ގުދުސް (ޖުލައި 31) - އިޒްރޭލުގެ ބިލިއަނަރަކު މެނޭޖު ކުރާ ބޯޓަކަށް ދިން ޑްރޯން ހަމަލާގެ ފަހަތުގައި ވަނީ އިރާން ކަމަށް ތުހުމަތުކޮށް އދ. އިން އެ ގައުމާ މެދު ފިޔަވަޅު އަޅަން އިޒްރޭލުން ބާރު އަޅަން ފަށައިފި އެވެ.
އެމްޓީ މާސާ ސްޓްރީޓް ޓޭންކަރު ބޯޓަށް ހަމަލާ ދިނީ މިދިޔަ ބުރާސްފަތި ދުވަހު އުތުރު އިންޑިއާ ކަނޑުގައި އޮއްވަ އެވެ. ހަމަލާގައި ދެ ކްރޫ މެމްބަރަކު މަރުވި އެވެ. އެމެރިކާއިން ބުނެފައި ވަނީ އެއީ "ޑްރޯން ސްޓައިލް" ހަމަލާއެއް ކަމަށެވެ.
ހަމަލާގެ ޒިންމާ އެއްވެސް ފަރާތަކުން މިހާތަނަށް އުފުލާފައެއް ނުވެ އެވެ. ނަމަވެސް މެރިޓައިމް އިންޑަސްޓްރީގެ އެނެލިސްޓް، ޑްރަޔަޑް ގްލޯބަލް ކުންފުނިން ބުނީ މި ހަމަލާގައި އިޒްރޭލާއި އިރާނުގެ "ހިޔަނި ހަނގުރާމައިގެ" ނިޝާންތައް ވާ ކަމަށެވެ.
ހުކުރު ދުވަހު އިޒްރޭލުގެ ފޮރިން މިނިސްޓަރު ޔެއާ ލެޕިދް ވިދާޅުވީ "އިރާނުގެ ޓެރަރިޒަމާ ދެކޮޅަށް އދ. މެދުވެރިކޮށް ފިޔަވަޅު އެޅުމަށް ޔަހޫދީ ޑިޕްލޮމެޓުން މަސައްކަތް ފަށައިފި" ކަމަށެވެ.
"ވޮޝިންޓަނާއި ލަންޑަން އަދި އދ. ގައި ހުންނަ އެމްބަސީއަށް އަޅުގަނޑު އަންގައިފިން އދ. ގެ މައި އޮފީހުގެ ކަމާ ގުޅޭ ވަފުދުތަކާ އެކު މި މައްސަލައިގެ މަސައްކަތް ކުރަން،" ޓްވިޓާ މެދުވެރިކޮށް އޭނާ ވިދާޅުވި އެވެ.
"އިރާނަކީ ހަމައެކަނި އިޒްރޭލަށް ދިމާވެގެން އުޅޭ މައްސަލައެއް ނޫން. އެކަމަކު އެއީ ޓެރަރިޒަމާއި ހަމަނުޖެހުން އެކްސްޕޯޓުކޮށް ހުރިހާ އެންމެންނަށް ގެއްލުންދެމުންދާ ގައުމެއް."
ލެޕިދް ވިދާޅުވީ އިނގިރޭސި ފޮރިން މިނިސްޓަރު ޑޮމިނިކް ރާބް އާއެކު މަޝްވަރާ ކުރެއްވި ކަމަށެވެ. ބޯޓަށް ދިން ހަމަލާގައި މަރުވި ދެ މީހުންގެ ތެރެއިން އެކަކަކީ އިނގިރޭސި ރައްޔިތެކެވެ.
ލަންޑަނުގައި ހުރެގެން ބޯޓު އޮޕަރޭޓް ކުރާ ޒޯޑިއެކް މެރީޓައިމް ކުންފުނިން ބުނީ ދެން މަރުވީ ރޫމޭނިއާގެ ރައްޔިތެއް ކަމަށެވެ. ބޯޓު އޮޕަރޭޓް ކުރާ ކުންފުނީގެ ވެރިޔާއަކީ އިޒްރޭލުގެ ބިލިއަނަރު އިޔާލް އޯފާ އެވެ.
މާސާ ސްޓްރީޓް ބޯޓަކީ ތެލު އުފެއްދުންތައް ބަރުކޮށްގެން ދަތުރު ކުރާ ޓޭންކަރެކެވެ. ހަމަލާ ދިން އިރު އޭތި ދަތުރު ކުރަމުން ދިޔެއީ ޓެންޒޭނިއާގެ ދާރުއްސަލާމުން ޔޫއޭއީގެ ފުޖައިރާ އަށެވެ. ނަމަވެސް އޭރު އޭގައި އެއްވެސް މުދަލެއް ނެތެވެ.
