އައްޑޫ އިކުއެޓޯރިއަލް ސަރަހައްދުން ދޫކޮށްފައިވާ 35 ގޯއްޗެއް, އެ ގޯތިތަކުގެ ވެރިންގެ ރުހުމެއް ނެތި އަތުލި މައްސަލަ ބޮޑުވެ ކޯޓަށް ހުށަހަޅާފައި ވަނިކޮށް ކައުންސިލުން ދޫދިނުމެއް ނެތި ވަރުގަދަ އިންޒާރެއް ދީފި އެވެ.
ކައުންސިލުން މިއަދު ކުރި އިއުލާނެއްގައި ބުނީ ގޯތިތައް ދޫކޮށްލަން ދެކޮޅު ހަދާ މީހުންގެ މައްސަލަ ކޯޓަށް ހުށަހަޅަން ނިންމާފައިވާ ކަމަށެވެ.
މި ޖުލައި 15، ގައި ގޯތިތަކުގެ ވެރިންނަށް ކައުންސިލުން ފޮނުވި ސިޓީއެއްގައި ބުނެފައި ވަނީ އިކުއެޓޯރިއަލް ހޮސްޕިޓަލުގެ ޖާގަ ބޮޑު ކުރުމަށް ބޭނުންވާތީ އެ ސަރަހައްދުން ދީފައިވާ 3000 އަކަފޫޓުގެ ގޯތި ހަމަ އެވަރުގެ އެހެން ގޯއްޗަކާ ބަދަލުކޮށްފައިވާ ކަމަށެވެ.
އައްޑޫ ކައުންސިލުގެ ނިންމުމަށް ވަރަށް ބޮޑަށް ފާޑުކިޔުން އަމާޒުވެފައި އޮއްވާ އެ ކައުންސިލުން މިއަދު ނެރެފައިވާ އިއުލާނެއްގައި އެދިފައި ވަނީ ގޯތި ބަދަލު ކުރުމަށް އިއުތިރާޒް ކުރާ މީހުން އެކަން އެންގުމަށެވެ. އަދި އެގޮތަށް އެންގި ނަމަވެސް ގޯތި އަތުލުމަށް މައްސަލަ ކޯޓަށް ހުށަހަޅާނެ ކަމަށް ކައުންސިލުން ބުނެފައިވެ އެވެ.
"ކައުންސިލްގެ ނިންމުމާ އެއްގޮތަށް ގޯތި ބަދަލުކުރުމަށް އިއުތިރާޒްކުރާ ފަރާތްތަކުގެ ގޯތިތައް ބަދަލުކުރުމުގެ މައްސަލަ ގާނޫނުގައިވާ ގޮތުގެމަތިން ޝަރީއަތަށް ހުށަހެޅޭނެ،" އިއުލާނުގައި ބުނެފައިވެ އެވެ.
ގޯތިތައް ދައުލަތަށް ނަގާފައިވާ ކަމަށް ބުނެ ފޮނުވި ސިޓީގައި ކައުންސިލުން ބުނެފައި ވަނީ ގޯތި ނަގަނީ ހުރިހާ ރައްޔިތުންގެ ލާބައަށްޓަކައި ކަމަށެވެ.
"މިގޮތަށް ކައުންސިލުން ބަދަލު ކުރުމަށް ނިންމެވީ އައްޑޫ އިކުއެޓޯރިއަލް ހޮސްޕިޓަލް ހިމެނޭ ސަރަހައްދަކީ އައްޑޫގެ އިގްތިސާދާ ގުޅުން ހުރި ކަންކަން މުސްތަގްބަލުގައި ފުޅާ ދާއިރާއެއްގައި ހިންގާނެ ސަރަހައްދެއް ކަމުގައިވާތީ އާއި ހޮސްޕިޓަލުގެ ބޭނުމަށް މި ސަރަހައްދުން އިތުރަށް ބިން ބޭނުންވާތީ އަދި މި ސަރަހައްދު ގުޅިފައި ވަނީ އައްޑޫގެ އެންމެހާ ރައްޔިތުންގެ މަސްލަހަތާ ކަމުގައިވާތީ،" އެ ސިޓީތަކުގައި ބުނެފައިވެ އެވެ.
