މެންޗެސްޓާ (ޖުލައި 21) - މި ސީޒަނުގެ ނިޔަލަށް މެންޗެސްޓާ ޔުނައިޓެޑާ އެކު ކޮންޓްރެކްޓްގައި ހުރި ފްރާންސްގެ މިޑްފީލްޑަރު ޕައުލް ޕޮގްބާ އަންނަ އަހަރު ހިލޭ ޓްރާންސްފާއެއްގައި ކްލަބް ބަދަލުކުރުމުގެ ވިސްނުން ގެންގުޅޭ ކަމަށް މީޑިއާތަކުން ރިޕޯޓްކޮށްފި އެވެ.
އުމުރުން 28 އަހަރުގެ ޕޮގްބާ ޔުނައިޓެޑާ އެކު ހަދާފައިވާ އެއްބަސްވުން އަންނަ އަހަރުގެ ޖޫންގެ ނިޔަލަށް ހަމަވާނެ އެވެ. އަންނަ ޖެނުއަރީ މަހުގެ ކުރިން ޔުނައިޓެޑާ އެކު ޕޮގްބާ އާ އެއްބަސްވުމެއްގައި ސޮއިނުކުރާނަމަ އެ މަސް ތެރޭގައި އޭނާ ބޭނުން ކޮންމެ ކްލަބަކާ މަޝްވަރާކޮށް ހިލޭ ޓްރާންސްފާއެއްގައި ސީޒަން ނިންމާފައި އެ ޓީމަކާ ގުޅެން ޕްރީ އެގްރީމެންޓެއް ހެދޭނެ އެވެ.
މީގެ ކުރިން ޕޮގްބާ ހޯދަން ރެއާލް މެޑްރިޑާއި ޕީއެސްޖީން މަސައްކަތްކުރި ނަމަވެސް ޔުނައިޓެޑުން އޭނާ ވިއްކާލަން ބޭނުމެއް ނުވި އެވެ. ޔުނައިޓެޑުން އޭނާ ވިއްކާލަން ކިޔާ އަގުބޮޑުވުމުން އެ ޓްރާންސްފާ ކުރިއަށް ނުގެންދެވޭނެ ކަމަށް މިދިޔަ އަހަރު ރެއާލްގެ އޮފިޝަލަކު ވަނީ ސްޕެއިނުގެ ނޫހަކަށް ދިން އިންޓަވިއުއެއްގައި ބުނެފަ އެވެެ.
ޕޮގްބާގެ އޭޖެންޓް މިނޯ ރައިއޯލާ ވަނީ ޕޮގްބާ ޔުނައިޓެޑާ އެކު އާ އެއްބަސްވުމެއް ދެން ނަހަދާނެ ކަމަށް ބުނެފަ އެވެ.
ފްރާންސް ގައުމީ ޓީމަށް ކުޅެން ދާ ކޮންމެ ފަހަރަކު ޕޮގްބާގެ މުސްތަގުބަލާ ގުޅޭގޮތުން ނޫސްވެރިން ކުރާ ގިނަ ސުވާލުތަކަކަށް އޭނާ ޖަވާބު ދެ އެވެ. މިދިޔަ އަހަރު ޕޮގްބާ ވަނީ ކްލަބް ކެރިއަރުގައި ފަހަކަށް އައިސް ތަށި ހޯދަން ކުރާ މަސައްކަތުގައި ކާމިޔާބެއް ނުލިބޭތީ ކެރިއަރަށް އަސަރުކުރާ ކަމަށް ބުނެފަ އެވެ.
ފްރާންސްގެ ނޫސްތަކުން ރިޕޯޓްކުރާ ގޮތުގައި އެއީ ކްލަބް ބަދަލުުކުރަން ބޭނުންވާކަން އަންގަން ޕޮގްބާ ދިން ނުސީދާ މެސެޖެކެވެ.
ޔުނައިޓެޑްގައި ޕޮގްބާ އެންމެ ފަހުން ކާމިޔާބުކުރި މުބާރާތަކީ 2017 ވަނަ އަހަރުގެ ޔޫރޮޕާ ލީގެވެ. އޭގެ ފަހުން މި ދިޔަ ސީޒަނުގެ ޔޫރޮޕާ ލީގުގެ ފައިނަލުން ޔުނައިޓެޑް ވަނީ ވިޔަރެއާލް އަތުން ބަލިވެފަ އެވެ.
ފްރާންސްގެ މަޝްހޫރު ލެ ހާވްރޭ އެކެޑަމީން ފާހަގަވި ޕޮގްބާ ޔުނައިޓެޑްގެ އެކަޑަމީން އަށް ބަދަލުވީ 2009 ވަނަ އަހަރު އެވެ. ޔުނައިޓެޑްގެ އެކަޑަމީން ތަމްރީންވި ޕޮގްބާ ވިދާލީ 2012 ވަނަ އަހަރު ހިލޭ ޓްރާންސްފާއެއްގައި ޔުވެންޓަސްއާ ގުޅި ދައްކަން ފެށި މޮޅު ކުޅުމާ އެކު އެވެ. އޭނާގެ ކެރިއަރުގައި ބޮޑެތި ކަންކަން ހާސިލްކޮށްފައިވަނީ ޔުވެންޓަސް އަށް ކުޅުނުއިރު އެވެ.
ޔުނައިޓެޑުން އޭނާ އަނބުރާ ގަތީ 2016 ވަނަ އަހަރު 105 މިލިއަން ޔޫރޯ އަށެވެ. މިއީ އޭރު ދުނިޔޭގެ ރެކޯޑް ފީ އެކެވެ.
ޕޮގްބާ ލައްވައި ދިގު ކޮންޓްރެކްޓެއްގައި ސޮއިކުރުވަން ޔުނައިޓެޑްގެ ކޯޗު އޮލެ ގުނަ ސޯލްޝެއާ ބޭނުންވެ އެވެ. އެކަމަކު، އެކަން ކުރަން އޮތް ހުރަހަކީ ޕޮގްބާ ޑިމާންޑްކުރާ ވަރުގެ ބޮޑު މުސާރައެއް ދޭން ޔުނައިޓެޑްގެ މެނޭޖްމަންޓުން ދެކޮޅު ހެދުން ކަމަށް އިނގިރޭސި ބައެއް މީޑިއާތަކުން މިދިޔަ ސީޒަން ތެރޭގައި ވަނީ ރިޕޯޓްކޮށްފަ އެވެ.
