ރާއްޖޭގައި ހުންނަ އިންޑިއާގެ ހައިކޮމިޝަން ގޮއްވާލާނެ ކަމަށް ބުނެ ޓްވީޓުކުރީ އެ މައްސަލާގައި ހައްޔަރުކުރި މުހައްމަދު އިނާދު ކަމަށް ތުހުމަތު ކުރެވޭ މިންވަރަށް ހެކި ނެތް ކަމަށް ބުނެފި އެވެ.
ފޭކް އެކައުންޓެއްގެ ގޮތުގައި ހިންގާ، "ރޯޔަލް ހުސެއިން ތަކުރު" ކިޔާ އެކައުންޓަކުން ކުރި ޓްވީޓެއްގައި ބުނެފައިވަނީ އިންޑިއާ ހައިކޮމިޝަން ގޮއްވާލަން އާރްޑީއެކްސްއެއް ބޭނުންވާ ކަމަށާއި އެކަން ވަރަށް ކުރާނެ ކަމަށެވެ.
އެ އެކައުންޓަކީ އިނާދުގެ އެކައުންޓެއް ކަމަށް ތުހުމަތުކޮށް، އޭނާ ހައްޔަރުކޮށް ބަންދުކުރި އެވެ. އޭނާގެ މައްޗަށް ތުހުމަތު ކުރަނީ ގޮވާތަކެތި ބޭނުންކޮށްގެން ތަނެއް ގޮއްވާލަން މަސައްކަތް ކުރަމުންދާ ކަމާއި އެކަން ވަރަށް އަވަހަށް ކުރާނެ ކަމުގެ އިންޒާރުދިން ކަމުގެ ތުހުމަތެވެ.
އެ ތުހުމަތުގައި އިނާދުގެ ބަންދަށް ފުރަތަމަ ޖެހި މުއްދަތު ހަމަވެ، އިއްޔެ ކުރިމިނަލް ކޯޓަށް ހާޒިރުކުރުމުން ބަންދަށް އިތުރުކޮށްދީފައިވަނީ ތިން ދުވަހެވެ.
އޭނާގެ ބަންދުގެ މުއްދަތު ދެމެހެއްޓި ނަމަވެސް، ގާޒީ ސޮފްއަތު ހަބީބު ނެރުއްވި އަމުރުގައި ބުނެފައިވަނީ މައްސަލާގައި ޓްވީޓުކުރި ސީދާ ފަރާތަކީ އިނާދު ކަމަށް ތުހުމަތު ކުރެވޭ މިންވަރަށް ހެއްކާއި ގަރީނާ ލިބިފައި ނެތް ކަމަށެވެ.
އެކަމަކު، އެ އެކައުންޓަކީ އިނާދުގެ އެކައުންޓެއް ކަމަށް ބާރުދޭ ގަރީނާތަކެއް ލިބިފައިވާ ކަމަށެވެ.
އިނާދުގެ މައްޗަށް ޓެރަރިޒަމްގެ ބޮޑު ތުހުމަތެއް ކުރާއިރު، އޭނާގެ ބަންދު އިތުރުކޮށްފައިވަނީ އަމުރުގައިވާ ގޮތުން މުޖުތަމައުގެ ސަލާމަތަށް ނުރައްކަލަކަށް ވެދާނެތީ އެވެ.
އަމުރުގައި ބުނި ގޮތުގައި، އިނާދުގެ މައްޗަށް ތުހުމަތުވާ ކުށަކީ މުޖުތަމައުގެ އާންމު މަސްލަހަތާ ގުޅިފައިވާ ކުށެކެވެ. އެ މައްސަލާގައި މިހާތަނަށް ހެކި ބަސް ހޯދިފައިނުވާތީ އާއި މައްސަލާގެ ބާވަތުން އިނާދު ދޫކޮށްލައިފިނަމަ ހެކި ނައްތާލާ، ހެކިބަސް ދޭން ހުރި މީހަކަށް ނުފޫޒު ފޯރުވަދާނެ ކަމަށް ބެލެވޭ ކަމަށެވެ.
"ރޯޔަލް ހުސެއިން ތަކުރު" މި ޓްވީޓުކުރީ އިންޑިއާއާ ދެކޮޅަށް ގިނަ ބަޔަކު އަޑުއުފަލައި، މަޝްރަހު ވަރަށް ހޫނުވެފައިވަނިކޮށެވެ.
އިންޑިއާގެ މައްސަލަ އަނެއްކާވެސް ހޫނުވީ ރާއްޖޭގައި ހުންނަ އިންޑިއާ ހައިކޮމިޝަންގެ ޑެޕިއުޓީ ހައިކޮމިޝަނަރާ ރޯހިތުއާ ގުޅޭ ގޮތުން "ދިޔަރެސް" ނޫޙުގައި ލިޔުނު ރިޕޯޓެއްގެ މައްސަލާގައި ހައިކޮމިޝަނުން ކަންބޮޑުވުން ފާޅުކުރުމުންނެވެ. އިންޑިއާ ހައިކޮމިޝަނުން ވަނީ އެ ނޫހުގެ މައްސަލަ ބަލައިދިނުމަށް ފޮރިން މިނިސްޓްރީގައި އެދިފަ އެވެ.
އަދި، އެ މައްސަލަ ރައްޔިތުންގެ މަޖިލީހުގެ ފަރާތުން މީޑިއާ ކައުންސިލަށް ވެސް ހުށަހެޅި އެވެ.
އިނާދު ހައްޔަރުކުރުމަށްފަހު ފުލުހުން ބުނެފައިވަނީ އަނިޔާވެރި އަމަލުތަކާއި އެކަމަށް ހިތްވަރު ލިބޭ ގޮތަށް އަމަލުތައް ނުބެހެއްޓުމަށް އާންމުންނަށް އިލްތިމާސްކޮށްފަ އެވެ.
"ސޯޝަލް މީޑިއާ އާއި، އަދި އެނޫންވެސް ވަސީލަތްތައް ބޭނުންކޮށްގެން މީހުންނަށް އަނިޔާވެރިވުމަށާއި މުދަލަށާއި ތަކެއްޗަށް ގެއްލުން ދިނުމަށް ގޮވާލުމާއި އެފަދަ އަމަލުތަކަށް ތަރުހީބުދޭ ފަރާތްތަކުން އެކުރަނީ ޖިނާއީ ކުށެއްކަން ހަނދާންކޮށްދެން،" ފުލުހުން ނެރުނު ބަޔާނުގައިވެ އެވެ.
ފުލުހުން ބުނި ގޮތުގައި އެފަދަ އަމަލުތައް ހިންގާ ފަރާތްތަކުގެ މައްސަލަ ދިވެހި ފުލުހުންގެ ހިދުމަތުން ތަހުގީގުކޮށް އަޅަންޖެހޭ ފިޔަވަޅުތައް އަޅާނެ އެވެ.
