ވޮޝިންޓަން، އެމެރިކާ (ޖޫން 29) - އެމެރިކާގެ ފެޑެރަލް އަދި ސްޓޭޓް ރެގިއުލޭޓަރުން ގުޅިގެން ފޭސްބުކްއާ ދެކޮޅަށް ކޯޓަށް ހުށަހެޅި މައްސަލަ ނުބެލޭނެ ކަމަށް ކޯޓުން ނިންމުމާއެކު ފުރަތަމަ ފަހަރަށް ފޭސްބުކްގެ އަގު އެއް ޓްރިލިއަން ޑޮލަރަށް އަރައިފި އެވެ.
ފެޑެރަލް ޓްރޭޑް ކޮމިޝަނާއި އިތުރު 40 ސްޓޭޓަކުން މިދިޔަ ޑިސެމްބަރު މަހު ހުށަހެޅި އެންޓި ޓްރަސްޓް މައްސަލަ ނުބެލޭނެ ކަމަށް ވޮޝިންޓަނުގެ ކޯޓުން ނިންމީ ސޯޝަލް ނެޓްވޯކިން ހިދުމަތްތަކުގައި މޮނޮޕޮލީ ބާރު ފޭސްބުކަށް ލިބިފައިވާ ކަމަށް ބެލެވޭ ތަފްސީލް ނެތުމުންނެވެ.
މައްސަލަ ހުށަހެޅީ ފޭސްބުކްގެ ދަށަށް ވަޓްސްއެޕާއި އިންސްޓަގްރާމް ގެންދިޔުމުން އެކަމާ ދެކޮޅަށެވެ. މިހާރު ހުރި މައުލޫމާތާއެކު މައްސަލަ ނުބެލޭނެ ކަމަށް ކަނޑައެޅި އިރު، އަލުން މައްސަލަ ބަލައި ދިނުމަށް އެދި ހުށަހެޅުމުގެ ފުރުސަތު އޮންނާނެ އެވެ.
ކޯޓުން ބުނީ ސޯޝަލް ނެޓްވޯކިން ހިދުމަތްތަކުގެ 60 ޕަސެންޓު ކޮންޓްރޯލް ކުރަނީ ފޭސްބުކުން ކަމަށް ފެޑެރަލް ޓްރޭޑް ކޮމިޝަނުން ހުށަހެޅި ލިޔުންތަކުގައި ހުރި ނަމަވެސް އެކަމުގެ ތަފްސީލެއް ނެތް ކަމަށެވެ. އަދި މައްސަލަ ކޯޓަށް އައީ މާ ލަހުން ކަމަށް ވެސް ބުންޏެވެ.
ފޭސްބުކްގެ ދަށަށް އިންސްޓަގްރާމް ގެންދިޔައީ 2012 ގަ އެވެ. އަދި ވަޓްސްއެޕް ފޭސްބުކް ކުންފުނިން ގަތީ 2014 ގަ އެވެ.
ކޯޓުން އެގޮތަށް ނިންމުމާއެކު ފުރަތަމަ ފަހަރަށް ފޭސްބުކްގެ މާކެޓް ވެލިއު އެއް ޓްރިލިއަން ޑޮލަރަށް އެރި އެވެ. ފޭސްބުކުން ނެރުނު ބަޔާނެއްގައި ކޯޓުގެ ނިންމުމަށް މަރުހަބާ ކިޔުމަށް ފަހު ބުނީ މާކެޓުގައި ފޭސްބުކްއިން ކުރި ހޯދަނީ ހަމަހަމަކަމާއެކު އެހެން ކުންފުނިތަކާ ވާދަކޮށްގެން ކަމަށެވެ.
