ކޯލިޝަން ވެރިކަމެއް ގެނެސް ދައުރުގެ މެދުތެރެއިން ރައީސް އިބްރާހިމް މުހައްމަދު ސޯލިހާ އެކުގައި ސިޔާސީ މަސައްކަތް ނުކުރައްވާނެ ކަން އިއުލާންކުރައްވައި އިދިކޮޅު ޕީޕީއެމާ ކޯލިޝަން ހެއްދެވުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކުރިއަށް ނެރުއްވި ވިސްނެވުން މުރާޖައާ ކުރެއްވުމަކީ މިވަގުތަށް އެންމެ ރަނގަޅު ގޮތް ކަމަށް ދެކެވަޑައިގަންނަވާ ކަމަށް ހޯމް މިނިސްޓަރު އަދި ކޯލިޝަންގެ އެއް ލީޑަރު އިމްރާން އަބްދުالله މިދިޔަ އަންގާރަދުވަހު ވިދާޅުވެއްޖެ އެވެ.
މި ވެރިކަން އުފެއްދީ އެމްޑީޕީ އިސްވެ އޮވެ ޖުމްހޫރީ ޕާޓީ އާއި އަދާލަތު ޕާޓީގެ އިތުރުން ކުރީގެ ރައީސް މައުމޫން އަބްދުލްގައްޔޫމް ހިމެނިވަޑައިގެންނެވި ކޯލިޝަނަކުންނެވެ. މި ކޯލިޝަންގެ މައި ޕާޓީގެ އިސް ދެ ލީޑަރުންގެ ގޮތުގައި ތިއްބެވި ރައީސް ސޯލިހާއި ރައީސް ނަޝީދާ ދެމެދު އުފެދުނު ހިޔާލުތަފާތުވުންތައް ބޮޑުވެ, ސިޔާސީ މަސައްކަތުގައި ރައީސް ސޯލިހްއާ އެކު އިތުރަށް ކުރިއަށް ވަޑައިގަންނަވަން ބޭނުންފުޅެއް ނުވެ އެވެ. އެކަން ނަޝީދު އިއުލާންކުރައްވައި ބޭނުންފުޅު ވަނީ އިދިކޮޅު ލީޑަރު, ކުރީގެ ރައީސް އަބްދުالله ޔާމީނާ އެކު އެމްޑީޕީ/ ޕީޕީއެމް ހިމެނޭ ސަރުކާރެއް ހިންގަވަން ކަމަށް ވަނީ ވިދާޅުވެފަ އެވެ.
ނަޝީދު މިކަން ދުނިޔެއަށް ވެސް އިއުލާންކުރައްވާފައިވާ އިރު, މި ވާހަކަފުޅަށް ރައީސް ސޯލިހާއި ކޯލިޝަން ލީޑަރުން ވެސް މިހާތަނަށް އެއްޗެއް ވިދާޅެއް ނުވެ އެވެ.
އެކަމަކު އިމްރާން "އަދަދު"އަށް ދެއްވި ހާއްސަ އިންޓަވިއުގައި, ކޯލިޝަންގެ އިސް ދެ ލީޑަރުން ކަމަށްވާ ރައީސް ސޯލިހް އާއި ރައީސް ނަޝީދުއާ ދެމެދު އުފެދިފައިވާ ނުތަނަވަސްކަމާ ގުޅޭ ގޮތުން ސުވާލުކުރުމުން ވިދާޅުވީ މިވެރިކަން ރައްޔިތުން ގެނައި ސަބަބު ލީޑަރުން ހަނދާން ނައްތާލައިގެން ނުވާނެ ކަމަށެވެ. ރައްޔިތުންގެ އުއްމީދުތަކާއި ބޭނުންތައް ހާސިލްވެ ނުނިމެނީސް ލީޑަރުން ޒިންމާތައް ހަނދާން ނައްތާލައި މޫނު އެހެން ފަރާތަކަށް އަނބުރާލުމަކީ ކުރެވެން އޮތް ކަމެއް ނޫން ކަމަށް ވިދާޅުވި އެވެ.
