ޓޯކިޔޯ (ޖުލައި 31) - އޮލިމްޕިކްސް ޓެނިސް އިވެންޓްގެ ލޯ މެޑަލް މެޗުގައި މިއަދު ދުނިޔޭގެ އެއް ވަނަ ފިރިހެން ކުޅުންތެރިޔާ ނޮވަކް ޖޮކޮވިޗް ބަލިވިއިރު، މެޗުގެ މެދުން ހިތްހަމަނުޖެހިގެން އޭނާ ގެންގުޅުނު ރެކެޓް ހަލާކުކޮށްލައިފި އެވެ.
މި ފަހަރުގެ އޮލިމްޕިކްްސް އަށް ޖޮކޮވިޗް ކުރިމަތިލިއިރު، މި އަހަރުގެ މިހާތަނަށް ބޭއްވި ތިން ގްރޭންޑް ސްލޭމް މުބާރާތުގެ ޗެމްޕިއަނަކީ އޭނާ އެވެ. ޖޮކޮވިޗްގެ އަމާޒުހުރީ މި ފަހަރުގެ އޮލިމްޕިކްސް އިން ރަން މެޑަލެއް ހޯދައި ކުރިއަށް އޮތް ޔޫއެސް އޯޕަން ކާމިޔާބުކޮށް ރަން ކާމިޔާބެއް ހޯދާށެވެ.
އެކަމަކު، އިއްޔެ ސެމީ ފައިނަލުން ޖަރުމަނުގެ އަލެކްސަންޑަ ޒްވެރެވް އަތުން ބަލިވެ، ކެޓީ އެވެ. އެ ނަތީޖާއާ އެކު އެއް އަހަރެއްގެ ހަތަރު ގްރޭންޑް ސްލޭމް އާއި އޮލިމްޕިކްސްގެ ރެކޯޑް ހަދައި، ރަން ކާމިޔާބެއް ހޯދަން ޖޮކޮވިޗް ދެކުނު ހުވަފެނަށް ނިމުން އައީ އެވެ. ހަތަރު ގްރޭންޑް ސްލޭމާއި އޮލިމްޕިކް ރަން މެޑަލް އެއް އަހަރު ތެރޭ ހޯދުމުގެ ރެކޯޑް މިހާތަނަށް ހާސިލްކުރީ 1988 ވަނަ އަހަރު ޖަރުމަނުގެ ސްޓެފީ ގްރާފް އެވެ.
މިއަދު ކުޅުނު ތިން ވަނަ ހޮވާ މެޗުގައި ސްޕެއިނުގެ ޕަބްލޯ ކާރޭނިއޯ އަތުން ޖޮކޮވިޗް ބަލިވިއިރު، މެޗުގެ މެދުން ޖޮކޮވިޗް ވަނީ ހިތްހަމަނުޖެހިގެން ދެ ފަހަރެއްގެ މަތިން ވަނީ ރެކެޓް އެއްލާލައިފަ އެެވެ. ދެ ވަނަ ފަހަރު ރެކެޓް އެއްލާލުމުން ރެކެޓް ހަލާކުވެސްވި އެވެ. އެކަމަކު އަމްޕަޔަރު ޖޮކޮވިޗްގެ ޕޮއިންޓް އުނިކުރަން ނުނިންމުމުން ކާރޭނިއޯ ވަނީ ހިތްހަމަނުޖެހުން ފާޅުކޮށްފަ އެެވެ.
ޖޮކޮވިޗް ދެ ވަނަ ފަހަރަށް ރެކެޓް އެއްލާލަނީ.-- ފޮޓޯ: އޭއެފްޕީ
ތަފާތު މޮޅު ކުޅުމެއް ދައްކައި ކާރޭނިއޯ މެޗުން މޮޅުވިއިރު، ސެޓުތައް ދިޔައީ 6-4 6-7 (6-8) 6-3 އިންނެވެ.
މިއީ ކާރޭނިއޯއާ ދެކޮޅަށް ކުޅުނު މެޗެއްގެ ތެރެއިން ޖޮކޮވިޗްގެ ފަރާތުން މި ފަދަ އަމަލެއް ފެނުނު ދެ ވަނަ ފަހަރެވެ. މިދިޔަ އަހަރުގެ ޔޫއެސް އޯޕަންގެ މެޗެއްގެ ތެރެއިން ކަރޭނިއޯއާ ދެކޮޅަށ ބަލިވެފައި އޮއްވައި ޖޮކޮވިޗް ޖީބުން ބޯޅަ ނެގުމަށް ފަހު ހިތްހަމަނުޖެހިފައި ހުރެ، އޭނާ ބޭރަށް ފޮނުވާލި ބޯޅަ އަމާޒުވީ އަންހެން ލައިން ޖަޖެއްގެ ކަރަށެވެ. ގިނައިރުތަކެއް ވަންދެން އަމްޕަޔަރުން މި މައްސަލައިގައި މަޝްވަރާ ކުރުމަށް ފަހު ނިންމީ ޖޮކޮވިޗް މުބާރާތުން ޑިސްކޮލިފައި ކުރުމަށެވެ.
