ރައްޔިތުންގެ މަޖިލީހުގެ މިއަދުގެ ޖަލްސާގައި ފާސްކުރަން ތައްޔާރުވެފައި އޮތް ދައުލަތުގެ އާމްދަނީއާ ގުޅުން ހުރި މުހިންމު ތިން ބިލެއް ވޯޓަށް ނޭހުނީ އެމްޑީޕީއަށް ނިސްބަތްވާ ގިނަ މެމްބަރުންތަކެއް ގަސްތުގައި ވޯޓުގައި ބައިވެރިނުވުމުންކަން ހާމަވެއްޖެ އެވެ.
އާމްދަނީން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލާއި، ކުދި އަދި މެދު ފަންތީގެ ވިޔަފާރީގެ ގާނޫނަށް އިސްލާހު ގެނައުމުގެ ބިލުގެ އިތުރުން، ތަފާސްހިސާބުގެ ބިލު މަޖިލީހުގެ ކަމާގުޅޭ ކޮމިޓީތަކުން ދިރާސާކޮށް ނިންމި ގޮތުގެ ރިޕޯޓު އޮތީ މިއަދުގެ އެޖެންޑާގައި ހިމަނައިފަ އެވެ.
މިއަދުގެ ޖަލްސާގައި އެ ތިން ބިލުގެ ކޮމިޓީ ރިޕޯޓުތައް ހުށަހެޅުމުން ބަހުސް ކުރަން އެއްވެސް މެމްބަރަކު އެދިފައިނުވުމުން، އެ ބިލުތަކުގެ ތިން ވަނަ ކިޔުން އިއްވައި ވޯޓަށް އަހާނެކަމަށް ރިޔާސަތު އިއުލާނުކުރި އެވެ.
އާއްމުކޮށް ވޯޓު ގަޑި މެނދުރު 1:30 ގައި އޮންނަ ނަމަވެސް، މިއަދު އެޖެންޑާގައި އިތުރު ކަމެއް ނެތުމުން ރިޔާސަތުން ވަނީ ވޯޓު ގަޑި 11:00 އަށް އަވަސްކޮށްފަ އެވެ.
ނަމަވެސް، މަޖިލީހުގެ ގަވައިދުގައި ބުނާ އަދަދަށް މެމްބަރުން ޖަލްސާއަށް ހާޒިރުވެނެތުމުން، އެ ތިން ބިލަށް މިއަދު ވޯޓަށް އެހެން ނެތް ކަމަށް ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވިދާޅުވި އެވެ.
ރައްޔިތުންްގެ މައްޗަށް އަމަލުކުރުން ލާޒިކުރާ އެއްވެސް ކަމެއް މަޖިލީހުން ފާސްކުރުމަށްޓަކައި ވޯޓަށް އަންހަންވާނީ މަޖިލީހުގެ ޖުމްލަ މެމްބަރުންގެ ދެބައިކުޅަ އެއްބައަށް ވުރެ ގިނަ މެމްބަރުން ވޯޓެއް ނަގާ ޖަލްސާއެއްގައި ހާޒިރުވެ ތިބޭ ވަގުތެއްގައި ކަމަށް ގާނޫނުއަސާސީގައި ބަޔާންކޮށްފައިވެ އެވެ.
އެގޮތުން، އީވާ ވިދާޅުވީ އެ ތިން ބިލަށް ވޯޓަށް އެހުމަށް މަދުވެގެން 44 މެމްބަރުން ޖަލްސާއަށް ހާޒިރުވެ ތިބެންޖެހޭއިރު، މިއަދުގެ ވޯޓު ގަޑީގައި ތިބީ 39 މެމްބަރުން ކަމަށެވެ.
ސަރުކާރަށް ޖެއްސުން ކުރަން ބޭރުގައި ތިބީ
މިއަދު އެ ބިލުތަކަށް ވޯޓަށް ނޭހުނީ އެމްޑީޕީގެ 15 މެމްބަރަކު ގަސްތުގައި ވޯޓު ގަޑީގައި ބޭރުގައި ތިބުމުން ކަމަށް "އަދަދު"އަށް ވަނީ އެނގިފަ އެވެ.
