އިންޑިއާގެ ކޮޗިންއާ ކުޅުދުއްފުއްޓާ ދެމެދު ދަތުރުކުރާ މުދާ ފެރީގައި ސްރީ ލަންކާއިން މުދާ ގެނެވޭ ގޮތް ހަމަޖެހިއްޖެ ކަމަށް މޯލްޑިވްސް ސްޓޭޓް ޝިޕިން (އެމްއެސްއެސް) އިން މިއަދު ބުނެފި އެވެ.
މި މުދާ ފެރީ ކުރިން ދަތުރުކުރީ ކޮޗިން-ކުޅުދުއްފުށި-މާލެ ރޫޓުގަ އެވެ. މި ބަދަލާއެކު މިއަދުން ފެށިގެން މި ބޯޓުގެ ރޫޓުގެ ތެރެއަށް ލަންކާގެ ކޮލަމްބޯ ވަދެގެން ދާނެ އެވެ.
އެމްއެސްއެސް އިން ބުނީ ކޮލަމްބޯ ބަނދަރުން ރާއްޖެއަށް މި ބޯޓުގައި މުދާ ގެނެވޭ ގޮތް ހަމަޖެހުމުގެ ސަބަބުން އެސްޓީއޯއަށާއި ވިޔަފާރިވެރިންނަށް ފަސޭހަތަކެއް ލިބޭނެ ކަމަށެވެ. އަދި މީގެ ސަބަބުން ބައިނަލްއަގްވާމީ ސަޕްލައި ޗޭނަށް އައިސްފައިވާ ލޮޅުމުގެ ސަބަބުން މުދާ ގެންނަން ހުރި ދަތިތަކަށް، ކޮންމެވެސް ވަރެއްގެ ލުޔެއް ލިބޭނެ ކަމަށް ބުންޏެވެ.
މި ދަތުރުތަކުގައި އެމްއެސްއެސްއިން ބޭނުންކުރަނީ އިންޑިއާ ސަރުކާރުން ފޯރުކޮށްދިން އެމްސީޕީ ލިންޒް ބޯޓެވެ. މިއީ ދިގުމިނުގައި 117 މީޓަރު ހުންނަ 380 ކޮންޓެއިނަރާއި 3000 މެޓްރިކް ޓަނުގެ ބްރޭކް ބަލްކް ކާގޯ ކެޕޭސިޓީ އުފުލޭ ވަރުގެ އާގު ބޯޓެކެވެ.
