ޕެރިސް، ފްރާންސް (ޖުލައި 13) - ޔޫރަޕިއަން ޔޫނިއަން (އީޔޫ) ގެ ކޮޕީރައިޓް ގަވާއިދުތަކާ އެއް ގޮތަށް އަމަލުކޮށްފައި ނުވާތީ ފްރާންސްގައި 593 މިލިއަން ޑޮލަރުން ގޫގުލް ޖޫރިމަނާކޮށްފި އެވެ.
ފްރާންސްގެ ކޮމްޕެޓިޝަން އޮތޯރިޓީގެ ޗީފް އިސަބެއްލާ ޑެ ސިލްވާ ވިދާޅުވީ މިއީ ގަވާއިދަކާ ހިލާފުވެގެން މިހާތަނަށް ކުންފުންޏަކަށް ކުރި އެންމެ ބޮޑު ޖޫރިމަނާގެ އަދަދު ކަމަށެވެ.
ކޮމްޕެޓިޝަން އޮތޯރިޓީގެ ވެބްސައިޓުގައި ބުނެފައިވާ ގޮތުން ޖޫރިމަނާގެ އިތުރުން މީޑިއާ ކުންފުނިތަކުގެ ކޮންޓެންޓު ބޭނުން ކުރާތީ، އެ ކުންފުނިތަކަށް ފައިސާގެ ބަދަލު ދިނުމަށް ގޫގުލްއަށް އަންގާފައި ވެ އެވެ.
އެގޮތަށް އަމަލު ނުކުރާ ނަމަ ކޮންމެ ދުވަހަކު ލިބޭ ގެއްލުމުގެ ގޮތުގައި 900،000 ޔޫރޯ ދައްކަން ޖެހޭނެ ކަމަށް ވެސް ކޮމްޕެޓިޝަން އޮތޯރިޓީން ގޫގްލްއަށް ވަނީ އަންގާފަ އެވެ.
ގޫގުލްގެ ތަރުޖަމާނަކު އޭއެފްޕީއަށް ބުނީ އެ ނިންމުމާ މެދު ވަރަށް ހިތްހަމަނުޖެހޭ ކަމަށެވެ. އަދި ގޫގުލްއިން ގަވާއިދާ އެއް ގޮތަށް އަމަލު ކުރުމަށް ކުރާ މަސައްކަތަށް ރިއާޔަތްކޮށްފައިވާ ނުވާ ކަމަށް ބުންޏެވެ.
"މި ނިންމުމުގައި މުޅިން ވެސް ވަނީ މޭ އިން ފެށިގެން ސެޕްޓެމްބަރު 2020 އަށް ހިނގި މަޝްވަރާތަކުގެ ވާހަކަ. އޭގެ ފަހުން އަޅުގަނޑުމެން މި ދަނީ މީޑިއާ ކުންފުނިތަކާއެކު އެއްބަސްވުމަކަށް އައުމަށް މަސައްކަތް ކުރަމުން،" ގޫގުލްގެ ބަޔާނެއްގައި ބުންޏެވެ.
ގޫގުލްއާ ދެކޮޅަށް މިހާ ބޮޑު ޖޫރިމަނާއެއް އައިސްފައި މި ވަނީ ގޫގުލް ސާޗް އިންޖީނުގައި މީޑިއާ ގްރޫޕުތަކުގެ އާޓިކަލްތަކާއި، ފޮޓޯ އަދި ވީޑިއޯތައް ފެންނައިރު، އެ ގްރޫޕުތަކަށް އެއްވެސް ފައިސާއެއް ނުލިބޭތީ އެވެ.
ގޫގުލް ސާޗް އިންޖީނުގައި މީޑިއަ ގްރޫޕުތަކުގެ ކޮންޓެންޓު ފެންނައިރު، ޖަހާފައި ހުންނަ އިޝްތިހާރުތަކުގެ ހުރިހާ ފައިސާއެއް ލިބެނީ ހަމައެކަނި ގޫގުލް އަށެވެ.
އެހެންވެ، ގިނަ މީޑިއާ ކުންފުނިތަކުން ވަނީ އެ އިޝްތިހާރުތަކުން ގޫގުލްއަށް ލިބޭ އެތައް މިލިއަން ޑޮލަރުގެ ފައިދާއިން ބައެއް ކޮޕީރައިޓު ގާނޫނުތަކުގެ ދަށުން އެ މީހުން ލިބެން ޖެހޭނެ ކަމަށް ދައުވާކޮށްފަ އެވެ.
ނަމަވެސް ގޫގުލްއިން ބުނެފައިވަނީ ސާޗް އިންޖީނުގައި ހަބަރުތައް ޑިސްޕްލޭ ކުރުމުން، ގޫގުލް ބޭނުން ކުރާ މީހުންނަށް ނޫސް ވެބްސައިޓުތަކަށް ދިޔުމަށް ހިތްވަރު ލިބޭ ކަމަށެވެ.
އޭގެ އިތުރުން މީޑިއާތަކަށް އެހީވުމަށް ގިނަ ކަންކަން ކުރާ ކަމަށާއި އެގޮތުން ކޮވިޑު ބަލިމަޑުކަމުގައި އެމެޖެންސީ ފަންޑު ވެސް ފޯރުކޮށްދެމުންދާ ކަމަށް ގޫގުލްއިން ބުނެ އެވެ.
