މެޑްރިޑް (ޖުލައި 30) - މެޑްރިޑްގެ ކޯޓަކުން ޔޫރަޕިއަން ސުޕަ ލީގުގެ ފައުންޑަ ކްލަބްތަކާ އެއްކޮޅަށް ނިންމި ނިންމުމާ އެކު މި ވަގުތު އެ ލީގުގައި އޮތް ރެއާލް މެޑްރިޑާއި ބާސެލޯނާ އަދި ޔުވެންޓަސް އިން ސުޕަ ލީގުގެ މަސައްކަތް ދިފާއުކޮށް ބަޔާނެއް ނެރެފި އެވެ.
މިދިޔަ އޭޕްރީލް މަހު 18 ވަަނަ ދުވަހު 12 ކްލަބާ އެކު ސުޕަ ލީގު އިއުލާނުކުރި ނަމަވެސް އެކި ފިއްތުންތަކާ ހުރެ 72 ގަޑިއިރު ވެސް ނުވަނީސް އޭގެ ތެެރެއިން ނުވަ ޓީމެއް ވަނީ އެ ލީގުން ވަކިވެފަ އެވެ.
ސުޕަ ލީގުން ވަކިވި ކްލަބްތަކަކީ އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި މެންޗެސްޓާ ސިޓީ، ލިވަޕޫލް، އާސެނަލް، ޓޮޓެންހަމް، ޗެލްސީ އިޓަލީގެ އޭސީ މިލާނާއި އިންޓަ މިލާން އަދި ސްޕެއިނުގެ އެތުލެޓިކޯ މެޑްރިޑް އެވެ. ލީގުން ވަކިނުވާން ސާބިތުކަންމަތީ ދެމި އޮތީ ރެއާލާއި ބާސެލޯނާ އަދި ޔުވެންޓަސް އެވެ.
މެޑްރިޑްގެ ކޯޓުން ސުޕަ ލީގުގެ ކްލަބްތަކާ އެއްކޮޅަށް މިއަދު ނެރުނު އަމުރާ އެކު ޔުވެންޓަސް އާއި ބާސެލޯނާ އަދި ރެއާލުން ނެރުނު ބަޔާންތަކުގައި ހިމެނެނީ ގާތްގަނޑަކަށް އެއް ވާހަކަތަކެކެވެ. ރަސްމީ އިދާރާތަކާ ގުޅިގެން ސުޕަ ލީގު ކުރިއަށް ގެންދެވޭނެ ގޮތްތަކެއް ހޯދުމަށެވެ. އަދި މިއީ ފުޓްބޯޅައިގެ ހުރިހާ ސްޓޭކްހޯލްޑަރުންގެ (ހިއްސާދާރުންގެ) ރުހުމާ އެކު ފުޓްބޯޅައިގެ މުސްތަގުބަލަށްޓަކައި ކުރިއަށް ގެންދަން ޖެހޭ މުބާރާތެއް ކަމަށް އެ ކްލަބްތަކުން ވަނީ ބުނެފަ އެވެ.
މެޑްރިޑް ކޯޓުން ސުޕަ ލީގުގެ މަސައްކަތް ކުރިއަށް ގެންދިއުމުގައި ގާނޫނީ ހުރަހެއް ނެތް ކަމަށް ނިންމި ނިންމުން އިތުރަށް ރިވިއުކުރާނީ ލަކްސުމްބާގްގައި ހުންނަ ޔޫރަޕިއަން ކޯޓް އޮފް ޖަސްޓިސް އިންނެވެ. އެ ކޯޓުން ގޮތެއް ނިންމުމުގައި މިކަމާ ބެހޭގޮތުން ވަރަށް ފުޅާދާއިރާއެއްގައި ދިރާސާކުރާނެ އެވެ. އަދި އެ އަށް ފަހު އެ ކޯޓުގެ ނިންމުން ޔުއެފާ އަށް ހިއްސާކުރާނެ އެވެ.
ސުޕަ ލީގާ ދެކޮޅަށް އެންމެ ފުރަަތަމަ ފިޔަވަޅު އެޅީ ޔުއެފާ އިންނެވެ. ޔުއެފާ އިން ދިން އަދަބަކީ ސުޕަ ލީގުން ވަކިވި ހުރިހާ ޓީމެއް އެކުވެގެން 13.4 މިލިއަން ޕައުންޑްގެ ޖޫރިމަނާއެއް ދެއްކުމެވެ. އޭގެ އިތުރުން އެއް ސީޒަން ވަންދެން މި ކްލަބްތަކަށް ޔުއެފާ މެދުވެރިކޮށް ލިބޭ ފައިސާގެ ފަސް ޕަސެންޓް ޔުއެފާ އަށް ނެގުމެވެ. އަދި މުސްތަގުބަލުގައި މި ފަދަ ޔުއެފާގެ އުސޫލާ ހިލާފު ޕްރޮޖެކްޓްތަކުގައި ބައިވެރިވެއްޖެނަމަ 100 މިލިއަން ޕައުންޑްގެ ޖޫރިމަނާއެއް އަންނާނެކަން އަންގާފައިވެ އެވެ.
