޭ ކޮމިޓީން ކުރިއަށް ގެންދިޔަ އިންކުއަރީގައި ހަމަލާ ހިނގައިދިޔަ ގޮތާއި، އެކަމުގައި އިހުމާލުތަކެއްވެފައިވޭތޯ އާއި މިފަދަ ކަންކަން ތަކުރާރުވިޔަ ނުދިނުމަށްޓަކައި އެޅިދާނެ ފިޔަވަޅުތައް ތަފްސީލްކޮށް ހިމަނާފައިވެ އެވެ. އަދި ޖުމްލަ 45 ކަމެއް މުއައްސަސާތަކަށް ހުށަހަޅާފައިވެ އެވެ.
އޭގެ ތެރޭގައި މުއައްސަސާތަކުން ފާހަގަވި ކަންބޮޑުވުންތަކާއި އިންޓެލިޖެންސްއާ ގުޅޭ ގޮތުން އޮތް ނިޒާމީ ބާގަނޑުތަކާއި އެމްއެމްޑީއެފްގެ އެތެރޭގައި ހުރި ފުށުއެރުންތަކާއި ސަލާމަތީ ކަންކަން ފުރިހަމަނުވެ ހުރި ކަންކަން ހައްލުކުރަން ވެސް ލަފާތައް ދިނެވެ.
ސަރުކާރުން އެންމެ ފަހުން ބުނެފައި ވަނީ ހަމަލާގެ ރިޕޯޓުން ފާހަގަކޮށްފައިވާ ކަންކަން އިސްލާހުކުރަން އަޅަން ޖެހޭ ފިޔަވަޅުތައް އަޅަން ފަށާފައިވާ ކަމަށާއި މައްސަލަތައް ހައްލުކުރާނެ ކަމަށެވެ. ސަރުކާރުން އެކަށޭނަ މަސައްކަތެއް ނުކުރާ ކަމަށް ބުނެ އެމްޑީޕީގެ ބައެއް މެމްބަރުން ދަނީ ކަންބޮޑުވުން ފާޅު ކުރަމުންނެވެ.
ނަޝީދު މީގެ ކުރިން ވަނީ ރިޕޯޓުގައި ހުރި ކަންކަން ވީހާވެސް އަވަހަކަށް ތަންފީޒުކުރަން ގޮވާލައްވައިފަ އެވެ. އެކަމަށް ފަސްޖެހިވަޑައިގެންފި ނަމަ، ރައްޔިތުންނަށް ވެސް ބޮޑެތި ގެއްލުންތައް ވާނެ ކަމަށް އެމަނިކުފާނު ވިދާޅުވެފައިވެ އެވެ.
