ރައްޔިތުންގެ މަޖިލީހުގެ މެޖޯރިޓީ އޮތީ އެމަނިކުފާނާ އެކީ ކަމަށާއި އެ މެޖޯރިޓީ ދަމަހައްޓަވާނެ ކަމަށް ވެސް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ސޯލިހު ވިދާޅުވީ ވެރިކަން ކުރާއިރު މަޖިލީހުގެ މެޖޯރިޓީ އޮތުމަކީ ވަރަށް މުހިންމު ކަމެއް ކަމަށެވެ. އެހެންވެ، އެ މެޖޯރިޓީ ދެމެހެއްޓުމަށް މަސައްކަތް ކުރައްވާ ކަމަށެވެ.
"އަޅުގަނޑު މިހުރީ މިވަގުތު އިރާދަކުރެއްވިއްޔާ ރައްޔިތުންގެ މަޖިލީހުގެ މެޖޯރިޓީއާ އެކީ،" ރައީސް ވިދާޅުވި އެވެ.
މަޖިލީހުގެ ތާރީހުގައި ވެސް އެއް ޕާޓީއަށް އެންމެ ގިނަ ގޮނޑި ލިބުނީ 2019 ގެ އިންތިހާބުގަ އެވެ. އެކި ދާއިރާތަކުން ވާދަކޮށް 65 ގޮނޑި އެމްޑީޕީން ކާމިޔާބުކޮށްފައިވެ އެވެ.
މަޖިލީހުގެ މެޖޯރިޓީ އެމަނިކުފާނުގެ އަތްޕުޅުގައި އޮތް ކަމަށް ރައީސް މި ވިދާޅުވީ އެމްޑީޕީގެ ޕާލަމެންޓްރީ ތެރޭގައި ދެ ފެކްޝަން އޮތް ކަން ފަޅާއަރާފައި ވަނިކޮށެވެ. ބައެއް މެމްބަރުން ކޮންޓްރޯލް ކުރައްވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. އަނެއް މެމްބަރުން ތިއްބެވީ ރައީސާ އެކުގައި ކަން މަޖިލީހުގެ ބައެއް ބިލްތަކާއި ގައުމީ މަޖިލީހުގެ ބައެއް މަސައްކަތްތަކުން ސާފެވެ.
އެމްޑީޕީގެ ޕާލަމެންޓްރީ ގްރޫޕްގައި ދެ ފެކްޝަން އޮތް ކަމަށް ތުހުމަތު ކުރިއަސް މީގެ ކުރިން އެމަނިކުފާނުގެ އަތްޕުޅުގައި މެޖޯރިޓީ އޮތް ކަމަކަށް ރައީސް ވިދާޅުވެފައެއް ނުވެ އެވެ.
ރައީސް ސޯލިހު މިއަދު ވިދާޅުވި ގޮތުގައި ރައްޔިތުންގެ މަޖިލީހުގެ މެޖޯރިޓީ ނެތި ވެރިކަން ކުރުމަކީ ވަރަށް އުނދަގޫ ކަމެކެވެ. އެހެންވެ، އެމަނިކުފާނުގެ ވެރިކަމުގައި ހުންނަވާއިރު މަޖިލީހުގެ މެޖޯރިޓީ ހޯދަން މަސައްކަތް ކުރައްވާނެ ކަމަށެވެ.
ކުރިން ވެސް ފެނިގެން ގޮސްފައިވަނީ މަޖިލީހުގެ މެޖޯރިޓީ ނެތި ސަރުކާރުތައް ހިންގަން އުނދަގޫވި ތަން ކަމަށް ރައީސް ވިދާޅުވި އެވެ. އެގޮތުން، ރައީސް މުހައްމަދު ނަޝީދުގެ ވެރިކަމުގެ ތިން އަހަރާއި ރައީސް އަބްދުﷲ ޔާމީންގެ ވެރިކަމުގެ ފަހުކޮޅު އެ އުނދަގޫތައް ސަރުކާރަށް ވަމުންދިޔަ މަންޒަރު ފެނުނު ކަމަށް ރައީސް ވިދާޅުވި އެވެ.