އެމްޑީޕީގެ އެހެން މެމްބަރަކު "އަދަދު"އަށް ވިދާޅުވީ އެ މެމްބަރުންތައް ވޯޓުގެ ވަގުތު މަޖިލީހުގައި ތިބި ކަމަށާއި، ނަމަވެސް ތަޅުމަށް ނުވަދެ މަޑުކުރީ އެ ބިލުތައް ފާސްކުރިޔަ ނުދޭން ކަމަށެވެ.
"ދައުލަތަށް އާމްދަނީ ވަންނަން އޮތް ބިލުތަކަކަށް ވޯޓު ނުދީ ސަރުކާރަށް ޖެއްސުން ކުރަންވެގެން ކަމަށް މި ބެލެވެނީ،" އޭނާ ތުހުމަތު ކުރެއްވި އެވެ.
ވޯޓުގައި ބައިވެރިނުވި އެމްޑީޕީގެ މެމްބަރުން
ގަލޮޅު އުތުރު ދާއިރާގެ މެމްބަރު މީކާއީލް އަހުމަދު ނަސީމް
- މާފަންނު މެދު ދާއިރާގެ މެމްބަރު އިބްރާހިމް ރަޝީދު
- ދިއްދޫ ދާއިރާގެ މެމްބަރު އަބްދުﷲ ވަހީދު
- ވިލުފުށި ދާއިރާގެ މެމްބަރު ހަސަން އަފީފް
- މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ
- މަޑަވެލި ދާއިރާގެ މެމްބަރު ހުސެއިން ފިރުޝާން
- ފޮނަދޫ ދާއިރާގެ މެމްބަރު މޫސާ ސިރާޖު
- އުނގޫފާރު ދާއިރާގެ މެމްބަރު މުހައްމަދު ވަހީދު
- އިނގުރައިދޫ ދާއިރާގެ މެމްބަރު ހަސަން އަހުމަދު
- ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު
- ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީގު
- ތޮއްޑޫ ދާއިރާގެ މެމްބަރު ހަސަން ޝިޔާން
- ބިލެތްދޫ ދާއިރާގެ މެމްބަރު އަހުމަދު ހަލީމް
- ގައްދޫ ދާއިރާގެ މެމްބަރު އަހުމަދު ޒާހިރު
އެކަމާ ގުޅޭގޮތުން އެމްޑީޕީގެ ޕާލިމަންޓަރީ ގުރޫޕުގެ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ އެ ތިން ބިލު ފާސްކުރަން މަދުވެގެން 44 މެމްބަރުން ބޭނުންވާނެ ކަމަށް އެމްޑީޕީގެ މެމްބަރުންނަށް ވޯޓުގަޑީގެ ގަޑިއެއްހާއިރު ކުރިން އެންގި ކަމަށެވެ.
އެހެންކަމުން، ވޯޓު ނުނެގުނީ މެމްބަރުންނަށް އެކަން ނޭނގިގެން ނޫން ކަމަށް އާޒިމް ވިދާޅުވި އެވެ.
"އެއީ އާއްމުކޮށްވާ ކަމެއް. މެމްބަރުން ވޯޓު ދެއްވަން ބޭނުންނުވާ ބިލުތަކަށް ވޯޓަށް އަހާއިރު، ސައި ކޮޓަރީގަ އާއި ކުޑަދަށުގައި ތިއްބަވާނެ،" އޭނާ ވިދާޅުވި އެވެ.
ނަމަވެސް، މިއަދުގެ ވޯޓުގައި ބައިވެރިނުވީ ގަސްތުގައި ކަން ސީދާ ވިދާޅުވާން އާޒިމް ދެކޮޅު ހެއްދެވި އެވެ.
