ކާރުން ފޭބިއިރު ވެސް އާދެވުނީ އޭނާ ދާން އުޅޭ މަންޒިލަށް ނޫންކަމުގެ އިހުސާސް މުހައްމަދު މާޒިންއަށް ކުރެވުނެވެ. އަދި ކާރުން ފޭބުމާއެކު އޭނާގެ އިހްސާސްތައް ޔަގީނަށްވެއްޖެ އެވެ.
ލޯފަން މީހަކަށްވީތީ ޓެކްސީތަކުގެ ޑްރައިވަރުން އޭނައަށް ވަރަށް ރަނގަޅެވެ. ދަތުރުގެ އަގު ނަގަނީ ވެސް މަދު ފަހަރަކު އެވެ. ވަރަށް ގިނައިން ޑިސްކައުންޓު ދެ އެވެ. އެހެންވެ، ލޯފަން މީހެއް ވީމާ، މިވެނި ތަނަކަށް ލައިދޭށޭ ބުނީމަ، ކާރުގަ ބުރު ޖަހާފަ، މަގުމައްޗަށް ދޫކޮށްލަފާނެ ކަމަށް މާޒިންގެ ހިތަށް ވެސް ނާރަ އެވެ.
"އާންމުކޮށް ޓެކްސީ ޑްރައިވަރުން ވަރަށް ހެޔޮ ހަމަ. ޑްރައިވަރުންގެ 90 ޕަސެންޓް މީހުން ހަމަ ފައިސާ ވެސް ނުނަގާނެ ނޫން ނަމަ ވަރަށް ޑިސްކައުންޓު ދޭނެ. އަލަށް މިއީ އުމުރުގަ ވެސް މިފަދަ ކަމެއް ދިމާވި،" މާޒިން، 35، ބުންޏެވެ.
މާޒިންއަކީ ދުވުންތެރިޔެކެވެ. ޕެރައެތުލީޓަކު ރާއްޖެއަށް ފުރަތަމަ ހޯދައިދިން މެޑަލް، 2019 ވަނަ އަހަރުގެ އިންޑިއަން އޯޝަން އައިލެންޑް ގޭމްސްއިން ރާއްޖެއަށް ހޯދައިދިނީ މާޒިން އެވެ. މިހާރު މާޒިންގެ އަމާޒު ހުރީ ޓޯކިޔޯގައި މި ހިނގަމުންދާ އޯގަސްޓް 24، ގައި ފަށާ ޕެރަލިމްޕިކްސްގައި ވާދަ ކުރުމަށެވެ.
"ގޯލްއަކީ މެޑަލް ހޯދުން. ވަރަށް ހާޑުވާނެ. ވަރަށް ބައިވަރު ގައުމުތަކުން ދާނެ. އެކަމަކު އުއްމީދު ކުރެވޭ ރަނގަޅު ފައިޓެއް ދެވޭނެ ކަމުގެ. ހީވަނީ ރަނގަޅުވާނެ،" މާޒިން ބުންޏެވެ.
ބުރާސްފަތި ދުވަހުގެ ހާދިސާ ހިނގިއިރު ވެސް މާޒިން ދާން އުޅުނީ ދުވަން ޕްރެކްޓިސްކުރުމަށެވެ. އެ ދުވަހުގެ ފަތިހު ކުރީގެ ވެސްޓް ޕާކު ކައިރިން އަވަސް ރައިޑް އިން ކާރު ނެގުމަށްފަހު މަންޒިލަކަށް ޕިން ކޮށްފައި އިނީ ހުޅުމާލެ ދުވާ ޓްރެކެވެ. އަދި ކާރަށް އެރުމަށްފަހު ވެސް ދާންވީ ތަން ޑްރައިވަރު ކައިރި ބުންޏެވެ. އަދި އޭނާއަކީ ލޯފަން މީހެއް ކަމަށް ވެސް މާޒިން ޑްރައިވަރު ކައިރި ބުންޏެވެ.
"އަޅުގަނޑު ދަތުރު ކުރާއިރު އަބަދުވެސް ޓެކްސީ ޑްރައިވަރު ކައިރި ބުނަން އަޅުގަނޑަކީ ލޯފަން ކުއްޖެކޭ އެހެންވީމަ ދާ ތަނަށް ގޮސްފަ އަޅުގަނޑު ކައިރި ބުނަލައްޗޭ، އެތަނުގައި ހުންނާނެއޭ ރިސީވް ކުރަން މީހަކު. ހުއްޓޭއިރު ފަހަރަށް އަޅުގަނޑަށް ނޭނގިދާނެއޭ ފައިބަން،" މާޒިން ކިޔައިދިނެވެ. "ދެން އެހެން ބުނީމަ އާނއެކޭ ބުނީ. ދެން އަޅުގަނޑު ކޯޗަށް ގުޅާފަ ބުނެފިން ބްރިޖަށް އަރަނީއޭ ނައްޓާލާށޭ އެކޮޅަށް. އެހެން ބުނާ އަޑު ވެސް އިވޭނެތާ ޑްރައިވަރަށް."
ލޮލަށް ނުފެނުން ނަމަވެސް ކާރުގައި ދަތުރު ކުރާއިރު މި ދަނީ ކޮން މަގަކުންކަން މާޒިންއަށް ދަނެގަނެވެ އެވެ. ނަމަވެސް މިފަހަރު އެހެނެއްނުވި އެވެ.
