މިލާސް، ތުރުކީ (އޯގަސްޓު 5) - އެތައް ހާސް ޓަނުގެ ބޯޓު ދެލި ނުވަތަ ކޯލް ރައްކާކޮށްފައި ހުރި ތާމަލް ޕަވާ ޕްލާންޓަކާ ހިސާބަށް ތުރުކީގެ ޖަންގަލިތަކުގައި ރޯވެފައިވާ އަލިފާންގަނޑު ފޯރައިފި އެވެ.
ތާމަލް ޕަވާ ޕްލާންޓް ނުވަތަ އިންޖީނުގެއާ ހަމައަށް އަލިފާންގަނޑު ފޯރުމުން މީހުން ސަލާމަތް ކުރާ ފަރާތްތަކުން ވަނީ އެ ތަން ގާއިމްކޮށްފައި ހުރި އަވަށުގެ އެތައް ސަތޭކަ ބަޔަކު ރައްކާތެރި ހިސާބުތަކަށް ބަދަލުކުރުމުގެ މަސައްކަތް މިއަދު ފަށާފަ އެވެ.
އެއިޖިއަން ޕްރޮވިންސްގެ މުގްލާ އަވަށުގައި މީގެ 35 އަހަރު ކުރިން ހެދި ކެމެރްކޮއި އިންޖީނުގެ ކައިރިން އަލިފާން ނިއްވާ މީހުންނާއި ފުލުހުން ވެސް ދުރަށް ގޮސްފައިވާ ކަމަށް އޭއެފްޕީން ރިޕޯޓު ކުރެ އެވެ.
މުގްލާ އަވަށް ހިމެނޭ ސަރަހައްދުގެ ކަމާ ބެހޭ އިދާރާތަކުން ބުނީ އިންޖީނުގޭގައި ހުރި ގޮވާޒާތުގެ ހުރިހާ ކެމިކަލް އާއި އެހެނިހެން ނުރައްކާތެރި ސާމާނު އެތަނުން ހުސްކޮށްފައިވާ ކަމަށެވެ.
އަލިފާންގަނޑު ނިއްވަން ހެލިކޮޕްޓަރެއް މަސައްކަތް ކުރަނީ.-- ފޮޓޯ: އޭއެފްޕީ
އޮފިޝަލުން ބުނީ އިންޖީނުގޭގެ ހޫނު މަޑު ކުރަން ބޭނުން ކުރާ ހައިޑްރޮޖަން ޓޭންކުތައް ހުސްކޮށްފައިވާ ކަމަށާއި ރައްކާތެރިކަމުގެ ފިޔަވަޅެއްގެ ގޮތުން އެ ޓޭންކުތަކަށް ފެން އަޅައި ފުރާފައިވާ ކަމަށެވެ.
ތުރުކީގެ އެއިޖިއަން އަދި މެޑިޓެރޭނިއަން އައްސޭރިފަށާ ދިމާލުން ޖަންގަލިތަކުގައި 180 އަށް ވުރެ ގިނަ އަލިފާންގަނޑު ރޯވެ ބޮޑު ސަރަހައްދަކަށް ފެތުރުމުން ސަބަބުން މިހާތަނަށް އަށް މީހަކު މަރުވެ، ޖަންގަލިތަކުގެ ބޮޑު ބަޔެއް ވަނީ އަނދާ ހުލިވެފަ އެވެ.
"ސިޔާސީ ވާން ޖާގައެއް ނެތް"
އިންޖީނުގެ ހުންނަ އަވަށުން މީހުން ހުސްކުރަން ފެށިކަމުގެ ހަބަރު ފެތުރުނުއިރު ރައީސް ތައްޔިބް އުރުދުގާން ގެންދެވީ ޓީވީ މެދުވެރިކޮށް ވަގުތުން ބަޔާނެއް ދެއްވަމުންނެވެ.
އެ ބަޔާނުގައި އުރުދުގާން ވަނީ އިދިކޮޅު ލީޑަރުން ސަރުކާރުން ތައްޔާރުވެފައިވާ މިންވަރާ މެދު ސުވާލުކޮށް، އަލިފާންގަނޑު ކޮންޓްރޯލް ކުރަން ކުރާ މަސައްކަތާ މެދު ސުވާލު ކުރާތީ ފާޑުވިދާޅުވެފަ އެވެ.
"ދުނިޔޭގެ އެހެން ހުރިހާ ގައުމެއް ފަދައިން، އަޅުގަނޑުމެންގެ ޖަންގަލިތަކުގައި ރޯވި އަލިފާންގަނޑުތައް ވެސް މާ ބޮޑުވެފައި ވަރުގަދަ. ސިޔާސީ ވާން މި ދަނޑިވަޅުގައި ޖާގައެއް ނެތް,"
ތުރުކީގެ މީޑިއާތައް މޮނީޓާ ކުރާ އިދާރާއިން މިދިޔަ އަންގާރަ ދުވަހު ވަނީ އަލިފާންގަނޑުގެ ލައިވް ފުޓޭޖާއި މީހުން ސަލާމާތްވާން ދުވާ މަންޒަރު ޓީވީތަކުން ދައްކާ ނަމަ ޖޫރިމަނާ ކުރާނެ ކަމުގެ އިންޒާރު ދީފަ އެވެ.
ފިނިހޫނުމިނުގެ އާ ރިކޯޑެއް
އިދިކޮޅު ލީޑަރުން ސަރުކާރަށް ކިޔާފައިވާ ފާޑުކިޔުންތަކުގެ ތެރޭގައި އަލިފާންގަނޑު ކޮންޓްރޯލް ކުރުމުގައި ބޭރު ގައުމުގެ އެހީ ހޯދުން ލަސްކުރުން ހިމެނެ އެވެ. އެގޮތުން ގްރީސްގެ އެހީ ބަލައިގަތީ މާ ލަހުން ކަމަށާއި ތުރުކީގެ އަލިފާން ނިއްވާ ވައިގެ އުޅަނދުތައް މެއިންޓެއިންކޮށްފައި ނުވާ ކަމަށް ބުންޏެވެ.
އަލިފާންގަނޑުން ސަލާމަތްވާން މަސައްކަތް ކުރަނީ.-- ފޮޓޯ: އޭއެފްޕީ
ނަމަވެސް ގިނަ އޮފިޝަލުން ދެކޭ ގޮތުގައި މި އަލިފާންގަނޑު ކޮންޓްރޯލް ކުރަން އުނދަގޫވެގެން އުޅެނީ އާދަޔާ ހިލާފަށް ހޫނުގަދަވެ ކުރިމަތިވި "ހީޓްވޭވް" ގެ ސަބަބުންނެވެ. އެ ހީޓްވޭވްގައި ބައެއް ކޯރުތައް ހިކި، ގުދުރަތީ ގޮތުން އަލިފާން ރޯވާން އެންމެ އެކަށޭނަ މާހައުލު ތުރުކީގެ އެންމެ ދެކުނުގައި އުފެދުނެވެ.
އެގްރިކަލްޗާ އެންޑް ފޮރެސްޓްރީ މިނިސްޓަރު ބެކިރް ޕަކްޑެމިރްލީ ވިދާޅުވީ އެއިޖިއަން ކަނޑުގެ އައްސޭރި ފަށުގައިވާ މާމަރިސް ސިޓީގެ ފިނިހޫނުމިން ރިކޯޑް މިންވަރަށް 45.5 ޑިގްރީ ސެލްސިއަސް އަށް މި ހަފްތާގައި މައްޗަށް ދިޔަ ކަމަށެވެ.
