ސަރުކާރު ކޯލިޝަންގައި ހިމޭނޭ އަދާލަތު ޕާޓީން 10،000 މެމްބަރުން ހަމަކުރުމުގެ ކެމްޕޭނެއް ރޭ ފަށައިފި އެވެ.
އަދާލަތުން "ސާފު އަމާޒަކަށް" ފެށި ކެމްޕޭންގައި އެ ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވިދާޅުވީ އޭނާ 2011 ވަނަ އަހަރު އެ ޕާޓީއާ ހަވާލުވިއިރު ތިބީ 4،600 މެމްބަރުން ކަމަށާއި އޭގެ އަނެއް އަހަރު އެ އަދަދު 11،000 އަށް އެރުވި ކަމަށެވެ. ނަމަވެސް ބަޔަކު ރާވައިގެން ގާނޫނަށް ގެނައި ބަދަލެއްގެ ސަބަބުން އެ ޕާޓީގެ މެމްބަރުންގެ އަދަދު 2015 ވަނަ އަހަރު ދަށްކޮށްފައިވާ ކަމަށް އިމްރާން ވިދާޅުވި އެވެ.
އޭނާ ވިދާޅުވި ގޮތުގައި މި ޕެންޑެމިކްގެ ހާލަތުގައި އެހެން ޕާޓީތަކުން ނުކުރާ އެތައް ކަމެއް އަދާލަތު ޕާޓީން ވަނީ ކޮށްފަ އެވެ. އެގޮތުން އޮންލައިންކޮށް އިންތިހާބުތައް ބޭއްވުމާއި ގައުމީ ފެންވަރުގެ ކޮންގްރެސްއެއް ވެސް ބާއްވާފައިވާ ކަމަށް އޭނާ ވިދާޅުވި އެވެ.
އެ ބައްދަލުވުމުގައި، އިމްރާން ފާހަގަކުރެއްވި ގޮތުގައި ރާއްޖޭގައި ވެރިކަން އަދިވެސް ލިބެން އޮތީ ކޯލިޝަނަކުންނެވެ. ސިޔާސީ ލީޑަރުން ކުރަންވީ ކަމަކީ އެ ޕާޓީއެއްގެ އަމާޒު އިސްކޮށްގެން އެހެން ޕާޓީތަކާ ގުޅިގެން މަސައްކަތް ކުރުން ކަަމަށް އޭނާ ވިދާޅުވި އެވެ.
އިމްރާން ވިދާޅުވި ގޮތުގައި އެ ގޮތަށް މަސައްކަތް ކުރަން ޕާޓީތަކުގެ ލީޑަރުން ނޫޅޭ ނަމަ ރާއްޖެއަށް ކުރިއެރުމެއް ނެތެވެ.
"ކޯލިޝަނާ އެކު މަސައްކަތް ކުރާއިރު ދޭން ޖެހޭ ދޫތަކާއި ހިފަހައްޓަން ޖެހޭ ހިފެހެއްޓުންތަކާއި އެއްބާރުލުންތައް ދީގެން އެކުވެރިކަމާ އެކު ރާއްޖޭގެ ހުރިހާ ރައްޔިތުންނާއި މުޅި ގައުމުގެ މަސްލަހަތު ހިމާޔަތް ކުރެވޭ ގޮތަށް ސިޔާސީ މަސައްކަތް ބައްޓަން ނުކުރެވޭހާ ހިނދަކު ރާއްޖެއަށް ފާގަތި މުސްތަގުބަލެއް ނެތް." އިމްރާން ވިދާޅުވި އެވެ.
މިސަރުކާރުގެ ކޯލިޝަން ދެމެހެއްޓުމަށް ރައީސް އިބްރާހިމް މުހައްމަދު ސޯލިހް ކުރައްވާ މަސައްކަތަށް އަދާލަތު ޕާޓީގެ ފުރިހަމަ އެއްބާރުލުން ދެއްވާނެ ކަމަށް ވެސް އިމްރާން ވިދާޅުވި އެވެ.
އޭނާ ވިދާޅުވި ގޮތުގައި އަދާލަތު ޕާޓީން މަސައްކަތް ކުރަނީ އެ ޕާޓީގެ އަމާޒު ނުގެއްލޭނެހެން ސަރުކާރަށް އެއްބާރުލުންދީ ވާދަވެރި ސިޔާސީ ޕާޓީތަކާ ގުޅިގެން މަސައްކަތް ކުރުމަށެވެ.
