ކޮވިޑްގެ ބަލި މީހުންނަށް ފަރުވާ ދޭ ހުޅުމާލޭ މެޑިކަލް ފެސިލިޓީގައި އެޑްމިޓް ކޮށްފައި އޮތް އުމުރުން ދުވަސްވީ މީހަކަށް އަނިޔާ ކުރި، މައްސަލާގައި އެމީހާގެ އެހީތެރިޔާގެ މައްޗަށް ދައުވާކޮށްފި އެވެ.
ދައުވާކޮށްފައިވަނީ ބަންގްލަދޭޝްގެ ރައްޔިތެއް ކަމަށްވާ ޝަރިފް ހާންގެ މައްޗަށެވެ. އޭނާގެ މައްޗަށް އުފުލާފައިވަނީ ގާނޫނުލްއުގޫބާތުގެ ދަށުން އަނިޔާއެއް ދިނުމުގެ ދައުވާ އެވެ.
އެ ދައުވާގެ ޝަރީއަތް ހުޅުމާލެ މެޖިސްޓްރޭޓް ކޯޓުގައި މިއަދު ވަނީ ފަށާފަ އެވެ. އެ އަޑުއެހުމުގައި ދައުލަތުން ވަނީ ޝަރިފް ޝަރީއަތް ނިމެންދެން ބަންދުކުރުމަށް އެދިފަ އެވެ. އެ ހުށަހެޅުމާ އެއްގޮތަށް ހުޅުމާލެ ކޯޓުން ވަނީ އޭނާ ޝަރީއަތް ނިމެންދެން ބަންދުކުރަން އަމުރުކޮށްފަ އެވެ.
މި މައްސަލަ ފެންމަތިވީ ކޮވިޑް ފެސިލިޓީގައި އެޑްމިޓް ކޮށްފައިވާ ބަލި މީހަކާ ދިމާލަށް ވަރަށް ނުރުހުންވެ ހުރެ އޭނާގެ އެހީތެރިޔާ ވާހަކަ ދައްކާ ތަން ފެންނަ ވީޑިއޯއެއް އާންމުވުމާއެކު އެވެ.
އެ ވީޑިއޯގައި ދުވަސްވީ ބަލިމީހާގެ ގައިގާ ޖަހައި، ޝަރިފް އަޑުހަރުކޮށް އޭނާއާ ދިމާލަށް ވާހަކަ ދައްކާ މަންޒަރު ފެނެ އެވެ.
ހުޅުމާލޭ މެޑިކަލް ފެސިލިޓީގެ އެ ވީޑިއޯ އާންމުވި ދުވަހު، ފުލުހުން މައްސަލަ ތަހުގީގު ކުރަން ފަށައި، ޝަރިފް ހާން ހައްޔަރުކުރި އެވެ. އޭގެފަހުން އެކި ފަހަރު މަތިން އޭނާގެ ބަންދު ކޯޓުން ދިޔައީ އިތުރުކުރަމުންނެވެ.
