ޕެރިސް (އޮގަސްޓް 11) - ޕީއެސްޖީއާ އެކު ޗެމްޕިއަންސް ލީގު ކާމިޔާބު ކުރެވޭނެ ކަމަށް އެ ޓީމާ ދާދި ފަހުން ގުޅުނު މަޝްހޫރު ފުޓްބޯޅަ ތަރި ލިއޮނަލް މެސީ ބުނެފި އެވެ.
ބާސެލޯނާ ދޫކޮށް ހިލޭ ޓްރާންސްފާއެއްގައި ޕީއެސްޖީ އަށް ބަދަލުވި މެސީ ވަނީ ރަސްމީކޮށް ޕީއެސްޖީ ކުޅުންތެރިއެއްގެ ގޮތުގައި މިއަދު މީޑިއާ އަށް ތައާރަފްކޮށްފަ އެވެ.
މެސީ ވަނީ އޭނާގެ ކެރިއަރުގައި ބާސެލޯނާއާ އެކު ހަތަރު ޗެމްޕިއަންސް ލީގު ކާމިޔާބުކޮށްފަ އެވެ. އެންމެ ފަހުން ދެ ސީޒަނުގައި ވެސް ބާސެލޯނާ އެކު ޗެމްޕިއަންސް ލީގަށް ޓާގެޓްކުރި ނަމަވެސް އެކަމެއް ނުވި އެވެ. މިދިޔަ ސީޒަނުގައި ބާސެލޯނާ ކެޓީ ޕީއެސްޖީ އަތުންނެވެ.
ޕީއެސްޖީން މިއަދު ބޭއްވި ޕްރެސްގައި ނޫސްވެރިއެއްގެ ސުވާލަށް ޖަވާބު ދެމުން މެސީ ބުނީ ކުޅުންތެރިންގެ ފެންވަރަށް ބަލާއިރު ޕީއެސްޖީ އަށް ޗެމްޕިއަންސް ލީގު ހޯދޭނެ ކަމަށެވެ. އަދި އެ މަސައްކަތުގައި އެހީވެދޭން އޭނާ ތައްޔާރަށް ހުރި ކަމަށް މެސީ ވަނީ ބުނެފަ އެވެ.
"އަހަރެންގެ އުއްމީދަކީ އަދި ހުވަފެނަކީ އަދި އެއް ފަަހަރު ޗެމްޕިއަންސް ލީގެއް ކާމިޔާބު ކުރުން. އަހަރެން ދެކޭ ގޮތުގައި އަހަރެން މި ހުރީ އެކަން ކުރަން އެންމެ ރަނގަޅު ޓީމުގައި. މި ޓީމުގެ ފެންވަރަށް ބަލާއިރު އެއީ ނުކުރެވޭނެ ކަމެއް ނޫން. އަހަރެން މި ހުރީ އެ ކާމިޔާބީ ހޯދަން ތައްޔާރަށް،" މެސީ ބުންޏެވެ.
ޕީއެސްޖީން ބޮޑު އިންވެސްޓްމަންޓްތަކެއް ކޮށް މިހާތަނަށް ހާސިލްނުވެ އޮތް ކަމަކީ ޗެމްޕިއަންސް ލީގެއް ހޯދުމެވެ. އެ ޓީމުން ވަނީ ދުނިޔޭގެ ރެކޯޑް އަގުގައި 2017 ވަނަ އަހަރު ބާސެލޯނާ އިން ނޭމާ ވެސް ގެނެސްފަ އެވެ. އޭގެ ފަހުން މިދިޔަ އަހަރު ފައިނަލުގައި ޕީއެސްޖީ ވަނީ ބަޔާން މިއުނިކް އަތުން ބަލިވެފަ އެވެ. މި ދިޔަ ސީޒަނުގައި ޕީއެސްޖީ ސެމީގައި ބަލިވީ މެންޗެސްޓާ ސިޓީ އަތުންނެވެ.
އުމުރުން 13 އަހަރުގައި ބާސެލޯނާއާ ގުޅުމަށް ފަހު މެސީ އެ ޓީމުގައި 21 އަހަރު ހޭދަކުރި އެވެ. ބާސެލޯނާގެ ވަދާއީ ނޫސްވެރިންގެ ބައްދަލުވުމުގައި އެ ޓީމު ދޫކޮށްލަން ޖެހޭތީ މެސީ ވަރަށް ބޮޑަށް ރުޔެވެ. މެސީ ބުނީ ބާސެލޯނާ ދޫކޮށްލަން ޖެހުނު ގޮތުގެ ވާހަކަ ދައްކަން އޭނާ އަށް އުނދަގޫ ކަމަށާއި އެ ޓީމާ ދެކޮޅަށް ޗެމްޕިއަންސް ލީގުގައި ކުޅެން ޖެހިއްޖެނަމަ ފަސޭހަ ވެސް ނުވާނެ ކަމަށެވެ.
