ބެލްގްރޭޑް (ޖުލައި 17) - އަންނަ ހަފްތާގައި ޖަޕާނުގެ ޓޯކިޔޯގައި ފަށާ އޮލިމްޕިކްސްގެ ޓެނިސް އިވެންޓުގައި ކުޅެން ނިންމާފައިވާ ކަމަށް ދުނިޔޭގެ ފިރިހެން އެއް ވަނަ ޓެނިސް ކުޅުންތެރިޔާ ނޮވަކް ޖޮކޮވިޗް ބުނެފި އެވެ.
އުމުރުން 34 އަހަރުގެ ޖޮކޮވިޗް މީގެ ކުރިން ބުނީ ޓޯކިޔޯ އޮލިމްޕިކްސްގައި އޭނާ ފެނުމުގައި އޮތީ 50-50 ފުރުސަތެއް ކަމަށެވެ. އެއީ ޖަޕާނުގައި ކޮވިޑް-19ގެ ކޭސްތައް އިތުރުވެފައިވާ ދަނޑިވަޅަކަށްވާތީ އެހާ ބޮޑަށް ބަލި ފެތުރިފައިވަނިކޮށް މެޗުތަކެއް ކުޅެން ދިއުން އެންމެ ރަނގަޅު ކަމަށް ނުފެންނާތީ އެވެ.
އެކަމަކު، ޖޮކޮވިޗް އިއްޔެ ވަނީ އޮލިމްޕިކްސްގައި ވާދަކުރާ ސާބިއާގެ ޑެލިގޭޝަނާ އެކު އަށް ދުވަހުގެ ތެރޭގައި ޖަޕާނަށް ދާނެ ކަމަށް ބުނެ ޓްވީޓެއްކޮށްފަ އެވެ.
"ޓޯކިޔޯ އަށް ދާން އަހަރެން ފްލައިޓެއް ބުކް ކޮށްފިން،" ޖޮކޮވިޗް ބުންޏެވެ.
އޮލިމްޕިކްސްގައި މިހާތަނަށް ޖޮކޮވިޗަށް ލިބުނު ކާމިޔާބަކީ 2008ގެ ބެއިޖިން އޮލިމްޕިކްސް އިން ލޯ މެޑެއްޔެކެވެ.
ދާދި ފަހުން ޖޮކޮވިޗް ވަނީ ވިމްބަލްޑަން ޓެނިސް މުބާރާތް ކާމިޔާބުކޮށް ޓެނިހުގެ ދެ ލެޖެންޑުން ކަމަށްވާ ސްޕެއިނުގެ ރަފައެލް ނަޑާލް އާއި ސްވިޒަލެންޑްގެ ރޮޖާ ފެޑެރާގެ ގްރޭންޑް ސްލޭމް ރެކޯޑާ ހަމަކޮށްފަ އެވެ. އެއީ 20 ގްރޭންޑް ސްލޭމް ކާމިޔާބު ކޮށްގެންނެވެ.
މި އަހަރުގެ މިހާތަނަށް ތިން ގްރޭންޑް ސްލޭމް ތަށި ވެސް ކާމިޔާބުކުރީ ޖޮކޮވިޗް އެވެ. ގްރޭންޑް ސްލޭމްގެ ރެކޯޑާ އެކު ޖޮކޮވިޗް ދެން އަމާޒުހިފާފައިވަނީ އޮލިމްޕިކްސް އަށެވެ. އެއް އަހަރެއްގެ ހަތަރު ގްރޭންޑް ސްލޭމް އާއި އޮލިމްޕިކްސް އެންމެ ފަހުން ކާމިޔާބުކުރީ 1988 ވަނަ އަހަރު ޖަރުމަނުގެ ސްޓެފީ ގްރާފް އެވެ. ޖޮކޮވިޗަށް މި ފަހަރު އެ ރެކޯޑާ ހަމަކުރެވިދާނެ އެވެ.
ތަފާތު އެކި ސަބަބުތަކާ ހުރެ މި ފަހަރުގެ އޮލިމްޕިކްސްގައި މަޝްހޫރު ކުޅުންތެރިންތަކެއް ނުކުޅޭނެ އެވެ. އެ ގޮތުން ފެޑެރާ އާއި ނަޑާލް އަނިޔާގެ ސަބަބުން ނުކުޅޭއިރު، އިނގިރޭސި ދެ ކުޅުންތެރިން ކަމަށްވާ ޔޮހާނާ ކޮންޓަސް އާއި ޑޭން އެވަންސް ވަނީ ކޮވިޑަށް ޕޮޒިޓިވްވެ، މުބާރާތް ގެއްލިފަ އެވެ.
އަދި އަނިޔާގެ ސަބަބުން އެންޖެލިކާ ކާބާ ވެސް މި ފަހަރުގެ އޮލިމްޕިކްސް އިން ނުފެންނައިރު، އޮސްޓްރޭލިއާގެ ނިކް ކިރްގިއޯސް މުބާރާތުން ނަން ނެގީ ސަޕޯޓަރުން ނުވައްދައި މެޗުތައް ކުޅެން ނިންމި ހިސާބުންނެވެ.
އޮލިމްޕިކްސްގެ ޓެނިސް އިވެންޓު ފަށާނީ މި މަހުގެ 24 ވަނަ ދުވަހު އެވެ.