ނަމަވެސް ބައެއް ގާނޫނީ މާހިރުން ވިދާޅުވަނީ ވެރިމީހާގެ ރުހުމެއް ނެތި އެގޮތަށް ބިމެއް އަތުލުމަކީ ގާނޫނީ ވަރަށް ބޮޑު ކުށެއް ކަމަށެވެ. އެގޮތުން، ގާނޫނީ އެހީ ހިލޭ ފޯރުކޮށްދޭ ޕަބްލިކް އިންޓްރެސްޓް ލޯ ފާމްގެ ރައީސް މަރިޔަމް ޝުނާނާ ވިދާޅުވީ އައްޑޫ ސިޓީ ކައުންސިލުން ފޮނުވި ސިޓީތައް ގާނޫނު އަސާސީގެ 16 ވަނަ މާއްދާ އާއި 40 ވަނަ މާއްދާއާ ހިލާފު ކަމަށެވެ.
"މީހެއްގެ ރުހުން ނެތި މީހެއްގެ މުދަލެއް ދައުލަތަށް ނެގޭނީ އަދި މުއާމަލާތް ކުރުން ހުއްޓުވޭނީ ހަމައެކަނި ކޯޓަކުން ކުރާ ހުކުމަކުން،" ސޯޝަލް މީޑިއާގައި ޝުނާނާ ލިޔުއްވާފައިވެ އެވެ. "ސިޓީއެއް ފޮނުވައިގެން މީހެއްގެ ރުހުން ނެތި އެމީހެއްގެ މުދަލެއް ދައުލަތަށް ނުވެސް ނެގޭނެ އަދި މުއާމަލާތް ކުރުން ވެސް ނުހުއްޓުވޭނެ."
ގާނޫނު އަސާސީގެ 40 ވަނަ މާއްދާގައި ބުނެފައި ވަނީ "މީސްމީހުންގެ ގޯއްޗަކީ ނިގުޅައިގަނެވިގެންވާނެ ތަކެއްޗެއް ނޫން" ކަމަށެވެ. އަދި ބުނެފައި ވަނީ އާންމުވެގެންވާ މަންފާއަކަށްޓަކައި ނަމަވެސް ގާނޫނުގައިވާ ގޮތަށް އަދި "ކޯޓަކުން ކުރާ ހުކުމަކުން މެނުވީ އެއްވެސް މީހެއްގެ މުދަލެއް އެމީހެއްގެ ރުހުން ނެތި ދައުލަތަށް ނަގައިގެން ނުވާނެ" ކަމަށެވެ.
މައްސަލައިގައި އައްޑޫ ސިޓީގެ މޭޔަރު އަލީ ނިޒާރު ވިދާޅުވެފައި ވަނީ އެ ގޯތިތައް ދައުލަތަށް ނެގުމަށް އައްޑޫގެ ވަރަށް ގިނަ ރައްޔިތުން ތާއީދު ކުރައްވާ ކަމަށެވެ. ނަމަވެސް ކައުންސިލުން އެ ކުރި ކަންތަކުގެ ގާނޫނީ ސައްހަކަމާމެދު ވާހަކަ ދައްކަވާފައެއް ނުވެ އެވެ.
"ގޯތީގެ މަސްލަހަތު ނުހިމެނޭ މީހެއް ނަމަ އައްޑޫގެ ރައްޔިތުން މިކަމަށް ތާއީދު. ޑައިރެކްޓްކޮށް ގޯއްޗާ ގުޅުން އޮތް ފަރާތްތަކުން މަސްލަހަތު ހިމެނޭތީ ދެކޮޅަށް ވާހަކަ ދައްކާނެ. އަޅުގަނޑާ ބައްދަލުވި ރައްޔިތުން ވަރަށް ތާއީދު ކަމެއް. އެ މީހުން ބޭނުންވަނީ މި ސަރަހައްދު ރަނގަޅަށް ތަރައްގީ ވާން،" މި ނޫހަށް ވާހަކަ ދައްކަވަމުން ނިޒާރު ވިދާޅުވެފައިވެ އެވެ.