ކޯލިޝަން އުފެދުނު ގޮތުގެ ހަނދާން އާކޮށްދެއްވަމުން އިމްރާން ވިދާޅުވީ ތަފާތު ސިޔާސީ ފިކުރުގެ ޕާޓީތައް 2018 ގައި ކޯލިޝަނަކާ ހަމައަށް އައީ ރައްޔިތުން ނާއުއްމީދާއި މާޔޫސްކަމުގައި ތިއްބައި އެ ހާލަތުން އަރައިގަތުމަށް ކަމަށެވެ. އެހެންކަމުން ދައުރުގެ މެދުތެރެއިން, ރައްޔިތުން އިތުރަށް މާޔޫސްވާނެ ފަދަ ކަމެއް ކޯލިޝަން ލީޑަރުން ކުރުމަކީ ރައްޔިތުންނަށް ދެވޭނެ ވަރަށް ބޮޑު ދެރައެއް ކަމަށް އޭނާ ދެކެވަޑައިގަންނަވަ އެވެ.
"ލީޑަރުން އެބަޖެހޭ ވަރަށް ބޮޑަށް ޒިންމާދާރުވާން. ލީޑަރުން އެބަޖެހޭ ވަރަށް ކެތްތެރިވާން. ލީޑަރުން އެބަޖެހޭ ވަރަށް ބޮޑަށް މަޝްވަރާކުރަން. ލީޑަރުން އެބަޖެހޭ މާފްކުރަން, ހުރި ހިޔާލުތަފާތުވުންތައް ނައްތާލަން މަސައްކަތް ކުރަން," އިމްރާން ވިދާޅުވި އެވެ.
"އަޅުގަނޑު ގަބޫލުކުރާ ގޮތުގައި ރައީސް ނަޝީދު [އެކުގައި މަސައްކަތް ނުކުރެއްވުމުގެ] އެ ވިސްނުންފުޅު އަލުން މުރާޖައާ ކުރައްވަން ޖެހިވަޑައިގަންނަވާ."
ސަބަބަކީ އިމްރާން ވިދާޅުވި ގޮތުގައި ރައްޔިތުންނަށް ވީ ވައުދުތަކުގެ މަތން ހަނދާން ނައްތާލައި މާޔޫސްކޮށްލުމަކީ އެއްގޮތަކަށް ވެސް ކުރުން ހެޔޮނުވާނެ ކަމަކަށް ވާތީ އެވެ.
ނަޝީދާއި އެމްޑީޕީގެ ލީޑަޝިޕުގެ ކަންބޮޑުވުމަކީ ރައްޔިތުންނަށް ވައުދުވި ގޮތަށް އަދި އެމްޑީޕީގެ މެނިފެސްޓޯއާ އެއްގޮތަށް ވައުދުތައް ނުފުދި ސަރުކާރުގެ މިސްރާބު ގޯސްވެފައިވުން ކަމަށް ގެންދަވަނީ ވިދާޅުވަމުންނެވެ. އެކަމަކު އަދާލަތު ޕާޓީން ދެކޭ ގޮތުގައި ސަރުކާރުގެ މިސްރާބު ހުރީ ވައުދުތައް ފުއްދައި ނަތީޖާ ނެރެދިނުމާ ދިމާލަށެވެ.
މި މަސައްކަތުގައި އެ ޕާޓީ ވެސް ބައެއް ފަހަރު ހިތްހަމަނުޖެހޭ ސިޔާސަތުތައް ހުންނަ ކަމަށާއި އެއް ކަމަކީ ނަފްރަތުގެ ބިލް ކަމަށް އިމްރާން ވިދާޅުވި އެވެ. އެ ބިލު ހުށަހެޅީ އަދާލަތާ މަޝްވަރާނުކޮށް ކަމަށާއި އެ ބިލުގައި އެ ޕާޓީން ކަންބޮޑުވާ ކަންތައްތަކެއް ހުރި ކަމަށް ވިދާޅުވި އެވެ.
އެކަމަކު ރައްޔިތުންގެ ތެރޭގައި އުފެދިގެންދާ ނަފްރަތުގެ ސަބަބުން އިންސާނުންގެ މުދަލާއި ފުރާނައަށް ގެއްލުންވާ ދަރަޖައަށް ދާ ވަރުގެ ކަންތައްތައް ނައްތާލަން ގާނޫނީ އޮނިގަނޑެއް ގާއިމްކުރަން ޖެހޭ ކަމަށް ދެކެވަޑައިގަންނަވާ ކަމަށް ވިދާޅުވި އެވެ. އެކަމަކު އެކަން ކުރަން ވާނީ ހަމަނުޖެހުމަށް ޖާގަ ލިބޭ ގޮތަށް ނޫން ކަމަށާއި ނަފްރަތު ހުއްޓުވަން މަގުފަހިވާގޮތަށް ކަމަށް އިމްރާން ވިދާޅުވި އެވެ.
