ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަންދިން ޓެރަރިސްޓު ހަމަލާއާ ގުޅޭގޮތުން ހިންގަމުންދާ ތަހުގީގު ރަނގަޅު ކަމަށް ރައީސް އިބްރާހިމް މުހައްމަދު ސޯލިހްގެ މަންދޫބެއް ގޮތުގައި އައްޔަނު ކުރެއްވި އައްބާސް ފާއިޒު ވިދާޅުވެއްޖެ އެވެ.
އިނގިރޭސިވިލާތުގެ ރައްޔިތެއް ކަމަށްވާ އައްބާސް ފާއިޒަކީ ދެކުނު އޭޝިޔާގެ ގައުމުތަކުގެ އިންސާނީ ހައްގުތަކަށް ވަކާލާތު ކުރައްވާ ބޭފުޅެކެވެ. އޭނާ ކުރިން މަސައްކަތް ކުރައްވާފައި ވަނީ އެމްނެސްޓީ އިންޓަނޭޝަނަލްގަ އެވެ.
ރައީސް ސޯލިހާ މިއަދު ބައްދަލު ކުރެއްވުމަށްފަހު އައްބާސް ވަނީ ބޮން ގޮއްވި މައްސަލައިގައި ތަހުގީގުގައި މިހާތަނަށް ކުރި މަސައްކަތްތަކުގެ އެންމެ ފަހު މައުލޫމާތު ރައީސްއަށް އަރުއްވާފަ އެވެ.
އެ ބައްދަލުވުމަށްފަހު އައްބާސް ވިދާޅުވީ ފުލުހުންގެ ތަހުގީގު މިހާތަނަށް ގެންގޮސްފައިވަނީ ވަރަށް ފަރުވާތެރިކަމާ އެކު، ހުރިހާ ދިމާލަކަށް ނަޒަރު ހިންގައި ވަރަށް ފުރިހަމަކޮށްކަން ފާހަގަ ކުރެއްވި އެވެ.
އެ ބައްދަލުވުމުގައި ރައީސް ދެއްކެވި ވާހަކަފުޅުގައި ނަޝީދަށް ދިން ހަމަލާއާއި ގުޅިގެން ކުރިއަށް ގެންދާ ތަހުގީގާއި އެންމެހާ ކޯޓު މަރުހަލާތައް ވީހާވެސް އިންސާފުވެރިކޮށް ކުރިއަށް ގެންދިއުމަށް އެދިވަޑައިގަންނަވާ ކަމަށް ވިދާޅުވި އެވެ.
ތަހުގީގު ކުރިއަށްދާ ގޮތް ގާތުން ބެއްލެވުމަށް އައްބާސް ފާއިޒް ރާއްޖެ ވަޑައިގެންފައި ވަނީ މި މަހުގެ ފުރަތަމަ ދުވަހެވެ.
ރައީސްގެ ހާއްސަ މަންދޫބުގެ ހައިސިއްޔަތުން ހަމަލާއާ ގުޅޭ ތަހުގީގުތަކުގައި ޕްރޮސެކިއުޓާ ޖެނެރަލް ކަނޑައަޅުއްވާ މިންގަނޑުގެ ތެރެއިން އައްބާސް ފާއިޒް ބައިވެރިވެވަޑައިގަންނަވާނެ ކަމަށާއި އިންސާފު ގާއިމުކުރެވެންދެން، ބޭނުންވާ ހާލަތްތަކުގައި ކަމާގުޅޭ ލަފަޔާއި އިރުޝާދު ދެއްވައި، ތައްޔާރުކުރައްވަން ޖެހިވަޑައިގަންނަވާ ރިޕޯޓުތައް ވެސް ތައްޔާރުކުރައްވާނެ އެވެ.
އައްބާސް ފާއިޒް ވަނީ ޑިފެންސް މިނިސްޓަރު މާރިޔާ އަހުމަދު ދީދީއާ ވެސް ބައްދަލު ކުރައްވާފަ އެވެ.
އެ ހަމަލާއާ ގުޅިގެން މަޖިލީހުން އުފެއްދި 241 ކޮމެޓީން މިދިޔަ ބުރާސްފަތި ދުވަހު ވަނީ އެ ހަމަލާއާ ގުޅިގެން ތައްޔާރުކުރި އިންކުއަރީ ރިޕޯޓު އާންމުކޮށްފަ އެވެ.
އެ ރިޕޯޓުގައި ބުނެފައި ވަނީ ނަޝީދަށް ދޭން އުޅުނު ހަމަލާގެ މައުލޫމާތު މާރިޔާއަށް ލިބިވަޑައިގެން އެކަން ހުއްޓުވަން އަޅަން ޖެހޭ ފިޔަވަޅުތަކަށް އަމަލު ނުކުރެއްވުން ބަލައެއްނުގަނެވޭނެ ކަމަށެވެ. އަދި ރައީސް ނަޝީދަށް ހަމަލާދިން ރޭ އެ ސަރަހައްދުގައި މޯބައިލް ރޭންޖު ބުލޮކް ކުރާ ޖޭމަރު ބޭނުން ނުކުރުމާއި އެ ސަރަހައްދު ކުރީ ބައިގައި ބަލައި ފާސް ނުކުރުމަކީ ވެސް ފެއިލުވުމެއް ކަމުގައި ރިޕޯޓުގައި ބުނެފައިވެ އެވެ.