މިއަދުގެ މެޗުގައި ޖޮކޮވިޗްގެ ފަރާތުން ފެނުނު ކަންތައްތަކާ ބެހޭގޮތުން އޭނާ ބުނީ ޖަޒުބާތުގައި ޖެހިގެން އެ ފަދަ ކަންކަން މީގެ ކުރިން ވެސް ކުރެވިފައި އެބަހުރި ކަމަށެވެ. އަދި މިއަދުގެ މެޗުގައި ވެސް އެގޮތަށް ދިމާވީ ކަމަށް ބުންޏެވެ.
"އަހަރެމެންނަކީ އިންސާނުން އެހެންވީމަ މި ކަހަލަ ކަންކަން ކުރެވޭނެ. މިއީ އަހަރެން މި ގޮތަށް ދައްކަން ބޭނުންވާ ވާހަކައެއް ނޫން. އެކަމަކު މި ފަދަ ކަމެއް މިހެންވީމަ މައާފަށް އެދެން،" ޖޮކޮވިޗް ބުންޏެވެ.
ޖޮކޮވިޗް ވަނީ މިއަދު އޭނާ ކުޅެން އޮތް މިކްސް ޑަބަލްސްގެ ލޯ މެޑަލް މެޗުން ވަކިވެފަ އެވެ. އެއީ ވާތު ކޮނޑަށް ލިބިފައިވާ އަނިޔާއެއްގެ ސަބަބުންނެވެ. އެހެންވެ، މި ފަހަރުގެ އޮލިމްޕިކްސް ޖޮކޮވިޗަށް ނިމުނީ އެއްވެސް މެޑަލެއް ނުލިބި އެވެ.
އުމުރުން 33 އަހަރުގެ ޖޮކޮވިޗް ބުނީ މެޑަލެއް ނުހޯދައި އެނބުރި ގައުމަށް ދާން ޖެހުމަކީ ހިތާމައެއް ކަމަށާއި އެކަމަކު އޮލިމްޕިކްގައި ކުޅެވުމަކީ އަބަދުވެސް އޭނާ އަށް ފަހުރެއް ކަމަށެވެ.
"އިއްޔެ އާއި މިއަދު މި ފެނުނީ އަހަރެންގެ އެންމެ ރަނގަޅު ޓެނިހެއް ނޫން. މިއީ ވަރުބަލިވެގެން ދިމާވި ކަމެއް. މެންޓަލީ އަދި ފިޒިކަލީ ވަރަށް އުނދަގޫ ޗެލެންޖެއް މިއީ،" ޖޮކޮވިޗް ބުންޏެވެ.
"އަހަރެންގެ އުއްމީދަކީ ތިން އަހަރު ފަހުން ޕެރިހުގައި ބާއްވާ އޮލިމްޕިކްސްގައި ވާދަކުރުން. ގައުމަށްޓަކައި މެޑަލެއް ހޯދުމުގެ މަސައްކަތް އަބަދު ވެސް ކުރަން. މި ފަަހަރު އެކަން ނުވީތީ ގައުމުގެ ސަޕޯޓަރުން ކިބައިން މައާފަށް އެދެން،"
އޮލިމްޕިކްސްގައި މިހާތަނަށް ޖޮކޮވިޗްގެ ކާމިޔާބީ އަކީ 2008 ވަަނަ އަހަރު ބެއިޖިންގައި ބޭއްވި އޮލިމްޕިކްސްގެ ފިރިހެން ސިންގަލްސް އިން ލޯ މެޑަލެއް ހާސިލްކުރެވުމެވެ. އޭގެ ފަހުން ލަންޑަންގައި 2012 ވަނަ އަހަރު ބޭއްވި އޮލިމްޕިކްސްގެ ސެމީގައި ސްކޮޓްލެންޑްގެ އެންޑީ މަރީ އަތުން ބަލިވެ، ލޯ މެޑަލް މެޗުން އާޖެންޓީނާގެ ހުއާން މާޓިން ޑެލް ޕޮޓްރޯ އަތުން ވެސް ޖޮކޮވިޗަށް ޖެހުނީ ނާކާމިޔާބީއާ ކުރިމަތިލާށެވެ. މީގެ ފަސް އަހަރު ކުރިން 2016 ވަނަ އަހަރު ބްރެޒިލްގެ ރިއޯގައި ބޭއްވި އޮލިމްޕިކްސް އިން ވެސް ޖޮކޮވިޗް ކެޓީ ޑެލް ޕޮޓްރޯ އަތުންނެވެ. އެއީ ފުރަތަމަ ބުރުގަ އެވެ.