އޭގެ ފަހުން ސުޕަ ލީގުގައި ބައިވެރިވި އިނގިރޭސި ހަ ޓީމަށް ވެސް ވަނީ އަދަބު ދީފަ އެވެ. އިނގިރޭސި އެފްއޭ އިން އެ ގައުމުގެ ހަ ކްލަބަށް ދިން އަދަބަކީ ހުރިހާ ކްލަބެއް އެކުވެގެން 21 މިލިއަން ޕައުންޑް ދެއްކުމަށެވެ. އެއީ ކޮންމެ ކްލަބަކުން 3.5 މިލިއަން ޕައުންޑެވެ.
ސުޕަ ލީގުގައި ދެމި އޮތް ތިން ޓީމަށް ޔުއެފާ އާއި އެ ގައުމުތަކުުގެ ފުޓްބޯޅަ ލީގުތަކުގެ ބޯޑުން ތަކުރާރުކޮށް އިންޒާރުތައް ދިން ނަމަވެސް މަސައްކަތް ހުއްޓާނުލާނެކަން ވަނީ އަންގައިފަ އެވެ. އެގޮތުން ޔުވެންޓަސް އިޓާލިއަން ލީގުން ވަކިކުރުމުގެ އިންޒާރާއި ބާސެލޯނާ އާއި ރެއާލް ލަލީގާ އިން ވަކިކުރާން އުޅޭ ކަމުގެ އަޑުތަކެއް ފެތުރުނެެވެ.
ސުޕަ ލީގުގެ ދިފާއުގައި އެ ލީގުގެ ޗެއާމަން އަދި ރެއާލްގެ ރައީސް ފްލޮރެންޓީނޯ ޕެރޭޒް ވަނީ ގިނަ އިންޓަވިއުތަކެއް ދެއްވައިފަ އެވެ. އަދި ބާސެލޯނާގެ ރައީސް ޔޮއާން ލަޕޯޓާ ވެސް ވަނީ ސުޕަ ލީގަކީ މުސްތަގުބަލަށް ބަލާއިރު، ރަނގަޅު ޕްރޮޖެކްޓަކަށް ވުމުގެ ފުރުސަތު އޮތް ކަމެއް ކަމަށް ވިދާޅުވެފަ އެވެ.
ސްޕެއިނުގެ ރޭޑިއޯ އަކަށް ޕެރޭޒް މީގެ ކުރިން ވިދާޅުވީ ސުޕަ ލީގުން ވަކިވި ކަމަށް އިއުލާނުކުރި ނުވަ ޓީމު އެ ޕްރޮކެޓް ފަށާއިރު އަލުން ބައިވެރިވާނެ ކަމުގެ ޔަގީންކަން އެބައޮތް ކަމަށެވެ.
ފްރާންސްގެ ލެކިއުޕޭ ނޫހަށް ދިން އިންޓަވިއުއެއްގައި ފީފާގެ ރައީސް ޖިއާނީ އިންފަންޓީނޯ ވިދާޅުވީ ޔުއެފާ އާއި ފީފާއާ ދެކޮޅަށް ފަށަން އުޅުނު ޔޫރަޕިއަން ސުޕަ ލީގުގައި ބައިވެރިވި ޓީމުތަކަށް އަދަބު ދިނުމަކީ ހައްލެއް ނޫން ކަމަށެވެ. އެއީ ކްލަބަށް އަދަބު ދިނުމަކީ އެ ޓީމެއްގެ ކުޅުންތެރިންނާއި ސްޓާފުން އަދި ސަޕޯޓަރުންނަށް ވެސް ދެވޭ އަދަބެއް ކަމަށާއި އެހެންވެ، މީގެ އެންމެ ރަނގަޅު ގޮތަކީ ހުރިހާ ފަރާތެއް މަޝްވަރާކޮށްގެން ހައްލެއް ހޯދުން ކަމަށް އިންފަންޓީނޯ ވަނީ ވިދާޅުވެފަ އެވެ.
