ސަރުކާރު ހިންގާ ކޯލިޝަނުގައި ހިމެނޭ ބައެއް ޕާޓީތައް ރުއްސުމަށް އެމްޑީޕީގެ ޒަމާންވީ އުސޫލުތަކާއި އަސާސްތައް ހިފެހެއްޓުމަށް ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ގޮވާލައްވާފައިވާ ގޮވާލެއްވުމަށް ތާއީދުކޮށް އެމްޑީޕީގެ ބައެއް ގުނަންތަކުން ތެދުވެއްޖެ އެވެ.
ރައީސް އިބްރާހިމް މުހައްމަދު ސޯލިހުއާ ދެމެދު އެއްވެސް މައްސަލައެއް ނެތް ކަމަށާއި އެކަމަކު އެމަނިކުފާނާ އެކު ސިޔާސީ ގޮތުން ދެން ހުންނެވެން ނެތް ކަމަށް ވިދާޅުވެ ނަޝީދު ގެންދަވަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
އެގޮތުން، ކޯލިޝަނުގައި ހިމެނޭ އަދާލަތު ޕާޓީގެ ނަން ވަކިން ފާހަގަކުރައްވައި ނަޝީދު ވިދާޅުވީ ސަރުކާރުގެ ހުރިހާ ނިންމުތަކަކަށް ނުފޫޒު ފޯރުވަން ރައީސް ސޯލިހު ފުރުސަތު ދެއްވުމުގެ ސަބަބުން މުޅި ކޯލިޝަނުން ގަބޫލުކުރާ ޑިމޮކްރެޓިކް އަސާސްތައް މުގުރާލާފައިވާ ކަމަށެވެ.
ނަޝީދު އެހެން ވިދާޅުވުމާ ގުޅިގެން، އެކަމަށް ތާއީދުކޮށް އެންމެ ފުރަތަމަ ބަޔާނެއް ނެރުނީ އެމްޑީޕީގެ ޒުވާނުންގެ ހިތްވަރުންނެވެ.
އެ ބަޔާނުގައި މައިގަނޑު ގޮތެއްގައި ނަޝީދު ދެއްކެވި ވާހަކަފުޅުތައް ތަކުރާރުކުރަމުން އެމްޑީޕީން ރައްޔިތުންނަށް ވެފައިވާ ވައުދުތައް ފުއްދުން ހަލުވިކުރުމަށާއި، ޕާޓީގެ އަސާސްތަކަށް ސަރުކާރުން އިހުތިރާމްކޮށް ދިފާއުކޮށް ދިނުމަށް ވަނީ ގޮވާލައިފަ އެވެ.
އެމްޑީޕީގެ ޒުވާނުންގެ ރޫހުގެ އިތުރުން، ޕާޓީގެ އަންހެނުންގެ ރޫހުން ވެސް ރޭ ވަނީ ނަޝީދުގެ ވާހަކަތަކަށް ތާއީދުކޮށް ބަޔާނެއް ނެރެފަ އެވެ. އެ ބަޔާނުގައި ވެސް ގޮވާލާފައިވަނީ އެމްޑީޕީން ރައްޔިތުންނަށް ވިއްކި ވައުދުތައް ފުއްދުން އަވަސްކޮށް، އެމްޑީޕީގެ އަސާސްތަކަށް އިހުތިރާމްކުރުމަށް ސަރުކާރަށް ގޮވާލައިފަ އެވެ.
ދާދި ފަހުން ނަޝީދު ވިދާޅުވީ އެމްޑީޕީގެ ލީޑާޝިޕުން ބޭނުންވަނީ ކޯލިޝަން ދަމަހައްޓަން ޑިޕްލޮމަސީ އާއި ދޫދިނުން އެކަންޏެއް ނޫން ކަމަށާއި، ރައްޔިތުން ބޭނުންވާ އިގުތިސޯދީ ކުރިއެރުމާއި، މިނިވަންކަމާއި ހަމަހަމަކަން ދެމެހެއްޓުމުގެ ހިތްވަރު ވެސް ބޭނުންވާ ކަމަށެވެ.
އެގޮތުން، މި ފަހުން ސަރުކާރުން ހުށަހެޅި ނަފްރަތު އުފެއްދުން ހުއްޓުވުމުގެ ބިލާ ގުޅޭގޮތުން ކަން ހިނގައިދިޔަ ގޮތް ނަޝީދު ހާއްސަކޮށް ފާހަގަކުރައްވާފައިވެ އެވެ.
ނަޝީދު ވިދާޅުވި ގޮތުގައި ދީނާ ގުޅުވައިގެން ނަފްރަތު އުފެއްދުން ކުށަކަށް ހަދަން ގާނޫނުލްއުގޫބާތު އިސްލާހުކުރަން ސަރުކާރުން މަޖިލީހަށް ހުށަހެޅީ ކުރިން ހިނގާފައިވާ ޑރ. އަފްރާޝީމް އަލީ، ޔާމީން ރަޝީދު އަދި އަހުމަދު ރިލްވާން އަނިޔާވެރިކޮށް މަރާލުމުގެ އިތުރުން އެމަނިކުފާނު ވެސް އަވަހާރަކޮށްލަން ދިން ޓެރަރިސްޓު ހަމަލާގެ ފަހަތުގައި އޮތީ މީހުން ކާފަރެއްގެ ގޮތުގައި ސިފަކޮށް އެބަޔެއްގެ ލޭ ހުއްދަކުރުން ކަމަށް ވިސްނިގެން ކަމަށެވެ.
ނަމަވެސް، އަދާލަތު ޕާޓީން އިސްވެ އެ ބިލާ ދެކޮޅު ހެދުމުން، ސަރުކާރުން އަމިއްލަ ހުށަހެޅި ބިލަށް ކުރި ތާއީދު އަނބުރާ ގެންދިޔައީ، ސަރުކާރުގެ ތެރޭގައި ތިއްބެވި ބޭފުޅުންނާ މެދު ވެސް ނަފުރަތު އުފައްދައި، ހަމަ އެފަދަ ނުރައްކާތެރިކަމަށް ހުށަހެޅިދާނެތީ ކަމަށް ނަޝީދު ތުހުމަތު ކުރެއްވި އެވެ.
"އެހެންކަމުން މި ބިލަށް ތާއީދުކޮށް، ގަބޫލުކުރާ ހަމަތަކުގެ މަތީގައި ސާބިތުވެ ތިބުމުގެ ލީޑާޝިޕް މި ސަރުކާރަށް ނުދެއްކޭނަމަ، އަޅުގަނޑަށް މި ސަރުކާރަށް ތާއީދުކުރަން ވަރަށް ދަތި،" ނަޝީދު ވިދާޅުވި އެވެ.
