ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ހަރުކަށި ފިކުރުގެ ޓެރަރިސްޓުން ގޮއްވާލި ބޮން، ސައިކަލުގައި ހަރުކޮށް އެކަމުގެ ތައްޔާރީތައް ވަމުން ދިޔައީ ހުޅުމާލޭ ފްލެޓެއްގެ ބޭރުގައި އެތައް ބަޔެއްގެ ފުރާނަ ނުރައްކަލުގެ ތެރެއަށް ލައިގެން ކަން ފުލުހުންގެ ތަހުގީގުން އެނގިއްޖެ އެވެ.
ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒް ވިދާޅުވީ ސައިކަލުގައި އައިއީޑީ ހަރުކުރީ ހުޅުމާލޭ 106 ނަމްބަރު ފްލެޓްގެ ތިރީގައި ސައިކަލް ބަހައްޓައިގެން މޭ މަހުގެ ތިން ވަނަ ދުވަހުގެ ރޭ 8:30 ކަންހާއިރު ކަމަށެވެ. ބޮން ގޮއްވާލީ މޭ ހަ ވަނަ ދުވަހުގެރޭ އެވެ.
"މިސަރަހައްދަކީ އާއްމުކޮށް ކުޑަކުދިންނާއި އެ ފްލެޓްތަކުގައި ދިރިއުޅޭ އާއިލާތަކުގެ މީހުން ނުކުމެ ހާއްސަކޮށް ރޭގަނޑުގެ އެ ގަޑިތަކުގައި މިސަރަހައްދުގައި ހުންނަ ޖޯލިތަކާ ތަންތަނުގައި ތިބޭ ސަރަހައްދެއް،" ރިޔާޒް ވިދާޅުވި އެވެ.
ރިޔާޒް ވިދާޅުވީ ޓެރަރިސްޓުން އެ ސަރަހައްދުގައި އެކުރި ކަމަކީ ނުރައްކާތެރި ހާދިސާއެއް ހިނގައިފާނެ ހާލަތެއްގައި ވަރަށް ގިނަ ބައެއްގެ ފުރާނައަށް ނުރައްކާވުމުގެ ފުރުސަތު އޮތް ކަމެއް ކަމަށާއި އޭގެ ސަބަބުން އަދި އެސަރަހައްދުގައި އުޅޭ މީހުންގެ މުދަލަށް ވެސް ވަރަށް ބޮޑު ގެއްލުމެއް ލިބިގެން ގޮސްދާނެ ކަމަށެވެ.
އެ ބޮން ހަރުކުރަން އެ ފްލެޓްގެ ކައިރިއަށް ސައިކަލް ގެންދިޔައީ އެ މައްސަލައިގައި ހައްޔަރުކޮށްފައިވާ ތަހުމީން އަހުމަދު ކަމަށާއި ބޮން ހިފައިގެން އެ ސަރަހައްދަށް އައީ އަލީ ހައިޝަމް ކަމަށް ވެސް ރިޔާޒް ވިދާޅުވި އެވެ. ސައިކަލްގައި ބޮން ހަރުކުރިއިރު އެ ހަމަލާގައި ބައިވެރިވާ އެހެން އެންމެން އެ ސަރަހައްދު ވަށައިގެން ތިބި ކަމަށް ވެސް ރިޔާޒް ވިދާޅުވި އެވެ.
ރިޔާޒް ވިދާޅުވީ މަޖީދީމަގުގައި ބަހައްޓާފައި ހުރި ސައިކަލްގައި އިން އައިއީޑީ ގޮއްވާލިއިރު އޭގެ އަސަރު ކުރާ ހިސާބުގައި 17 މީހުން ތިބި ކަމަށެވެ. ބުރައިގެން ދިޔަ ރޭޒާފުށްތަކުން ޖެހި ނަޝީދާއި ބޮޑީގާޑުގެ އިތުރުން ބައެއް އާއްމުން ވަނީ ވަރަށް ބޮޑަށް ޒަހަމުވެފަ އެވެ.
