ޓޯކިޔޯ (ޖުލައި 31) - ޖަޕާނުގެ ޓޯކިޔޯގައި މިހާރު ކުރިއަށްދާ އޮލިމްޕިކްސްގެ ޓެނިސް އިވެންޓްގެ ފިރިހެން ސިންގަލްސް ސެމީ ފައިނަލުން ކަޓައި ދުނިޔޭގެ އެއް ވަނަ ޓެނިސް ކުޅުންތެރިޔާ ނޮވަކް ޖޮކޮވިޗް، މި ފަހަރުގެ ޓެނިސް ސީޒަނުގައި ރަން ކާމިޔާބީ ހޯދަން ދެކެމުން އައި ހުވަފެން ނިމުމަކަށް އަތުވެއްޖެ އެވެ.
ޓެނިސް ކަލަންޑަރުގައި މިހާތަނަށް މި އަހަރުގެ މިހާތަނަށް ތިން ގްރޭންޑް ސްލޭމް ތަށި ވެސް ކާމިޔާބުކުރީ ޖޮކޮވިޗް އެވެ. ގްރޭންޑް ސްލޭމްގެ ފުރިހަމަ ރެކޯޑާ އެކު ޖޮކޮވިޗް މި ފަހަރުގެ އޮލިމްޕިކްސް އަށް ނުކުތީ އެއް އަހަރެއްގެ ހަތަރު ގްރޭންޑް ސްލޭމް އާއި އޮލިމްޕިކްސްގެ ރެކޯޑް ހަދާށެވެ. އެ ރެކޯޑް މިހާތަނަށް ހާސިލްކުރީ 1988 ވަނަ އަހަރު ޖަރުމަނުގެ ސްޓެފީ ގްރާފް އެވެ.
މި ފަަހަރުގެ އޮލިމްޕިކްސްގެ ފިރިހެން ސިންގަލްސް އިވެންޓްގެ ސެމީ ފައިނަލުގައި މިއަދު ޖަރުމަނުގެ އަލެކްސަންޑަ ޒްވެރެވް އަތުން ބަލިވެ، ޖޮކޮވިޗްގެ ރަން ކާމިޔާބީގެ ހުވަފެނަށް ނިމުން އައީ އެވެ. ޒްވެރެވް އަތުން ޖޮކޮވިޗް ފުރަތަމަ ސެޓު ގެންދިޔަ އެވެ. އެކަމަކު ފަހަތުން އަރައި ޒްވެރެވް މޮޅުވީ މޮޅު ކުޅުމެއް ދައްކައިގެންނެވެ. މި މެޗުގެ ސެޓުތައް ދިޔައީ 1-6 6-3 6-1 އިންނެވެ.
އާދިއްތަ ދުވަހު ކުޅޭ ފައިނަލުގައި ޒްވެރެވް ނުކުންނާނީ ރަޝިއާގެ ކޭރެން ކަޗަނޯފާ ދެކޮޅަށެވެ. ޒްވެރެވް އަކީ 2000 ވަނަ އަހަރަށް ފަހު އޮލިމްޕިކްސްގެ ޓެނިސް ފައިނަލުގައި ކުޅޭނެ ފުރަތަމަ ޖަރުމަނު ކުޅުންތެރިޔާ އެވެ.
ލޯ މެޑަލް މެޗުގައި ޖޮކޮވިޗް ބައްދަލުކުރާނީ ސްޕެއިނުގެ ޕަބްލޯ ކާރޭނިއޯއާ އެވެ. އޮލިމްޕިކްސްގައި މިހާތަނަށް ޖޮކޮވިޗްގެ ކާމިޔާބީ އަކީ 2008 ވަަނަ އަހަރު ބެއިޖިންގައި ބޭއްވި އޮލިމްޕިކްސްގެ ފިރިހެން ސިންގަލްސް އިން ލޯ މެޑަލެއް ހާސިލްކުރެވުމެވެ.
ދެން އޮލިމްޕިކްސްގައި ޖޮކޮވިޗްގެ ރެކޯޑަށް ބަލާއިރު، ލަންޑަންގައި 2012 ވަނަ އަހަރު ބޭއްވި އޮލިމްޕިކްސްގެ ސެމީގައި ސްކޮޓްލެންޑްގެ އެންޑީ މަރީ އަތުން ބަލިވެ، ލޯ މެޑަލް މެޗުން އާޖެންޓީނާގެ ހުއާން މާޓިން ޑެލް ޕޮޓްރޯ އަތުން ވެސް ޖޮކޮވިޗަށް ޖެހުނީ ނާކާމިޔާބީއާ ކުރިމަތިލާށެވެ. މީގެ ފަސް އަހަރު ކުރިން 2016 ވަނަ އަހަރު ބްރެޒިލްގެ ރިއޯގައި ބޭއްވި އޮލިމްޕިކްސް އިން ވެސް ޖޮކޮވިޗް ކެޓީ ޑެލް ޕޮޓްރޯ އަތުންނެވެ. އެއީ ފުރަތަމަ ބުރުގަ އެވެ.
މި ފަހަރުގެ އޮލިމްޕިކްސްގެ މިކްސް ޑަބަލްސް ބައިން ރަން މެޑަލް ހޯދުމުގެ ފުރުސަތު ޖޮކޮވިޗަށް އެބައޮތެވެ. ޖޮކޮވިޗާއި ސާބިއާގެ ނީނާ ސްޓޮޔަނޯވިކްގެ ޕެެއާ ކުޅޭ ސެމީ ފައިނަލް މެޗު މިއަދު އޮންނާނެ އެވެ.
ފިރިހެން ސިންގަލްސްގައި ދެން ޖޮކޮވިޗަށް އޮންނާނެ މުބާރާތަކީ އަންނަ މަހުގެ 30 ވަނަ ދުވަހު ފަށާ ޔޫއެސް އޯޕަން މުބާރާތެވެ. މިއީ ގްރޭންޑް ސްލޭމް މުބާރާތެކެވެ. އެ މުބާރާތުގެ ޗެމްޕިއަންކަން ޖޮކޮވިޗް ހޯދައިިފިނަމަ އޭނާ އަށް ގްރޭންޑް ސްލޭމްގެ ބޮޑު ރެކޯޑް މުގުރާލެވޭނެ އެވެ.
ޓެނިހުގެ އެންމެ މަޝްހޫރު ތިން ކުޅުންތެރިން ކަމަށްވާ ސްޕެއިނުގެ ރަފައެލް ނަޑާލް އާއި ސްވިޒަލެންޑްގެ ރޮޖާ ފެޑެރާ އާއި ޖޮކޮވިޗް، ކޮންމެ ކުޅުންތެރިއަކު ވަނީ މިހާތަނަށް ޓެނިހުގެ 20 ގްރޭންޑް ސްލޭމް މުބާރާތް ކާމިޔާބުކޮށްފަ އެވެ.
