ގައުމީ އެއާލައިން، މޯލްޑިވިއަންގެ މާލީ ހާލަތު ރަނގަޅު ކުރުމަށްޓަކައި ބޭރުގެ ފަރާތްތަކާއެކު ޖޮއިންޓް ވެންޗާއެއް ހެދުމުގެ މަސައްކަތް ކުރަމުން އަންނަ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ މޯލްޑިވިއަންއަކީ ކުރިންސުރެ ވެސް ގެއްލުމުގައި ހިންގަމުން އައި ކުންފުންޏެއް ކަމަށާއި ކޮވިޑްގެ ސަބަބުން އިތުރު ކަންތައްތައް ކުރިމަތިވި ކަމަށެވެ. އެކަންކަން ބަދަލުކޮށް އެ ކުންފުންޏަށް ފައިދާ ހޯދުމަށް މަސައްކަތް ކުރަމުން އަންނަ ކަމަށް ވިދާޅުވި އެވެ.
"އިންޓަނޭޝަނަލް ފްލައިޓްތަކުން ފައިދާ ލިބޭ ކަހަލަ ދިމާއަކަށް ދިއުމަށްޓަކައި އަޅުގަނޑު މިދެންނެވިހެން ބޭރުގެ ބައެއް ފަރާތްތަކާ އެކީގައި މިހާރު ވެސް ވާހަކަ ދެކެވެމުން އެބަދޭ. އަދި އޭގެ އިތުރުން ސީޕްލޭންގެ ހިދުމަތް އިތުރަށް ފުޅާކުރުމަށްޓަކައި އެއަށްވެސް އިތުރަށް އިންވެސްޓް ކުރެވިދާނެ ގޮތްތައް ހޯދައި އެކަން ކުރަމުން އެބަދަން،" ރައީސް ވިދާޅުވި އެވެ.
ރައީސް ވިދާޅުވީ ދައުލަތުން ސަބްސިޑީ ދޭގޮތަށް ހެޔޮއަގެއްގައި ދަތުރުފަތުރު ކުރުމަށް ރާއްޖޭގައި ގައުމީ އެއާލައިނެއް އޮތުން މުހިންމު ކަމަށެވެ.
މޯލްޑިވިއަންއަކީ ގައުމީ އެއާލައިން ކަމަށްވާތީ ލިބޭ ގެއްލުމަށް ނުބަލައި އެ ކުންފުނިން ކުރަން ޖެހޭ ކަންތައްތަކެއް ހުރެ އެވެ. އޭގެ ތެރޭގައި ތަރުހީބަށް ބެލުމެއް ނެތި ރާއްޖޭގެ ހުރިހާ އެއާޕޯޓަކަށް ދަތުރު ކުރުން ހިމެނެ އެވެ. އަދި ފްލައިޓް ޓިކެޓް ވެސް ވިއްކަނީ ޑިސްކައުންޓް ރޭޓެެއްގަ އެވެ.
