މިިދިޔަ ސީޒަނުގައި ދަ ގްރާންޑޭ ސްޕޯޓްސް ކްލަބްގެ ކެޕްޓަން ބޭންޑް އަޅައިގެން ކުޅުނު ހުނަރުވެރި މިޑްފީލްޑަރު ޔަސްފާދު ހަބީބު (މުލަކޭ)، ސުޕަ ޔުނައިޓެޑް ސްޕޯޓްސް (ސަސް) އަށް ސޮއިކޮށްފި އެވެ.
ސަސްގެ ސްޕޮންސަރުންގެ އަގުވަޒަންކުރަން ރޭ ސަސްގެ ކޮފީ ކްލަބްގައި ބޭއްވި ހަފްލާގައި މުލަކޭ, 28, ވަނީ ސަސްގެ ކުޅުންތެރިއެއްގެ ގޮތުގައި ތައާރަފްކޮށްފަ އެވެ.
ފުރަތަމަ ޑިވިޝަނުގައި ކްލަބް އީގަލްސްގައި މޮޅު ކުޅުމެއް ދެއްކި މުލަކޭ ވަނީ މާޒިޔާ އަށް ބަދަލުވެ، އެ ޓީމާ އެކު ރަނގަޅު ކާމިޔާބީތަކެއް ހޯދައިފަ އެވެ. މާޒިޔާގައި ރަނގަޅު އަހަރުތަކެއް ހޭދަކުރުމަށް ފަހު މުލަކޭ ދަ ގްރާންޑޭ އަށް އަށް ބަދަލުވީ މީގެ ދެ ސީޒަން ކުރިންނެވެ. އޭނާ ވަނީ މިދިޔަ ސީޒަނުގައި ދަ ގްރާންޑޭ އިން ލީގުގައި ކުޅުނު 14 މެޗުގައި ވެސް ކުޅެފަ އެވެ. އަދި އެ މެޗުތަކުގައި ހަތަރު ގޯލު ޖަހައި ތިން ގޯލު ޖަހަން ފުރުސަތު ވެސް ތަނަވަސްކޮށްދިނެވެ.
މުލަކޭ ވަނީ ގިނަ ފަހަރުތަކެއް މަތިން ގައުމީ ޓީމުގައި ވެސް ހިމެނިފަ އެވެ. މިދިޔަ މަހު އޮތް ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިން އަށް އެންމެ ފުރަތަމަ ނެގި ސްކޮޑުގައި މުލެކޭ ހިމެނެ އެވެ. އެކަމަކު، ކޮވިޑް-19 އަށް ޕޮޒިޓިވްވުމުން އޭނާ އަށް ޓީމާ އެކު ދެވޭ ގޮތެއްނުވި އެވެ.
މިދިޔަ ފަހަރު ލީގުގައި ސަސްއާ ދެކޮޅަށް ކުޅުނު މެޗުގެ ތެރެއިން މުލަކޭ ބޯޅަ ހިފައިގެން.-- ފޮޓޯ: ހުސެއިން ވަހީދު/ އަދަދު
ސަސް އިން ރޭ ބޭއްވި އިވެންޓް ޝަރަފްވެރި ކޮށްދެއްވީ އެފްއޭއެމްގެ ރައީސް ބައްސާމް އަދީލް ޖަލީލް އާއި ރައްޔިތުންގެ މަޖިލީހުގެ ދަގެނތީ ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު މުހައްމަދު ނާޒިމް އެވެ.
މި އިވެންޓްގައި ވާހަކަ ދައްކަވުމުން ނާޒިމް ވިދާޅުވީ ޓީމެއް ހިންގުމަކީ ފަސޭހަކަމެއް ނޫން ކަމަށާއި ވަރަށް ޗެލެންޖިން ކަމެއް ކަމަށެވެ. ސަސްގެ މެނޭޖްމަންޓުން ރަނގަޅު ސްޕޮންސަރުންތަކަކާ ގުޅިގެން މިހާތަނަށް ކުޅުންތެރިން ބެލެހެއްޓުމާ ގުޅޭ ކަންކަން ފުރިހަމަކުރަން ކޮށްފައިވާ މަސައްކަތް ބަލައިގަންނަން ޖެހޭ ކަމަށް ނާޒިމް ވިދާޅުވި އެވެ.