"ބާސެލޯނާ އަކީ އަހަރެންގެ ގެ. އަހަރެން ކުޑައިރުއްސުރެ އުޅެ ބޮޑުވީ އެ ތަނުގައި. އެ ޓީމާ ދެކޮޅަށް އެހެން ކްލަބެއްގެ ޖޯޒީގައި ކޭމްޕް ނޯގައި ކުޅުން އެއީ އަހަންނަށް ވަރަށް އުނދަގޫ ކަމަކަށް ވާނެ. އަހަންނަށް ނޭނގެ އަހަރެމެންގެ ދެ ޓީމު ކުޅެން ޖެހޭނެ ކަމެއް. އެކަމަކު އަލުން ބާސެލޯނާ އަށް ދިއުން އެއީ ރަނގަޅު ވަގުތުތަކަކަށް ވާނެ،" މެސީ ބުންޏެވެ.
ފްރާންސްގެ ފުޓްބޯޅަ ސީޒަން ފެށިގެން މިހާރު ކުރިއަށްދާއިރު، މެސީ ބުނީ ވީ އެންމެ އަވަަހަށް ޓީމުގެ ފަރިތަކުރުންތަކުގައި ބައިވެރިވެ، ދަނޑު މައްޗަށް އަރައި މެޗެއް ކުޅެލަން ވަރަށް ބޭނުންވެފައި ހުރި ކަމަށެވެ.
ޕީއެސްޖީގެ ރައީސް ނާސިރު އެލް ހެއްލާފީ (ކ) އާއި މެސީ.-- ފޮޓޯ: އޭއެފްޕީ
ޕީއެސްޖީން މެސީގެ ސޮއި ހޯދީ ފައިނޭންޝިއަލް ފެއާޕްލޭ (އެފްއެފްޕީ) ގަވައިދުތަކާ ހިލާފުނުވެތޯ ކަށަވަރުކުރަން ސްޕެއިނުގެ ވަކީލުންގެ ޓީމަކުން ޔުއެފާ އަށް މައްސަލައެއް ހުށަހަޅަން ތައްޔާރުވަމުން އަންނަ ކަމަށް މީޑިއާތަކުން ވަނީ ރިޕޯޓްކޮށްފަ އެވެ. އެކަމާ ބެހޭގޮތުން ޕީއެސްޖީގެ ރައީސް ނާސިރު އެލް ހެއްލާފީ ވިދާޅުވީ ޕީއެސްޖީގެ މާލީ ކަންތައްތައް ވަރަށް ރަނގަޅަށް ބެލި ކަމަށާއި މެސީ ގެނައީ ގަވާއިދުގެ ތެރެއިން އެކަމަށް ފުރުސަތު އޮތުމުން ކަމަށެވެ.
"ތި މީހުން. މީޑިއާ އިން ފޯކަސް ކުރަންވީ ހުރިހާ ނެގެޓިވް ކަމަކަށް ނޫން. ވިސްނަންވީ ޕޮޒިޓިވްކޮށް މެސީގެ ފަރާތުން މި ކްލަބަށް ލިބެނީ ކޮންފައިދާތަކެއްތޯ،" ހެއްލާފީ ވިދާޅުވި އެވެ.
ދުނިޔޭގެ މޮޅު ކުޅުންތެރިޔާގެ މަގާމު ހަ ފަހަރެއްގެ މަތިން ހޯދާފައިވާ މެސީ ޕީއެސްޖީ އަށް ބަދަލުވީ ދެ އަހަރުގެ ކޮންޓްރެކްޓެއްގަ އެވެ. މެސީ އަށް ޕީއެސްޖީން އަހަރަކު މުސާރައިގެ ގޮތުގައި 35 މިލިއަން ޑޮލަރު ލިބޭނެ އެވެ. ސޮއިކުރިއިރު ވެސް ބޯނަހެއްގެ ގޮތުގައި މެސީ އަށް 35 މިލިއަން ޑޮލަރު ދިނެވެ. އެ ކޮންޓްރެކްޓްގައިވާ ގޮތުން ޕީއެސްޖީން ބޭނުންނަމަ އިތުރު އެއް އަހަރަށް މެސީގެ ކޮންޓްރެކްޓް އާ ކުރުމުގެ ފުރުސަތު ވެސް އޮންނާނެ އެވެ.
ފްރާންސްގެ މީޑިއާ ރިޕޯޓްތައް ބުނާގޮތުގައި މެސީގެ ފިޓްނަސް ކަންކަން ބެލުމަށް ފަހު ހޮނިހިރު ދުވަހު ޕީއެސްޖީން ފްރެންްޗް ލީގުގައި ސްޓްރަސްބޯއާ ދެކޮޅަށް ކުޅޭ މެޗުގައި މެސީ ބޭނުންކޮށްފާނެ އެވެ. އެހެން ނޫންނަމަ ޕީއެސްޖީ ޖޯޒީގައި މެސީ ކުޅޭ ފުރަތަމަ މެޗަކަށް ވެގެންދާނީ މި މަހު 20 ވަނަ ދުވަހު ބްރެސްޓާ ދެކޮޅަށް ފްރެންޗް ލީގުގައި ކުޅޭ މެޗަށެވެ.
