މިދިޔަ މެއި މަހުގެ ހަ ވަނަ ދުވަހު ބޮމެއް ގޮއްވާލައިގެން ދިން ޓެރަރިސްޓު ހަމަލާގައި ލިބިވަޑައިގެންނެވި ޒަހަމްތަކަށް ފަރުވާ ހޯއްދަވަން މިވަގުތު ޖަރުމަނުގައި ހުންނެވި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަދި އިތުރު ފަރުވާ ހޯއްދަވަން އިނގިރޭސިވިލާތަށް ވަޑައިގަންނަވަން ހަމަޖެހިފައިވާ ކަމަށް އާއިލާއިން ބުނެފި އެވެ.
ގެކޮޅުން ނުކުމެވަޑައިގެން ކާރަށް އަރައިވަޑައިގަންނަވަނިކޮށް ބާރުގަދަ އައިއީޑީއެއް ގޮއްވާލައިގެން އެމަނިކުފާނަށް ލިބިވަޑައިގެންނެވި ޒަހަމްތަކަށް އެންމެ ފުރަތަމަ ފަރުވާދިނީ އޭޑީކޭ ހޮސްޕިޓަލުގަ އެވެ.
އޭޑީކޭގެ ޑޮކްޓަރުންގެ ޓީމަކުން 16 ގަޑިއިރުގެ އޮޕަރޭޝަންތަކަކަށްފަހު އެމަނިކުފާނުގެ ހަށިކޮޅުން، އައިޑީގެ ގެއްލުން ބޮޑުކުރަން އެތެރެއަށް އަޅާފައިވާ ރޭޒާފުއްތަކުގެ ތެރެއިން، 10 އަށް ވުރެ ގިނަ ރޭޒާފުއް ނެގި އެވެ.
އެމަނިކުފާނު އިތުރު ފަރުވާއަށް ޖަރުމަނަށް ވަޑައިގެންނެވީ މިދިޔަ މެއި މަހުގެ 13 ވަނަ ދުވަހެވެ.
ނަޝީދުގެ ހާލުކޮޅު މަޑުމަޑުން ރަނގަޅުވަމުން އައި ނަމަވެސް، އެމަނިކުފާނަށް ފަރުވާ ދެމުން އަންނަ ޖަރުމަނުގެ ބާލިން ބުންޑެސްވެއާ ހޮސްޕިޓަލްގެ ޑޮކްޓަރުންގެ ލަފާގެ މަތިން، އިތުރު ފަރުވާ ހޯއްދަވަން މިއަދު އިނގިރޭސިވިލާތަށް ވަޑައިގަންނަވާނެ ކަމަށް އާއިލާއިން ބުންޏެވެ.
ހާލުކޮޅު ރަނގަޅުވާން ފެށުމާއެކު ޖަރުމަނުގައި ހުންނަވައިގެން ނަޝީދު ގެންދަވަނީ އެމަނިކުފާނުގެ ރަސްމީ މަސައްކަތުގެ އިތުރުން ބައެއް ސިޔާސީ ހަރަކާތްތަކުގައި ވެސް ބައިވެރިވެވަޑައިގަންނަވަމުންނެވެ.
އެގޮތުން މިދިޔަ ހުކުރު ދުވަހު ޖަރުމަނުގެ ގާނޫނު ހަދާ މަޖިލީހުގެ ތިރިގޭގެ ރައީސް ވުއަލްފްގަންގް ޝުއައިބުލައާ އެމަނިކުފާނު ރަސްމީކޮށް ބައްދަލުކުރައްވާފައިވާއިރު، އެމްޑީޕީގެ 16 ވަނަ އަހަރީ ދުވަސް ފާހަގަކުރުމަށް އޮންލައިންކޮށް ބޭއްވި ޖަލްސާއެއް ވެސް އެމަނިކުފާނު ވަނީ ޝަރަފުވެރިކޮށް ދެއްވައިފަ އެވެ.
އަދި "އާސްކް ސްޕީކާ"ގެ ނަމުގައި ސިލްސިލާކޮށް ބާއްވަމުން އައި، ރައްޔިތުންގެ ސުވާލުތަކަށް ޖަވާބު ދެއްވުމުގެ ބައްދަލުވުމެއް ވެސް އަންނަ ހޯމަ ދުވަހަށް ތާވަލުކުރެވިފައިވާކަމަށް މަޖިލީހުގެ އިދާރާއިން ވަނީ ބުނެފަ އެވެ.
ނަޝީދަށް ހަމަލާ ދިނުމުގައި އަމަލީ ގޮތުން ބައިވެރިވިކަމުގެ ތުހުމަތުގައި ފަސް މީހަކު މިހާތަނަށް ހައްޔަރުކޮށްފައިވީ ނަމަވެސް، އެ ހަމަލާއަށް ފަންޑު ކުރި މީހުން ހޯދުން ލަސްވާތީ އެމްޑީޕީގެ ތެރެއިން ވެސް ތަހުގީގީ އިދާރާތަކަށް އަމާޒުވާ ފާޑުކިޔުންތައް ގިނަ އެވެ.
އެ ހަމަލާއާ ގުޅިގެން ރާއްޖޭގެ ތާރީހުގައި ފުރަތަމަ ފަހަރަށް މުޅި މަޖިލިސް އިގުރާރުވެގެން ޕާލިމަންޓަރީ އިންކުޔަރީ އަންނަނީ ހިންގަމުންނެވެ.
އެ އިންކުޔަރީއަށް ސަލާމަތީބާރުތަކުގެ އިސްވެރިންގެ އިތުރުން ކަމާގުޅޭ އެހެން މުއައްސަސާތައް ހާޒިރުކޮށް، ސުވާލުކޮށްގެން ވަނީ މައުލޫމާތު އެއްކޮށްފަ އެވެ.
އެ އިންކުޔަރީގެ ރިޕޯޓު އަންނަ ހަފްތާގެ ތެރޭގައި އާއްމުކުރާނެކަމަށް ވަނީ ބުނެފަ އެވެ.