"އަޅުގަނޑަށް މައުލޫމާތު ލިބިފައިވާ ގޮތުގައި މި ކްލަބް އުފެއްދުމުގައި އެންމެ އިސްކޮށް ހަރަކާތްތެރިވި އެއް ފަރާތަކީ އަލީ އަޝްފާގު. މި ކްލަބްގެ އިސް ފަރާތެއް ކަމަށްވާ އަލީ އަޝްފާގަކީ ތި ހުރިހާ ކުޅުންތެރިން ނަމޫނާ އަކަށް ބަލަން ޖެހޭ ކުޅުންތެރިއެއް،" ނާޒިމް ވިދާޅުވި އެވެ.
"ދިވެހިރާއްޖޭގައި އުފެދުނު އެންމެ ވަރުގަދަ ކުޅުންތެރިޔާގެ ގޮތުގައި އަލީ އަޝްފާގު އެ ހުންނެވީ. އެހެންކަމުން އަލީ އަޝްފާގުގެ ކިބައިން އެ ފެނުނު ހުރިހާ ރަނގަޅު ސިފައެއް ތި ހުރިހާ ކުޅުންތެރިން މިއަދު ބަލައިގަންނަން ވާނެ. ބަލައިގަނެ އެކަންކަން ތި އެންމެންގެ ފިޒިކަލީ އަދި މެންޓަލީ ހަށިގަނޑުގައި އަށަގަނެފިނަމަ މި ކްލަބަށް ވުރެ ވަކި ވަރުގަދަ ކްލަބެއް ދިވެހިރާއްޖޭގައި އުފެންވެގެނެއް ނުދާނެ،"
ސަސްގެ ކޯޗަކަށް މުހައްމަދު ޝިޔާޒް (މޯހަން) ކަހަލަ ތަޖުރިބާކާރު ކޯޗެއް ހުރުމަކީ ވެސް އެ ކްލަބަށް ލިބޭ ވަރަށް ބޮޑު ކުރިއެރުމެއް ކަމަށް ނާޒިމް ވަނީ ވިދާޅުވެފަ އެވެ.
ރޭގެ ހަފްލާގައި ވަނީ ސަސްގެ ޕާޓްނަރުންނަށް ހަދާނީ ފިލާ ހަވާލުކޮށްފަ އެވެ. އެ ކްލަބްގެ ޕާޓްނަރުންނަކީ ސްޓެލްކޯ، ލިޓަސް ގްރޫޕް، އެސްޖޭ ކޮންސްޓްރަކްޝަން، މޯލްޑިވްސް ވޭވް، ހީނާ މޯބައިލްސް އަދި ފަތަހަ ގްރޫޕް އެވެ.
މިދިޔަ ސީޒަނުގައި އަލަށް ފުރަތަމަ ޑިވިޝަނުގައި ވާދަކޮށް ސަސް އިން ސީޒަން ނިންމާލީ ހަ ވަނައިގަ އެވެ. ސީޒަން ފެށިއިރު ސަސް އަށް ކޯޗުކޮށްދިނީ އަހުމަދު ނާޝިދު (ނާދު) އެވެ. ވަކި ހިސާބަކުން މޯހަން ޓީމާ ހަވާލުވި އެވެ. ސަސް އަށް ލީގުގައި ކުޅުނު 14 މެޗުން ލިބުނީ 15 ޕޮއިންޓެވެ. ތިން މެޗުން މޮޅުވިއިރު، ހަ މެޗުން އެއްވަރު އަދި ފަސް މެޗުން ވަނީ ބަލިވެފަ އެވެ.