ވޯޓުގައި ބައިވެރިނުވުމާ ގުޅޭގޮތުން ސުވާލުކުރުމުން ފިރުޝާން ވިދާޅުވީ ވޯޓުގައި ބައިވެރިނުވީ ގަސްތުގައި ނޫން ކަމަށެވެ. ނަމަވެސް އިތުރު އެއްޗެއް ވިދާޅެއްނުވި އެވެ.
އެ ސުވާލު އިންތިއާ ކުރުމުން، އޭނާ ވިދާޅުވީ ވޯޓުގަޑީގައި ކަން ހިނގައިދިޔަ ގޮތެއް އެނގިވަޑައިނުގަންނަވާ ކަމަށާއި، އޭނާ އެ ގަޑީގައި ވަޑައިގެންނެވީ މެމްބަރު ވައްޑެ އާއެކު ކްލިނިކަކަށް ކަމަށެވެ.
މަޖިލީހުގެ މި ހިނގާ ދެ ވަނަ ދައުރު މިދިޔަ މަހުގެ ނިޔަލަށް ނިމޭ ގޮތަށް އޮތް ނަމަވެސް، ކުރަން ހުރި މުހިއްމު މަސައްކަތްތަކެއް ނުނިމޭތީ މާދަމާއާ ހަމައަށް ދައުރު ވަނީ ދަންމާލައިފަ އެވެ.
އެހެންކަމުން، މަޖިލީހުގެ ދެވަނަ ދައުރުގެ ފަހު ޖަލްސާ މާދަމާ އޮންނައިރު، މިއަދު ފާސްނުކުރެވުނު ބިލުތައް މި ދައުރުގެ ތެރޭގައި ފާސްކުރަން މާދަމާ ފަހު ފުރުސަތު ލިބޭނެ އެވެ.
އާޒިމް ވިދާޅުވީ މާދަމާ އޮންނަ ޖަލްސާގައި ވެސް އެ ބިލުތަކަށް ވޯޓަށް އެހޭނެ ކަމަށެވެ.
ދެ ރައީސުންގެ ކޯޅުން ދައުލަތުގެ އާމްދަނީއާ ހަމައަށް
ރައީސް އިބްރާހިމް މުހައްމަދު ސޯލިހާއި އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދާ ދެމެދު އޮތް ކޯޅުން ވަނީ މަޖިލީހުގެ ތެރެއަށް ފޭދި، މަޖިލީހުގައި އެމްޑީޕީގެ އޮތް ސާފު އަގުލަބިއްޔަތު ވަނީ ދެ ފެކްޝަނަކަށް ބެހިފަ އެވެ.
ދޭތެރެ ދޭތެރެއިން އެ ދެ ފެކްޝަނުގެ އަރައިރުން ހޫނުވެ، ސަރުކާރަށް ވެސް އެމްޑީޕީގެ މެމްބަރުންގެ ތެރެއިން މަޖިލީހުގެ ތަޅުމުގައި ވެސް ފާޑުކިޔުންތައް އަމާޒުކުރެ އެވެ.
ނަމަވެސް، މިއީ ސަރުކާރުން ހުށަހަޅާފައިވާ ބިލުތަކެއް ފާސްކުރަން އެމްޑީޕީގެ މެމްބަރުންތަކެއް ދެކޮޅު ހެދި ފުރަތަމަ ފަހަރެވެ.
މި ކަން ހިނގާފައި މިވަނީ، އަންނަ ރިޔާސީ އިންތިހާބަށް ބާއްވާ އެމްޑީޕީގެ ޕްރައިމަރީގައި ވާދަކުރައްވާނެ ކަމަށާއި ނަމަވެސް، އޭގެ ކުރިން ބަރުލަމާނީ ނިޒާމު ގެނެވިއްޖެނަމަ، ބޮޑުވަޒީރަކަށްވުމަށް ވެސް ކުރިމަތިލައްވާނެ ކަމަށް ނަޝީދު އިއުލާނުކުރައްވާފައިވަނިކޮށެވެ.
