ލަންޑަން (އޮގަސްޓް 10) - ޗެލްސީން ބެލްޖިއަމްގެ ފޯވާޑް ރޮމެލޫ ލުކާކޫގެ ސޮއި ހޯދުމާ ގާތަށް ޖެހިލާފައިވާއިރު، މި ޑީލް ކުރިއަށް ދިއުމާ އެކު ދުނިޔޭގެ އެންމެ އަގުބޮޑު ކުޅުންތެރިއަކަށް ލުކާކޫ ވާނެ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 28 އަހަރުގެ ލުކާކޫ ޗެލްސީ އަށް ބަދަލުވާން މެޑިކަލް ފުރިހަމަ ކޮށްފައިވާއިރު، އޭނާ އެ ކްލަބްގެ ކޮންޓްރެކްޓްގައި ކުރިއަށް އޮތް 24 ގަޑިއިރު ތެރޭގައި ސޮއިކުރާނެ އެވެ. ޗެލްސީން ލުކާކޫގެ ސޮއި ހޯދަނީ 98 މިލިއަން ޕައުންޑް (135 މިލިއަން ޑޮލަރު) އަށެވެ. މި އަގުގައި މި ޑީލް ހިނގައިފިނަމަ ލުކާކޫ އަކީ ޖުމްލަ ޓްރާންސްފާ ފީތަކަށް ބަލާއިރު ދުނިޔޭގެ އެންމެ އަގުބޮޑު ކުޅުންތެރިޔާ އެވެ.
ލުކާކޫ އެންމެ ފުރަތަމަ ބެލްޖިއަމްގެ އެންޑަލެކްޓް ދޫކޮށް ޗެލްސީ އަށް 2011 ވަނަ އަހަރު ބަދަލުވީ 17 މިލިއަން ޕައުންޑް (23 މިލިއަން ޑޮލަރު) އަށެވެ. އޭގެ ފަހުން ލުކާކޫ އެވަޓަން އަށް ދާއިމީ އެއްބަސްވުމެއްގެ ދަށުން 2014 ވަނަ އަހަރު ބަދަލުވީ 28 މިލިއަން ޕައުންޑް (38 މިލިއަން ޑޮލަރު) އަށެވެ.
ލުކާކޫގެ ތިން ވަނަ ޓްރާންސްފާ އަކީ މެންޗެސްޓާ ޔުނައިޓެޑަށް 2017 ވަނަ އަހަރު ބަދަލުވުމެވެ. ޔުނައިޓެޑުން ވަނީ ލުކާކޫ ގަންނަން 75 މިލިއަން ޕައުންޑް (103 މިލިއަން ޑޮލަރު) ދައްކައިފަ އެވެ. އިންޓަ މިލާނުން 2019 ވަނަ އަހަރު ލުކާކޫ ގަތީ 73 މިލިއަން ޕައުންޑް (101 މިލިއަން ޑޮލަރު) އަށެވެ.
މި ހުރިހާ ޓްރާންސްފާ ފީތަކަށް ބަލާއިރު ލުކާކޫގެ ޖުމްލަ އަގަކީ 291 މިލިއަން ޕައުންޑް (403 މިލިއަން ޑޮލަރު) އެވެ.
މީގެ ކުރިން ޖުމްލަ ޓްރާންސްފާ ފީތަކަށް ބަލާއިރު އެންމެ އަގުބޮޑު ކުޅުންތެރިއަކީ ނޭމާ އެެވެ. ނޭމާ އެންމެ ފުރަތަމަ ބްރެޒިލްގެ ސަންޓޯސް ދޫކޮށް ބާސެލޯނާ އަށް 2013 ވަނަ އަހަރު ބަދަލުވީ 72 މިލިއަން ޕައުންޑް (100 މިލިއަން ޑޮލަރު) އަށެވެ. އަދި ޕީއެސްޖީން 2017 ވަނަ އަހަރު ނޭމާ ގަތީ 198 މިިލިއަން ޕައުންޑް (274 މިލިއަން ޑޮލަރު) ބާސެލޯނާ އަށް ދީފަ އެވެ. މިއާ އެކު ނޭމާގެ ޓްރާންސްފާ ފީތަކުގެ ޖުމްލަ އަދަދަކީ 270 މިލިއަން ޕައުންޑް (374 މިލިއަން ޑޮލަރު) އެެވެ.
ދެން މި ލިސްޓުގެ ގަދަ ފަހެއްގެ މަގާމުތަކުގައި ހިމެނެނީ ކްރިސްޓިއާނޯ ރޮނާލްޑޯ، އެޑެން ހަޒާޑް އަދި އަލްވާރޯ މޮރާޓާ އެވެ.
ސްޕޯޓިން ލިޒްބަން، މެންޗެސްޓާ ޔުނައިޓެޑް، ރެއާލް މެޑްރިޑުން ކުރިން ފެނުނު އަދި މިހާރު ޔުވެންޓަސްގައި ހުރި ރޮނާލްޑޯގެ ޖުމްލަ އަގަކީ 192 މިލިއަން ޕައުންޑް (266 މިލިއަން ޑޮލަރު) އެވެ. ކުރިން ލިލް އާއި ޗެލްސީ އަށް ކުޅުމަށް ފަހު ރެއާލް މެޑްރިޑަށް ކުޅޭ ހަޒާޑްގެ ޖުމްލަ އަގަކީ 175 މިލިއަން ޕައުންޑް (242 މިލިއަން ޑޮލަރު) އެވެ. އަދި ރެއާލް މެޑްރިޑާއި ޗެލްސީ އަދި އެތުލެޓިކޯ މެޑްރިޑް އަށް ކުޅުމަށް ފަހު މި ވަގުތު ޔުވެންޓަސްގައި ހުރި މޮރާޓާގެ ޖުމްލަ އަގަކީ 166 މިިލިއަން ޕައުންޑް (230 މިލިއަން ޑޮލަރު) އެވެ.
