ހދ. ހަނިމާދޫގައި އެމްއެންޑީއެފްގެ ނޮދަން އޭރިޔާގެ ހެޑްކުއާޓާޒް އެޅުމަށް އެ ރަށުގެ އެއާޕޯޓާ ކައިރިން ގިނަ ދަނޑުބިންތަކެއް ހުސްކުރަން ރަށު ކައުންސިލުން އަންގައިފި އެވެ.
އަންނަ މަހުގެ ނިޔަލަށް ހުސްކުރަން އަންގާފައިވަނީ އެރަށު އަރާމަގާއި ރަންވޭމަގާއި ވަޑައިގެންނެވިމަގުން ކަސްޓަމު އިރުން ދޫކޮށްފައިވާ ދަނޑުތަކެވެ. އެއީ 420،316 އަކަފޫޓުގެ ބިމެކެވެ.
ހަނިމާދޫ ކައުންސިލްގެ ޒިންމާދާރު ވެރިޔާ އިބްރާހިމް އަލީ ވިދާޅުވިގޮތުގައި އެ ދަނޑުބިންތަކަކީ 2017 ވަނަ އަހަރު ދެ އަހަރުގެ މުއްދަތަށް މޫސުމީ ދަނޑުވެރިކަން ކުރަން ދޫކުރި ސަރަހައްދެއް ކަމަށާއި އެ ބިންތަކުގައި މިހާރު ދަނޑުވެރިކަން ކުރަމުން ދަނީ އެގްރިމެންޓެއް ނެތި ކަމަށެވެ.
"އަސްލު ހުސްކުރަން އަންގަން ވެސް ނުޖެހޭ. އެއީ މިހާރު އެ ބިމަކީ ހަވާލު ކުރި މުއްދަތު ހަމަވެފައިވާ ތަނެއް. އެހެންވީމައި ބަދަލުގައި އެހެން ބިމެއް ވެސް ދޭކަށް ނުޖެހޭނެ ނޫންތޯ،" އިބްރާހިމް ވިދާޅުވި އެވެ.
އޭނާ ވިދާޅުވިގޮތުގައި އެ ބިމުގައި މިހާރު ދަނޑުވެރިކަން ކުރަނީވެސް ހައެއްކަ މީހުންނެވެ. އެގްރިމެންޓްގެ މުއްދަތު ހަމަވުމުން ގިނަ މީހުން ވަނީ ދަނޑުވެރިކަން ކުރުން ހުއްޓާލައިފަ އެވެ.
ހަނިމާދޫ އިންޓަނޭޝަނަލް އެއާޕޯޓު ތަރައްގީކުރަން ސަރުކާރުން ބޭނުންވި ވަރުގެ ބޮޑު ބިމެއް ދޭން ރައްޔިތުންގެ ހުރި ކަންބޮޑުވުންތަކަށް ބަލައި, ކުޑަ ބިމަކަށް ސަރުކާރުން ވަނީ އެއްބަސްވެފަ އެވެ. އެގޮތަށް އެއްބަސްވީ މިފަހުން ރައީސް އިބްރާހިމް މުހައްމަދު ސޯލިހް އެރަށަށް ވަޑައިގެން ރައްޔިތުންނާއި ކައުންސިލްގެ ކަންބޮޑުވުންތައް އަޑުއެއްސެވުމަށް ފަހުގަ އެވެ.
ސަރުކާރުން އެދުނީ ސިފައިންގެ މައި މަރުކަޒު އެޅުމަށާއި ސިޓީ ހޮޓަލެއް އެޅުމަށް އެއާޕޯޓާ ދިމާލުން އެރަށު އިރުމަތި ފަރާތު ގޮނޑުދޮށް ހިމެނޭގޮތަށް 853،937 އަކަފޫޓުގެ ބިމެއް ހަމަޖައްސައި ދިނުމަށެވެ. ރައްޔިތުންގެ ކަންބޮޑުވުންތަކާއެކު ފަހުން އެއްބަސްވީ އެ ރަށު އެއާޕޯޓް ސަރަހައްދުން ކަސްޓަމްސްއާ ޖެހިގެން 420،316 އަކަފޫޓުގެ ބިމެއް ރަށު ތެރެއިން ދިނުމަށެވެ.
މިދިޔަ މާޗް މަހު ޕްލޭނިން މިނިސްޓްރީން އެ ރަށު ކައުންސިލަށް ފޮނުވި ސިޓީއެއްގައި އެދިފައިވަނީ އެއާޕޯޓަށް އިތުރު ކުރާ ބިމުގައި ސިފައިންގެ ނޯދާން އޭރިޔާ ހެޑްކުއާޓާސް ވެސް އަޅަން ހަމަޖައްސާފައިވާތީ އެރަށުން 853،937 އަކަފޫޓުގެ ބިމެއް ހަމަޖައްސައި ދިނުމަށެވެ. އެއާއެކު ގިނަ ރައްޔިތުން ކަންބޮޑުވުން ފާޅުކޮށް ސަރުކާރަށް ޕެޓިޝަންތައް ހުށަހެޅި އެވެ.
އެހާ ބޮޑު ބިމެއް އެއާޕޯޓް ތަރައްގީކުރަން ދޫކޮށްލާކަށް ރައްޔިތުންނާއި ކައުންސިލުން ބޭނުމެއް ނުވެ އެވެ.
ހަނިމާދޫން ބޮޑު ބިމެއް ހޯދަނީ އިންޑިއާ ސިފައިން ތިބެން ކަމަށް ބުނެ ދައްކާ ވާހަކަތައް ދޮގުކޮށް ބޭރު ގައުމެއްގެ ސިފައިން އެ ރަށުގައި ނުބައިތިއްބާނެ ކަމުގެ ޔަގީންކަން ވެސް ރައީސް ވަނީ އެ ރަށުގެ ރައްޔިތުންނަށް ދެއްވައިފަ އެވެ.
ހަނިމާދޫ އިންޓަނޭޝަނަލް އެއާޕޯޓް އަޕްގްރޭޑް މަސައްކަތް ނިމުމުން އުތުރުގެ ފަތުރުވެރިކަމަށް ބޮޑު ކުރިއެރުމެއް އަންނާނެ ކަމަށް ސަރުކާރުން އަންދާޒާ ކުރެ އެވެ.
މި މަޝްރޫއަކީ މިހާތަނަށް އުތުރުގެ އަތޮޅެއްގައި އެންމެ ބޮޑު ހޭދައެއް ކޮށްގެން ހިންގާ މަޝްރޫއެވެ. އަދި މި އެއާޕޯޓް ތަރައްގީ ކުރެވުމުން ދިވެހިރާއްޖޭގެ އުތުރުގެ އަތޮޅުތަކުގެ ކުރިމަގު އާރާސްތުކޮށް، ފަތުރުވެރިކަމާއި އިގްތިސާދުގެ މައިދޮރަށް ހަނިމާދު ވެެގެން ދާނެ ކަމަށް ސަރުކާރުން އުއްމީދު ކުރެ އެވެ.
