އޮޑިޓާ ޖެނެރަލް މަގާމަށް އެސިސްޓެންޓް އޮޑިޓާ ޖެނެރަލްގެ މަގާމުގައި ހުންނެވި ހުސެއިން ނިޔާޒީ އައްޔަނުކުރަން ފެންނަ ކަމަށް ރައްޔިތުންގެ މަޖިލީހުގެ ކަމާގުޅޭ ކޮމިޓީން ނިންމައިފި އެވެ.
އޮޑިޓާ ޖެނެރަލްގެ މަގާމުގައި ހުންނެވި ހަސަން ޒިޔަތު މަގާމުން އިސްތިއުފާ ދެއްވުމުން، އެ މަގާމު ހުސްވެފައިވާތާ މިހާރު ވަނީ މަހަކަށް ވުރެ ގިނަ ދުވަސްވެފަ އެވެ.
އެ މަގާމަށް އައްޔަނުކުރަން ރައީސް އިބްރާހިމް މުހައްމަދު ސޯލިހު ހުށަހަޅުއްވާފައިވާ ނިޔާޒީ އަކީ 2011 ވަނަ އަހަރު އެސިސްޓެންޓް އޮޑިޓާ ޖެނެރަލްގެ މަގާމަށް އައްޔަނުކުރެވުނު ބޭފުޅެކެވެ.
އެ މައްސަލަ ދިރާސާކުރި މަޖިލީހުގެ މާލިއްޔަތު ކޮމިޓީން ނިޔާޒީއާ މިއަދު ވަނީ އިންޓަވިއުކޮށްފަ އެވެ.
އެ އިންޓަވިއުއަށްފަހު ކޮމިޓީގެ މެމްބަރުންގެ އިއްތިފާގުން އޮޑިޓާ ޖެނެރަލްގެ މަގާމަށް ނިޔާޒީ އައްޔަނުކުރަން ފެންނަ ކަމަށް ނިންމައި، އެ މައްސަލަ ވަނީ އަނބުރާ ތަޅުމަށް ފޮނުވައިފަ އެވެ.
އޮޑިޓާ ޖެނެރަލްގެ މަގާމަށް ނިޔާޒީ އައްޔަނުކުރެވޭނީ މަޖިލީހުގެ ތަޅުމުން ރުހުން ދިނުމުންނެވެ.
އޮޑިޓު ދާއިރާގައި 15 އަހަރު ދުވަހުގެ ތަޖުރިބާ ލިބިފައިވާ ނިޔާޒީ މިވަގުތު ހުންނެވީ އޮޑިޓު އޮފީހުގެ ފައިނޭންޝަލް އޮޑިޓް ޑިވިޝަނުގެ ހިންގެވުމާ ހަވާލުވެ އެވެ.
އޮޑިޓާ ޖެނެރަލްގެ މަގާމުގައި ހުންނެވި ޒިޔަތު އިސްތިއުފާ ދެއްވީ އެމްއެމްޕީއާރުސީގެ މަންފާ ލިބުނުކަމަށް ތުހުމަތާވާ ލިސްޓުގައި އޭނާގެ ނަން ހިމެނުމާ ގުޅިގެންނެވެ.
ނަމަވެސް، ޒިޔަތު ވިދާޅުވެފައިވަނީ އެ ފައިސާއަކީ 2014 ގައި މަޖިލިސް އިންތިހާބުގައި ހުޅުހެންވޭރުދާއިރާއަށް ވާދަކުރެއްވިއިރު ޕީޕީއެމުން އޭނާގެ ކެމްޕޭން ހަރަދުތަކެއް ދެ ފަހަރެއްގެ މަތިން ހަމަޖައްސައިދިނުމަށް ދިން ފައިސާ ކަމަށެވެ.
އެކަމަކު އެއީ އެމްއެމްޕީއާރުސީއާ ގުޅުން ހުރި ފައިސާއެއް ކަމެއް އެނގިވަޑައިނުގަންނަވާ ކަމަށާއި ފައިސާ ދިނީ ޕީޕީއެމުން ކަމަށް ވިދާޅުވި އެވެ.
ޒިޔަތު އައްޔަނުކުރެވުނީ ކުރީގެ ރައީސް އަބްދުﷲ ޔާމީންގެ ވަރިކަމުގައި ނޮވެމްބަރު 24، 2014 ގަ އެވެ.
މި ހިޔާނާތުގައި ޒިޔަތުގެ ކޮއްކޮ، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތަށް ހުކުމް އިއްވި އެވެ. އެ ހުކުމް ސުޕްރީމް ކޯޓުން ވަނީ ބާތިލްކޮށްފަ އެވެ. އެކަމަކު ޒިޔަތުގެ ތަހުގީގު އަދިވެސް ކުރިއަށް އެބަދެ އެވެ.
