ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަންދިން ހަމަލާގެ ތަހުގީގަށް ރައީސް އިބްރާހިމް މުހައްމަދު ސޯލިހް އައްޔަންކުރެއްވި މަންދޫބު އައްބާސް ފާއިޒް އިއްޔެ ރާއްޖެ ވަޑައިގެންފި އެވެ.
ހަމަލާގެ ތަހުގީގާއި ކޯޓު މަރުހަލާ ވެސް ގާތުން އޭނާ ބައްލަވާނެ ކަމަށް ރައީސް އޮފީހުން ބުންޏެވެ.
ފާއިޒަށް، ވެލާނާ އިންޓަނޭޝަނަލް އެއާޕޯޓުން މަރުހަބާ ވިދާޅުވީ ރައީސް އޮފީހުގެ ޗީފް އޮފް ސްޓާފް އަލީ ޒާހިރެވެ.
ރައީސް އޮފީހުން ބުނި ގޮތުގައި، ރައީސްގެ ހާއްސަ މަންދޫބުގެ ހައިސިއްޔަތުން ހަމަލާއާ ގުޅޭ ތަހުގީގުތަކުގައި ޕްރޮސެކިއުޓާ ޖެނެރަލް ކަނޑައަޅުއްވާ މިންގަނޑުގެ ތެރެއިން އައްބާސް ފާއިޒް ބައިވެރިވެވަޑައިގަންނަވާނެ އެވެ.
އަދި އިންސާފު ގާއިމުކުރެވެންދެން، ބޭނުންވާ ހާލަތްތަކުގައި ކަމާގުޅޭ ލަފަޔާއި އިރުޝާދު ދެއްވައި، ތައްޔާރުކުރައްވަން ޖެހިވަޑައިގަންނަވާ ރިޕޯޓުތައް ވެސް ތައްޔާރުކުރައްވާނެ އެވެ.
އައްބާސް ފާއިޒަކީ ވަރަށް ގިނަ ދުވަސްތަކެއްވަންދެން އެމްނެސްޓީ އިންޓަނޭޝަނަލްގެ ދެކުނު އޭޝިޔާ ބައްރުގެ އިޖްތިމާއީ، ސަގާފީ އަދި ސިޔާސީ މައްސަލަތައް ދިރާސާކުރެއްވި ކަމާ ގުޅޭ ހާއްސަ މާހިރެކެވެ.
އޭނާއަކީ ދެކުނު އޭޝިޔާ ބައްރުގެ ގައުމުތަކުގައި އިންސާނީ ހައްގުތައް ކުރިއެރުވުމުގެ މަސައްކަތުގައި 30 އަހަރަށް ވުރެ ގިނަ ދުވަހު ހިދުމަތްކުރައްވައި، ކަމުގެ ތަޖުރިބާ ލިބިވަޑައިގެން ހުންނެވި ގާބިލް ބޭފުޅެކެވެ.
ހަމަލާގެ ތަހުގީގަށް އަށް މީހަކު މިހާތަނަށް ހައްޔަރުކޮށްފައިވެ އެވެ. އޭގެ ތެރޭގައި ހަމަލާގައި އަމަލީ ގޮތުން ހަރަކާތްތެރިވި މީހުން ވެސް ހިމެނެ އެވެ.
