އަންހެނުން ހިތާނަ ކުރުމާ ގުޅުވައިގެން, ގައުމީ ޔުނިވާސިޓީ (އެމްއެންޔޫ)ގެ އެސިސްޓެންޓް ޕްރޮފެސަރު ޑރ. މުހައްމަދު އިޔާޒް އަބްދުލް ލަތީފް ދައްކާ ވާހަކަތަކާ ގުޅިގެން އޭނާގެ މައްސަލަ ބަލަން، އެ ޔުނިވާސިޓީން ނިންމައިފި އެވެ.
ސޯޝަލް މީޑިއާގައި ޖެހި ޕޯސްޓްތަކަކާ ގުޅިގެން މިދިޔަ މާޗް މަހު އެމްއެންޔޫއިން އިޔާޒް 14 ދުވަހަށް ސަސްޕެންޑް ކުރި އެވެ. އެއަށް ފަހު އެފަދަ ކަމެއް ތަކުރާރުކޮށްފިނަމަ ވަޒީފާއިން ވަކި ކުރާނެ ކަމުގެ ފަހުގެ އިންޒާރު އިޔާޒަށްދީ، ސަސްޕެންޝަން އުވާލި އެވެ.
އެ އިންޒާރު އެގޮތަށް އޮއްވައި އަންހެން ކުދިން ހިތާނަކުރުމާ ގުޅޭ ގޮތުން އިޔާޒު ދެއްކި ވާހަކަތަކެއް ވަނީ ހޫނުވެފަ އެވެ. އަދި، އޭނާގެ މައްސަލަ ބެލުމަށާއި އެމްއެންޔޫއިން ވަކިކުރުމަށް ގިނަ ބަޔަކު ގޮވާލަމުން ދިޔަ އެވެ.
އިޔާޒުގެ މައްސަލަ ބަލައި، ވަކިކުރުމަށް ހެރިޓޭޖު މިނިސްޓަރު ޔުމްނާ މައުމޫން ވެސް ވަނީ ގޮވާލައްވާފަ އެވެ.
އެ އަޑު ގަދަވެފައިވަނިކޮށް އެމްއެންޔޫގެ ވައިސް ޗާންސެލާ ޑރ. މުހައްމަދު ޝަރީފް "އަދަދު"އަށް މިރޭ ވިދާޅުވި ގޮތުގައި، އަންހެނުން ހިތާނަ ކުރުމާ ގުޅޭ ގޮތުން އިޔާޒް ވާހަކަ ދައްކަން ފެށުމާއެކު ގިނަ އަދަދެއްގެ ބަޔަކު އެ ޔުނިވާސިޓީއަށް ޝަކުވާ ހުށަހެޅި އެވެ.
އެހެންވެ، އިޔާޒްގެ މައްސަލަ އެ ޔުނިވާސިޓީގެ މައްސަލަ ބަލާ ކޮމެޓީން ބަލަން ފަށާފައިވާ ކަމަށް އޭނާ ވިދާޅުވި އެވެ.
"ކުރިން އޮތީ އެންމެ ފަހުގެ އިންޒާރު ދީފައި، މިކަން ސާބިތު ވަންޏާމު ދެން އޮންނާނީ ވަކި ކުރުން،" ޝަރީފް ވިދާޅުވި އެވެ.
އިޔާޒް އަބްދުއްލަތީފް އަންހެން ކުދިން ހިތާނުކުރުމަށް ހިތްވަރުދިން ކަމަށް ބުނެ، އެ މައްސަލަ ރައްޔިތުންގެ މަޖިލީހުގެ ކަމާގުޅޭ ކޮމިޓީން ބަލައި ދިނުމަށް، މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ވަނީ ހުށަހަޅައިފަ އެވެ.
އަންހެނުން ހިތާނަ ކުރުމަށް ހިތްވަރު ލިބޭގޮތަށް އިޔާޒް ގެންދަނީ ތަކުރާރުކޮށް ޓްވީޓް ކުރަމުންނެވެ. އެއާއެކު ގިނަ ބައެއްގެ ފާޑު ކިޔުން އޭނާއަށް ވަނީ އަމާޒުވެފަ އެވެ. އަދި އެކަމުގެ ތަޖުރިބާ ކޮށްފައިވާ އަންހެނުން ވަނީ އެކަމުން ލިބޭ ގެއްލުންތައް ހިއްސާކޮށް، އިޔާޒާމެދު ނުރުހުން ފާޅުކޮށްފަ އެވެ.
އަންހެނުން ހިތާނަ ކުރުމަކީ ދީނުގައި އޮތްކަމެއް ނޫން ކަމަށް ކުރީގެ ރައީސް، އަދި ދީނީ އިލްމުވެރިޔާ މައުމޫން އަބްދުލް ގައްޔޫމް ވެސް ވަނީ ވިދާޅުވެފަ އެވެ.
އެޗްއާރްސީއެމްއިން ދާދިފަހުން ބުނެފައިވާ ގޮތުގައި ރާއްޖޭގައި އަންހެން ކުދިން ހިތާނަކުރުމުގެ މައްސަލަތައް އިތުރުވަމުންދާކަން ވަނީ ފާހަގަކުރެވިފަ އެވެ. އެހެންވެ، އެކަން އެ ކޮމިޝަނުން ބަލަމުންދާ ކަމަށް ވެސް ބުނެފައިވެ އެވެ.
އިޔާޒު ފާހަގަވެގެން ގޮސްފައިވަނީ ދީނީ ކަންކަމުގައި ހިޔާލު ވަރަށް ތަފާތު ބޭފުޅެއްގެ ގޮތުގަ އެވެ.
އެގޮތުން، ކޮވިޑާ ގުޅިގެން މިސްކިތްތަކުގައި ގައިދުރުކޮށްގެން ނަމާދު ކުރުމާއި، އާއްމު ތަނެއްގައި މުސްލިމަކު ކާފަރެއްގެ ގޮތުގައި ސިފަ ކުރުން ޖިނާއީ ކުށަކަން ހަދަން ސަރުކާރުން މިހާރު ހުށަހަޅައިގެން އުޅޭ އިސްލާހާ ދެކޮޅަށް ފާޅުގައި އެންމެ ބޮޑަށް ފާޑުކިޔަމުން ގެންދާ އެކަކީ އިޔާޒެވެ.