"އާންމުކޮށް ކާރު އެއްޗެހީގަ ދާއިރު ނަގައިގަނެވޭނެ ރޫޓް. އެކަމަކު އެ ކޯލް ކުރީމަ ނޭނގުނު، ބޭއްވިއިރު، ރޫޓް ގެއްލިފަ އިނީ. ކޮން މަގަކުންކަން ދަނީ ވެސް ނޭނގުނު. ފަސް ވަރަކަށް މިނެޓު ވެސް ނުވާނެ ޑްރައިވަރު ބުނެފި ފައިބާށޭ. ދެން ކާރު ހުއްޓާފަ އޭނަ ވެސް ފައިބައިފި. އަޅުގަނޑު ހީކުރީ ކާރަށް ކޮންމެވެސް ކަމެއްވީމަ އޭނަ ބަލާލަން ފޭބީ ކަމަށް،" އޭނާ ބުންޏެވެ.
އެކަމަކު މާޒިން ހީކުރުން ރަނގަޅެއް ނޫނެވެ. ޑްރައިވަރު ކާރުން މުޅިން އެހެން މަގްސަދެއްގަ އެވެ.
"އޭނާ [ޑްރައިވަރު] އައިސްފަ ފަހަތު ސީޓު ދޮރު ހުޅުވާފަ ބުނެފި ފައިބާށޭ، މި އާދެވުނީއޭ. ބުނީމަ އަޅުގަނޑު ބުނެފިން ހާދަ އަވަހަށޭ މި އާދެވުނީ. މިއީ ހުޅުމާލޭ ޓްރެކްހޭ ހަމަ އެހީމަ ވެސް ބުނީ އާ މިއީ ހުޅުމާލޭ ޓްރެކޭ،" މާޒިން އެ ވާހަކަ ކިޔައިދިނެވެ.
ޓްރެކަކީ މާޒިންއަށް އާ ތަނެއް ނޫނެވެ. ހުޅުމާލެ އަދި މާލޭ ޓްރެކް އޭނާއަށް މިހާރު ހިތުދަހެވެ.
"ފޭބިއިރަށް ހަމަ އިހްސާސްވެއްޖެ އެއީ ހުޅުމާލެ ޓްރެކް ނޫންކަން. އާންމުކޮށް ދަންވިއްޔަ ހުޅުމާލެ ޓްރެކަށާ މާލެ ޓްރެކަށާ. އެހެންވީމަ ނުފެނުނަސް މާހައުލުން އެނގޭނެ. އެގޮތަށް ފީލްވި މިއީ ހުޅުމާލެ ނޫންކަން. ބޫޓުން ބިން މަތީ ކާތާލީމަ ވެސް އެނގިއްޖެ މިއީ ތާރު ނޫންކަން،" އޭނާ ބުންޏެވެ.
ކާރު ޑްރައިވަރު ކައިރިން ދެން ވެސް ފެނުނީ ވަރަށް ހުތުރު ކަމެކެވެ. މާޒިންގެ އަތުގަ ހިފާ ގެންގޮސް، އޭނާ ކިޔާ އެއްޗަކަށް ނުބަލާ ކާރަށް އަރައިގެން ދިޔައީ އެވެ.
"ދެން އޭނަ އުޅަނބޮށި ކޮޅުގަ ހިފާފަ ދަމަމުން ކަހަލަ ގޮތަކަށް ގެންގޮސްފަ ބުނީ މި ހޮޅިދަނޑި ކައިރި ހުންނާށޭ އަދި މިތަނުގައި މީހަކު ނެތޭ. އަޅުގަނޑު ބުނިން މިއީ ހުޅުމާލެއެއް ނޫނެއްނޫންހޭ، ބުނީމަ ވެސް އޭނަ އަޑެއް ނާހާ ނައްޓާލައިގެން ގޮސްފި،" މާޒިން ބުންޏެވެ.
ޓެކްސީ ޑްރައިވަރު މާޒިން ބޭލީ މާލޭ ދުވާ ޓްރެކް ސަރަހައްދަށެވެ. މާޒިން އެތަނުގައި ހުއްޓާ އޭނާ ބަލާ އައީ ދުވާ ގައިޑެވެ. އަދި އޭނާ އައިސް ޑްރައިވަރަށް ގުޅުމުން މައާފަށް އެދި ހުޅުމާލެއަށް މާޒިން ގެންގޮސްދޭން އެދުނު ކަމަށް މާޒިން ބުންޏެވެ. މިފަދަ ދެރަ ގޮތެއް މީހަކަށް ހަދަންޖެހުނު ސަބަބެއް މާޒިންއަކަށް ނުވިސްނެ އެވެ. އަދި އެފަދަ ކަމެއް ދެ ވަނަ މީހަކަށް ދިމާވާން ވެސް މާޒިން ނޭދެ އެވެ.
"އަޅުގަނޑު މި އުޅެނީ މި މައްސަލަ ފުލުހުންނަށް ހުށަހަޅަން. އަޅުގަނޑު ބޭނުމެއް ނޫން އެހެން މީހަކަށް މިފަދަ ކަމެއް ދިމާވާކަށް،" ނިންމާލަމުން މާޒިން ބުންޏެވެ.
