ބާލިން، ޖަރުމަނު ވިލާތް (ޖުލައި 14) - ބޭރުގެ ސިފައިން އަފްގާނިސްތާނުން ފޭބުމަކީ "މިސްޓޭކެއް" ކަމަށާއި ތާލިބާނުންގެ އަތް ދަށުވުން ނޫން ގޮތެއް އާއްމު ރައްޔިތުންނަށް ނެތް ކަމަށް އެމެރިކާގެ ކުރީގެ ރައީށް ޖޯޖް ޑަބްލިއު ބުޝް ވިދާޅުވެއްޖެ އެވެ.
"އަފްގާން އަންހެނުންނާއި އަންހެން ކުދިންނަށް ބުނަން ވެސް ނޭނގޭހާ ބޮޑެތި ގެއްލުންތައް ވާނެ. މިއީ ބޮޑު މިސްޓޭކެއް..." ޖަރުމަނުގެ ބްރޯޑްކާސްޓަރު ޑިއުޝް ވެލްއަށް ދެއްވި އިންޓަވިއުގައި ބުޝް ވިދާޅުވި އެވެ.
އެމެރިކާ ސިފައިން އަފްގާނިސްތާނަށް އެރީ ބުޝްގެ ވެރިކަމުގައި ސެޕްޓެމްބަރު 11، 2001 ގައި ނިއު ޔޯކްގެ ވޯލްޑް ޓްރޭޑް ސެންޓަރަށް ދިން ޓެރަރިސްޓް ހަމަލާއަށް ފަހު އެވެ.
އެމެރިކާ އާއި ނޭޓޯގެ ސިފައިން އަފްގާނިސްތާނުން ފައިބަން ފެށީ މިދިޔަ މޭ މަހު އެވެ. އެމެރިކާއިން ބޭނުން ވަނީ ޓެރަރިސްޓް ހަމަލާއަށް 20 އަހަރު ފުރޭ ސެޕްޓެމްބަރު 11 ވަނަ ދުވަހުގެ ކުރިން އަފްގާނިސްތާން ދޫކޮށް އެއްކޮށް ދިޔުމަށެވެ.
އެމެރިކާ ސިފައިންގެ 90 ޕަސެންޓު މިހާރު އަނބުރާ ގައުމަށް ގޮސްފައި ވާއިރު، ނޭޓޯގެ ގިނަ ސިފައިން ވެސް މިހާރު ވަނީ ގައުމުތަކަށް ގޮސްފަ އެވެ. އެއާއެކު ތާލިބާނުން ވަނީ ހަނގުރާމަ ވަރުގަދަކޮށް އަފްގާނިސްތާނުގެ ބޮޑު ސަރަހައްދުތަކެއް ހިފަން ފަށާފަ އެވެ.