މިނިސްޓަރު ވިދާޅުވި ގޮތުގައި ނަފްރަތުގެ ބިލަކީ ސަރުކާރުން ކުރާ ވަރަށް ގިނަ މަސައްކަތްތަކުގެ ތެރެއިން އެއް މަސައްކަތެވެ.
ކޯލިޝަން ޕާޓީގެ ގޮތުގައި ދެމިއޮތަސް ގޯހުން ހުރި ކަންކަން ސަރުކާރަށް ދައްކުވައިދިން ކަމަށާއި މިގޮތަށް ހިނގައިދާ ބައެއް ކަންކަމަކީ ސަރުކާރުގެ މިސްރާބު ގޯސްކަމަށް ކަނޑައަޅަން ޖެހޭ ސަބަބެއް ނޫން ކަމަށް ވިދާޅުވި އެވެ.
ރައްޔިތުން ނުތަނަވަސްވާ އަދި އުއްމީދުތަކާ ހަމައަށް ވާސިލްނުވެވޭ ކަންކަން އެބަހުރި ކަމަށާއި އެއާއެކު ރައްޔިތުން ބޭނުންވާ ކަންކަން ވެސް ފުއްދެމުން އަންނަ ކަމަށް ވިދާޅުވި އެވެ. ކޮވިޑުގެ ދަތި ހާލަތާ އެކު ގިނަ ކަންކަން ލަސްވި ކަމަށާއި އެއީ ބަހަނާއެއް ނޫން ކަމަށް އިމްރާން ވިދާޅުވި އެވެ.
"ކަންކަން އިފްތިތާހްކުރަން އޮންނަ ދުވަހު ވެސް ކަރަންޓީނަށް ދާން ޖެހުން ފަދަ ކަންކަން ވެގެން އެބަ މެދުކެނޑޭ. މިހާތަނަށް ރަނގަޅަށް މަސައްކަތްތަކެއް ކުރެވިފައިވޭ. އެންމެ ރަނގަޅު ނަތީޖާއާ ހަމައަށް ނުދެވޭ ކަންކަމުގައި ހުރަސްތަކެއް އެ ހިސާބަށް ނުދެވުމުގައި ވެސް އެބަހުރި," އިމްރާން ވިދާޅުވި އެވެ.
މި ސަރުކާރުގެ ސިޔާސަތުތައް ކަނޑައަޅައި މަސައްކަތްތައް ކުރަނީ އާއްމު ރައްޔިތުންނާ ވަރަށް ބޮޑަށް މަޝްވަރާކުރެވިގެން ކަމަށް އިމްރާން ވިދާޅުވި އެވެ. ކޯލިޝަން ވެރިކަމަށް ބަލާ ނަމަ މަޝްވަރާގެ އުސޫލް އެންމެ ބޮޑަށް ކުރިއަށް ނެރޭ ސަރުކާރަކީ މިއީ ކަމަށް އިމްރާން ވިދާޅުވި އެވެ.
އިމްރާން ވިދާޅުވީ ކޯލިޝަން ސަރުކާރެއް ކާމިޔާބުވާ ނަމަ ރައީސް އިބްރާހިމް މުހައްމަދު ސޯލިހަށް އެކަން ކުރެއްވޭނެ މަންޒަރު ދެ އަހަރާއި ބައިގެ ތެރޭގައި ފެންނަމުންދާ ކަމަށެވެ. ހިޔާލުތަފާތުވުންތަކާއި މައްސަލަތައް ހުއްޓަސް ކަންކަމުގައި ހައްލު ހޯދޭނެ ކަމަށާއި މިކަމުގައި އޮތް އެންމެ ރިވެތި އުސޫލަކީ ލީޑަރުން މަޝްވަރާގެ މަގު އިހްތިޔާރުކުރުން ކަމަށް އިމްރާން ވިދާޅުވި އެވެ.
