ވޮޝިންޓަން، އެމެރިކާ (ޖުލައި 7) - އަފްގާނިސްތާނުގައި އެމެރިކާ ސިފައިންގެ މައި މަރުކަޒު، ބަގްރަމް އެއާ ބޭސް ދޫކޮށް ދާން ވަގުތު ކުރިން އަންގާފައި ނުވަނީ ސަލާމަތީ ސަބަބުތަކަށްޓަކައި ކަމަށް އެމެރިކާއިން ބުނެފި އެވެ.
ރިޕޯޓުތައް ބުނާ ގޮތުން މިދިޔަ ހުކުރު ދުވަހު އެމެރިކާ ސިފައިން ބަގްރާމް އެއާ ބޭސް ދޫކޮށް ފުރީ ކުއްލިއަކަށެވެ. އެތަނުން ދާން އުޅޭކަން އަފްގާނުގެ އަސްކަރީ އޮފިޝަލުންނާއި އެ މަރުކަޒާ ހަވާލުވާނެ އަފްގާން ޖެނެރަލަށް ވެސް އަންގާފައެއް ނުވެ އެވެ.
ޕެންޓަގަންގެ ތަރުޖަމާނު ޖޯން ކާބީ ވިދާޅުވީ ފުރަން އުޅޭކަން ދެ ދުވަސް ކުރިން އެންގީ އަފްގާނިސްތާނުގެ އިސް ސިޔާސީ އަދި އަސްކަރީ އޮފިޝަލުންނަށް ކަމަށެވެ. އަދި އެއާ ބޭސްގެ އެތެރެ އެ މީހުންނަށް ދައްކާލި ކަމަށް ވެސް ވިދާޅުވި އެވެ.
"ފުރާނެ ސީދާ ގަޑި ނުބުނީ އޮޕަރޭޝަނުގެ ސެކިއުރިޓީ ސަބަބުތަކަށް،" ކާބީ ވިފާޅުވި އެވެ.
އެކަމުން އަންގައިދެނީ އެމެރިކާއިން އަފްގާން ސިފައިންނަށް އިތުބާރު ނުކުރާކަން ކަމަށް ބައެއް ފަރާތްތަކުން ބުނާތީ ކާބީ އެކަން ދޮގުކުރެއްވި އެވެ. އޭނާ ވިދާޅުވީ މީގެ ކުރިން ހަ އަސްކަރީ ބޭސް އަފްގާން ސިފައިންނާ ހަވާލުކޮށްފައި ވާނެ ކަމަށާއި މި ފަހަރު ވެސް އަމަލު ކުރީ އެއް އުސޫލަކުން ކަމަށެވެ.
އެމެރިކާއިން މަސައްކަތް ކުރަމުން ދަނީ ސެޕްޓެމްބަރު 11 ގެ ކުރިން އެ ގައުމުގެ ސިފައިން އަނބުރާ ގެންދިޔުމަށެވެ. އަފްގާނިސްތާނުގައި 20 އަހަރު ވަންދެން ތާލިބާނާ ދެކޮޅަށް ކުރި ހަނގުރާމައަށް ފަހު 2،500 ސިފައިންގެ މީހުންގެ ތެރެއިން 90 ޕަސެންޓު އަނބުރަ ގައުމަށް ގެންގޮސްފައިވާ ކަމަށް އެމެރިކާއިން ބުނެ އެވެ.