"މިބޮމުގެ ހަމަލާގެ ސަބަބުން އިތުރު އެތައް ބައެއްގެ ފުރާނައަށް ނުރައްކާވާފަދަ ހާލަތެއް އުފަންވުމުގެ ފުރުސަތު އޮތް،" ރިޔާޒް ވިދާޅުވި އެވެ.
ޓެރަރިސްޓް ހަމަލާއާ ގުޅިގެން ހައްޔަރު ކޮށްފައި ތިބި ބައެއް މީހުން
އެކަންކަމުން ދޭހަކޮށް ދެނީ އެ ހަމަލާދިން މީހުންނަކީ މީހެއްގެ ފުރާނައަށް ނުވަތަ މުދަލަށް ލިބިދާނެ ގެއްލުމަކަށް ބެލުމެއް ނެތި އެ މީހުންގެ މަގުސަދު ހާސިލް ކުރުމަށްޓަކައި ކިތަންމެ ނުރައްކާތެރި ކަމެއް ވެސް ކޮށްފާނެ ބައެއްކަން ކަމަށް ވެސް ރިޔާޒް ވިދާޅުވި އެވެ.
މި ހަމަލާއާ ގުޅިގެން ޖުމްލަ 10 މީހަކު ފުލުހުންގެ ބެލުމުގެ ދަށުގައި ތިބިއިރު އޭގެ ތެރެއިން ހަތަރު މީހެއްގެ މައްޗަށް ދައުވާކުރުމަށް މިހާރު ވަނީ ފޮނުވައިފަ އެވެ. އެއީ، ހަމަލާއާ ގުޅިގެން އެންމެ ފުރަތަމަ ހައްޔަރުކުރި އަހުމަދު އަދުހަމް އާއި މުޖާޒް އަހްމަދުގެ އިތުރުން ތަހުމީން އަހްމަދު އާއި އަހުމަދު ފާތިހު އެވެ.
މީގެތެރެއިން މުޖާޒާއި ތަހުމީނު އަދި އަދުހަމް ވަނީ ޝަރީއަތް ނިމެންދެން ބަންދުކޮށްފަ އެވެ.
ދެން ބަންދުގައި ތިބީ މ. ކުދެހިގޭ، އިސްހާގާއި ގއ. ވިލިނގިލީ ހުދުރުމާގޭ، ފަހުމީ އަލީ އާއި ނ. މަނަދޫ ނޫރީގޭ އަލީ ހައިޝަން އެވެ. އޭގެ އިތުރުން އއ. މާޅޮސް އަސަރީގޭ މުހައްމަދު ނާޒިމާއި ހއ. ހޯރަފުށީ އަލަނާސިގޭ މުހައްމަދު ތަސްލީމާއި ހއ. މޮޅަދޫ ބަހާރުގޭ އަބްދުﷲ އަލިމަނިކު ވެސް ހުރީ އެ މައްސަލަގައި ހައްޔަރުކޮށްފަ އެވެ.
ނަޝީދު އަވަހާރަކޮށްލަން މިދިޔަ ރޯދަ މަހު ދިން ހަމަލާއަށްފަހު އެމަނިކުފާނުގެ ފުރާނަފުޅު ސަލާމަތް ކުރުމަށް އޭޑީކޭގެ ޑޮކްޓަރުން ނަޝީދުގެ ހަށިކޮޅުގައި ގާތްގަނޑަކަށް 16 ގަޑިއިރުގެ ސާޖަރީތަކެއް ހެދި އެވެ. ބޮމުގެ ތެރެއަށް އަޅާފައި އޮތް 10 ރޭޒާ ފުއް އެމަނިކުފާނުގެ ހަށިކޮޅުން ނެގި އެވެ. އަދި ބޮން ހަރުކޮށްފައި ހުރި ސައިކަލުގެ ޕްލާސްޓިކު އެތިކޮޅެއް ވެސް ހަށިގަނޑުން ފެނުނެވެ.