ރައީސް ވިދާޅުވި ގޮތުގައި މަޖިލީހުގެ މެޖޯރިޓީ ގެއްލިގެން ދިޔުމުން ރައީސް ޔާމީނަށް ސަރުކާރު ހިންގަން ހުރަސްތައް ކުރިމަތިވެ، ވަޑައިގަންނަވަން ޖެހުނީ އެހެން މަގަކުންނެވެ.
"އެހެންވެ އަޅުގަނޑު ވެރިކަމުގައި ހުންނައިރު މަޖިލީހުގެ މެޖޯރިޓީ ހޯދަން ބޭނުން، އެކަން އަޅުގަނޑު ކުރާނަން، މިއަދު މަޖިލީހުގެ މެޖޯރިޓީއާއެކީގައި މި ހުރީ،" ރައީސް ވިދާޅުވި އެވެ.
ރައީސް ސޯލިހު ވިދާޅުވި ގޮތުގައި، މި ސަރުކާރަށް ރައްޔިތުންނަށް އެހާ އޮމާންކޮށް ހިދުމަތްތައް ފޯރުކޮށްދެވެނީ ވެސް މަޖިލީހުގެ މެޖޯރިޓީ އޮތުމުންނެވެ.
ރައީސް ސޯލިހު މިއަދު ވަނީ ދެވަނަ ދައުރަކަށް ކުރިމަތިލެއްވުމާ ގުޅޭ ގޮތުން ވެސް ވާހަކަ ދައްކަވާފަ އެވެ. އެގޮތުން، 2023 ގައި އޮންނަ ރިޔާސީ އިންތިހާބުގައި ވާދަކުރައްވާނަންތޯ ކުރި ސުވާލަށް ޖަވާބު ދެއްވަމުން ވިދާޅުވީ ގާނޫނުއަސާސީގައި ބަޔާންކޮށްފައިވާ ގޮތަށް ދެވަނަ ދައުރަކަށް ފުރުސަތު އެމަނިކުފާނަށް ވެސް އެބައޮތް ކަމަށެވެ.
"އެ ފުރުސަތު އަޅުގަނޑަށް ވެސް ބަންދުވެފައެއް ނެތް،" އެ ސުވާލަށް ވަރަށް ކުރުކޮށް ޖަވާބު ދެއްވަމުން ރައީސް ވިދާޅުވި އެވެ.
ނަމަވެސް، ރައީސް ސޯލިހު މިއަދުވެސް ތަކުރާރުކުރެއްވީ ކުރިން ވެސް ވިދާޅުވާ ވާހަކަފުޅެވެ.
އެގޮތުން، ދެވަނަ ދައުރަކާ މެދު ވިސްނުމަށްވުރެ އެމަނިކުފާނުގެ ވިސްނުންފުޅުހުރީ ރިޔާސީ ވައުދުތައް ފުއްދެވުމަށް ކަމަށް ވިދާޅުވި އެވެ.
ކޮވިޑުގެ ސަބަބުން ދޮޅު އަހަރެއްހާ ދުވަސް ގެއްލިގެން ގޮސްފައިވާކަން ފާހަގަކުރައްވަމުން، ރައީސް ވިދާޅުވީ ފެނާއި ނަރުދަމާ އާއި ތިލަފުށި ބުރިޖުގެ އިތުރުން ބޯހިޔާވަހިކަމުގެ މައްސަލަތައް ހައްލުކުރުމުގެ މަސައްކަތްތައް ބާރަށް ކުރިއަށް ގެންދަންޖެހޭކަމަށް ރައީސް ވިދާޅުވި އެވެ.
ރައީސް ސޯލިހު އެގޮތަށް ވިދާޅުވެފައިވާއިރު، އަންނަ ރިޔާސީ އިންތިހާބަށް ބާއްވާ އެމްޑީޕީގެ ޕްރައިމަރީގައި ވާދަކުރައްވާނެ ކަމަށް އެމްޑީޕީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ވެސް ވަނީ އިއުލާނުކުރައްވައިފަ އެވެ.
