ކާބުލް، އަފްގާނިސްތާން (ޖޫން 29) - އަފްގާނިސްތާނުގެ އިތުރު ސަރަހައްދުތައް ހިފުމަށް ހަނގުރާމަ ކުރުން ހުއްޓާ ނުލާ ނަމަ ވައިގެ ހަމަލާ ދޭނެ ކަމުގެ އިންޒާރު އެމެރިކާއިން ތާލިބާނުންނަށް ދީފި އެވެ.
ސެޕްޓެމްބަރު 11 ގެ ކުރިން އެމެރިކާ އާއި ނޭޓޯ ސިފައިން އަފްގާނިސްތާނުން ފައިބާނެކަން އިއުލާނު ކުރުމާއެކު ތާލިބާނުން ވަނީ އަފްގާން ސިފައިންނާ ދެކޮޅަށް ކުރާ ހަނގުރާމަ ވަރުގަދަކޮށްފަ އެވެ.
އެގޮތުން މިދިޔަ މޭ މަހުން ފެށިގެން ތާލިބާނުން ވަނީ އަފްގާނިސްތާނުގެ 400 ޑިސްޓްރިކްޓުގެ ތެރެއިން 100 އަށް ވުރެ ގިނަ ޑިސްޓްރިކްޓުގެ ކޮންޓްރޯލް ހޯދާފަ އެވެ.
"އަޅުގަނޑުމެން ބޭނުމެއް ނޫން ވައިގެ ހަމަލާއެއް ފެންނާކަށް. އެކަމަކު އެކަން އެހެން ވާން، ހުރިހާ ހަމަނުޖެހުމެއް ހުއްޓާލަން ޖެހޭ،" ޖެނެރަލް ސްކޮޓް މިލާ ވިދާޅުވި އެވެ.
"އަޅުގަނޑު ތާލިބާނުންނަށް ވެސް މި ވާހަކަ ދަންނަވައިފިން. ވައިގެ ހަމަލާތައް ނާންނާނެކަން ޔަގީން ކުރެވޭނީ ހަމަނުޖެހުން ހުއްޓާލައިގެން ކަމަށް،" އޭނާ ވިދާޅުވި އެވެ.
އެމެރިކާއިން މިހާތަނަށް ކުރި އެންމެ ދިގު ހަނގުރާމައަށް ފަހު ގިނަ ސިފައިން މިހާރު ވަނީ އަނބުރާ ގައުމަށް ގޮސްފަ އެވެ. ބާކީ ތިބި ސިފައިން ވެސް ސެޕްޓެމްބަރު 11 ގެ ކުރިން ގައުމަށް ދާނެ އެވެ.
ތަޖުރިބާކާރުން ބުނާ ގޮތުގައި ގިނަ ޑިސްޓްރިކްޓުތަކެއް ތާލިބާނުންގެ ބާރުގެ ދަށަށް ދަނީ އަފްގާނިސްތާނުގެ ސިފައިންނަށް އެއްބާރުލުން ދިނުމަށް އެމެރިކާއިން ވައިގެ މަގުން އެހީތެރިކަން ފޯރުނުކޮށްދޭތީ އެވެ.
މިލާ ވިދާޅުވީ އެއްވެސް ސަރަހައްދެއް ސަރުކާރަށް ގެއްލުމަކީ ގައުމުގެ ސަލާމަތަށް ޖުމްލަ ގޮތެއްގައި ވަރަށް ބޮޑަށް އަސަރު ކުރާނެ ކަމެއް ކަމަށެވެ.
ތާލިބާނުން ދާދި ފަހުން ވަނީ އަފްގާނިސްތާނާއި ތަޖިކިސްތާން ގުޅޭ ސަރަހައްދުގެ މުހިއްމު ބޯޑަރު ކްރޮސިންއެއްގެ ކޮންޓްރޯލް ހޯދަފަ އެވެ.
އޭގެ އިތުރުން އަފްގާނިސްތާނުގެ ހުރިހާ ބޮޑެތި ސިޓީއެއްގެ ބޭރުގައި ތާލިބާނުން ތިބީ ކޮންމެ ވަގުތަކު ވެސް ހަމަލާ ދިނުމަށް ތައްޔާރަށެވެ. އެހެންވެ، އެމެރިކާ އާއި ނޭޓޯގެ ސިފައިން އެއްކޮށް ދިޔުމާއެކު ކާބުލް ހިފާފާނެ ކަމުގެ ބިރު އެބަ އޮތެވެ.
