ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން މަޖިލީހުގެ ކޮމިޓީން ހިންގި ޕާލިމަންޓަރީ އިންކުއަރީ ރިޕޯޓު ފާސްކޮށް ރައްޔިތުންގެ މަޖިލިސް ޗުއްޓީއަށް ގޮސްފި އެވެ.
ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން ރާއްޖޭގެ ތާރީހުގައި ފުރަތަމަ ފަހަރަށް މުޅި މަޖިލިސް އިގުރާރުވެގެން މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން އިސްވެ ބަލާފައިވަނީ އެކަން ހިނގައިދިޔަ ގޮތާއި، އެކަމުގައި އިހުމާލުތަކެއްވެފައިވޭތޯ އާއި މިފަދަ ކަންކަން ތަކުރާރުވިޔަ ނުދިނުމަށްޓަކައި އެޅިދާނެ ފިޔަވަޅުތަކާ ގުޅޭ ގޮތުންނެވެ.
ގާތްގަނޑަކަށް 270 ސޮފްހާގެ ރިޕޯޓުގައި ނަޝީދަށް ހަމަލާ ދިނުމުގެ ކުރިންނާއި ހަމަލާދިން ދުވަހު އަދި އޭގެ ފަހުން ކަން ހިނގާފައިވާ ގޮތުގެ ވަރަށް ތަފްސީލީ މައުލޫމާތު ވަނީ ހިމަނައިފަ އެވެ.
މީގެ ދެ މަހެއްހާ ދުވަސް ކުރިން ކޮމިޓީން އެ މަަސައްކަތް ފަށައި، ކަމާބެހޭ އިދާރާތަކުގެ އިސް ބޭފުޅުން ހާޒިރުކޮށް ސުވާލުކުރަމުންދިޔައިރު، އެ ބޮޑު އިންކުއަރީ، މިދިޔަ މަހުގެ ނިޔަލަށް މަޖިލީހުގެ ދެވަނަ ދައުރު ނިންމައި ޗުއްޓީއަށްދާއިރު ނުނިމޭނެކަން ސާފުވި އެވެ.
އެއާއެކު މެމްބަރުން ވަނީ ދެވަނަ ދައުރު އިއްޔެގެ ނިޔަލަށް ދަންމައިލައި، ޗުއްޓީއަށް ދިއުމުގެ ކުރިން އިންކުއަރީ ނިންމަން ވަގުތު ހޯދައިދީފަ އެވެ.
ރެއާ ދުވާލު މަސައްކަތްކޮށްގެން އެ ރިޕޯޓު އެކުލަވާލައި، 13 މެމްބަރުންގެ މައްޗަށް އެކުލެވޭ 241 ކޮމިޓީގެ އިއްތިފާގުން ފާސްކޮށްފައިވަނީ ބުދަ ދުވަހުގެ މެންދަމުގެ ވަގުތެއްގަ އެވެ.
ނަމަވެސް، އިއްޔެ މެންދުރަށް ތާވަލުކުރި ދެވަނަ ދައުރުގެ ފަހު ޖަލްސާއަށް ވެސް އެ ރިޕޯޓުގައި ހުރި އިދާރީކަންކަން ފުރިހަމަކޮށް، އަނބުރާ ތަޅުމަށް ފޮނުވޭގޮތް ނުވުމުން، ރިޔާސަތުން ވަނީ ރޭ 8:30 ގައި އިތުރު ޖަލްސާއެއް ބާއްވައިފަ އެވެ.
އެ ރިޕޯޓު ރޭ މަޖިލީހުގެ ތަޅުމަށް ހުށަހެޅި، ބަހުސްގައި ވާހަކަ ދައްކަން ބޭނުން ހުރިހާ މެމްބަރުންނަށް ފުރުސަތު ދޭން، ފަތިހު 4:00 އާ ހަމައަށް ޖަލްސާ ކުރިއަށް ގެންދިޔަ އެވެ.
އެ ބަހުސްގައި ވާހަކަ ދެއްކެވި ހުރިހާ މެމްބަރުން ވެސް ވަނީ އެ ރިޕޯޓު އެކުލަވާލުމުގައި ކޮމިޓީން ކުރި މަސައްކަތަށް ތައުރީފު ކުރައްވައިފަ އެވެ.
އަދި އެ ރިޕޯޓުން ސަރުކާރަށް ހުށަހެޅި 45 ރެކަމަންޑޭޝަނަށް ފުރިހަމައަށް އަމަލުކޮށް، ނަޝީދަށް ދެވުނު ފަދަ ހަމަލާއެއް ތަކުރާރުވިޔަ ނުދިނުމަށްޓަކައި އަވަސް ފިޔަވަޅުތައް އެޅުމަށް މެމްބަރުން ވަނީ ސަރުކާރަށް ގޮވާލައިފަ އެވެ.
ކޮމިޓީ ރިޕޯޓަށް ގެނެވުނު ކުޑަ އިސްލާހަކާއެކު، އެ ތާރީހީ ރިޕޯޓު ރޭ ފަތިހު ފާސްކޮށްފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 58 މެމްބަރުންގެ އިއްތިފާގުންނެވެ.
"އިރާދަކުރެއްވިއްޔާ ރައްޔިތުންގެ މަޖިލީހުގެ ދެން އަންނަ ދައުރު، އަޅުގަނޑުމެން މަސައްކަތް ފަށާނީ، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއެކު،" ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ޖަލްސާ ނިންމާލައްވަމުން ވިދާޅުވި އެވެ.
ދިރާސީ އާ އަހަރަށް ދާދިފަހުން ގެނައި ބަދަލާ އެއްގޮތް ކުރަން މަޖިލިސް ޗުއްޓީއަށް ދާ ދުވަސްތައް ވެސް ބަދަލުކުރުމާ ގުޅިގެން، މަޖިލީހުގެ ތިން ވަނަ ދައުރު ފެށޭނީ އަންނަ މަހުގެ 16 ވަނަ ދުވަހެވެ.
