ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ބޮމެއް ގޮއްވާލައި ދިން ޓެރަރިސްޓް ހަމަލާއަށް ފަހު, ފުލުހުންނާއި ސިފައިން ހިންގި އޮޕަރޭޝަނުގައި ހައްޔަރުކުރި ހަރުކަށި ފިކުރުގެ މީހުންގެ ތެރޭގައި، ހަމަލާ ދިނުމުގައި ބައިވެރިވި ބޮޑެއް ހިމެނޭކަން "އަދަދު"އަށް އެނގިއްޖެ އެވެ.
އެނގިފައިވާ ގޮތުގައި ހަމަލާ ރާވައި، ހިންގުމުގައި އަމަލީ ގޮތުން އިސް ދައުރެއް އަދާކުރި ކަމުގެ ތަހުމަތުކޮށް ތަހުގީގު ކުރަމުން ދަނީ މ. ކުދެހިގޭ, އިސްހާގު، 42، ގެ މައްޗަށެވެ.
އޭނާގެ މައްޗަށް އެންމެ ފުރަތަމަ ކުރީ ހަރުކަށި ފިކުރު ފެތުރުމުގެ ތުހުމަތެވެ. އެ ތުހުމަތުގެ ބަންދުގައި އިސްހާގު ހުއްޓައި، އިތުރު ހެކި ފުލުހުންނަށް ނުދެއްކިގެން ބަންދުން ދޫކޮށްލި އެވެ.
އެކަމަކު ފަހުން އަނެއްކާވެސް ހަމަ އެދުވަހު އޭނާ ހައްޔަރުކުރީ އެ ހަމަލާގައި ތުހުމަތުކުރެވޭ އިތުރު މީހަކާ އެކުގަ އެވެ.
ނަޝީދަށް ހަމަލާ ދިނުމުގައި އިސްހާގު ބައިވެރިވި ކަމުގެ ތުހުމަތުކޮށް އޭނާ ބަންދު އިތުރުކޮށްފައިވަނީ މި މަހުގެ 6 ގަ އެވެ. އެފަހަރު ޖެހި 15 ދުވަހުގެ ބަންދުގެ މުއްދަތަށް ފަހު، މި މަހުގެ 22 ގައި 30 ދުވަހަށް ބަންދު ވަނީ އިތުރުކޮށްފަ އެވެ.
އިސްހާގާ ގުޅޭ ގޮތުން ފުލުހުން މިހާތަނަށް ރަސްމީކޮށް އެއްވެސް އެއްޗެއް ނުބުނެ އެވެ.
ނަޝީދަށް ދިން ހަމަލާއާ ގުޅިގެން ތަހުގީގު ނިންމައި ހަތަރު މީހެއްގެ މައްޗަށް ދައުވާކުރަން ފުލުހުން ވަނީ ޕްރޮސިކިއުޓަ ޖެނެރަލަށް ފޮނުވައިފަ އެވެ.
އެ މީހުންނަކީ، ހަމަލާގައި އަމަލީ ގޮތުން ބައިވެރިވި ކަމުގެ ތުހުމަތުވާ އަހުމަދު އަދުހަމް، 25، އާއި މުޖާޒް އަހްމަދު 21، އާއި ތަހުމީން އަހްމަދު، 32 އަދި އަހުމަދު ފާތިހު، 23، އެވެ.
ނަޝީދަށް ހަމަލާ ދިނުމުގައި ބައިވެރިވާ ކަމަށް ތުހުމަތުކުރެވޭ އިތުރު ދެ މީހަކާ އެކު، ހަމަލާގެ ތުހުމަތު ޖުމުލަ ހަތް މީހެއްގެ މައްޗަށް ކުރެ އެވެ. މި އެންމެން ތިބީ ފުލުހުންގެ ބަންދުގަ އެވެ. ދައުވާކުރަން ފޮނުވި މީހުން، ޝަރީއަތް ނިމެންދެން ބަންދުގައި ބެހުއްޓުމަށް ވެސް ކުރިމިނަލް ކޯޓުން ވަނީ ނިންމައިފަ އެވެ.
މިދިޔަ މެއި މަހުގެ ތެރޭގައި ނަޝީދަށް އަމާޒުކުރި ހަމަލާގައި އަމަލީ ގޮތުން އުޅުނު މީހުން ހައްޔަރުކޮށްފައިވާ ކަން ފުލުހުން ހާމަކުރުމާ އެކު ކަންބޮޑުވުމަކަށް ވީ ހަމަލާ ރާވައި ހިންގުމުގައި އަދި ހަރަދުކުރި ބަޔަކު ނުހޯދިދާނެ ކަމެވެ. އެކަމަކު, އެ ބަޔަކު ހޯދުމަކީ ތަހުގީގުގެ އިސް އަމާޒެއް ކަމަށް ފުލުހުން ވަނީ ބުނެފަ އެވެ.
އެ ތަހުގީގައި ފުލުހުން އަންނަނީ ބޭރުގެ މާހިރުންގެ ވެސް އެހީ ހޯދަމުންނެވެ.
