މި އަހަރު ދެ ބައިވި އިރު، ރާއްޖެއަށް ޒިޔާރާތް ކުރި ފަތުރުވެރިންގެ އަދަދު ބައި މިލިއަނާ ގާތްކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފި އެވެ.
ކޮވިޑުގެ ސަބަބުން މިދިޔަ އަހަރުގެ ބޮޑު ބައެއް ބޯޑަރު ބަންދުކުރަންޖެހުމުގެ ސަބަބުން ޓޫރިޒަމް ވަރަށް ބޮޑަށް ދަށަށް ދިޔަ އެވެ.
އެގޮތުން، މިދިޔަ އަހަރު ރާއްޖެއަށް ޒިޔާރަތްކޮށްފައިވަނީ 555،494 ޓޫރިސްޓުންނެވެ. އެއީ އޭގެ ކުރީ އަހަރު އައި 1،702،887 އާއި ބަލާއިރު ވަރަށް ބޮޑު ވެއްޓުމެކެވެ.
ނަމަވެސް، ދުނިޔޭގެ ގިނަ ގައުމުތަކުގައި ކޮވިޑު ވެކްސިން ދޭން ފެށުމާއެކު މި އަހަރު ފެށިގެން އައިއިރު ޓޫރިޒަމް އަނެއްކާވެސް ރަނގަޅުވާން ފެށި އެވެ.
ތަފާސްހިސާބުތައް ބަލާއިރު، މިދިޔަ ޖެނުއަރީ މަހުން ފެށިގެން އޭޕްރީލް މަހާ ހަމައަށް ރާއްޖޭގައި ޗުއްޓީ ހޭދަކުރި ފަތުރުވެރިންގެ އަދަދު އުޅެނީ މަހަކު އެވަރެޖުކޮށް 90،000 އަށް ވުރެ މަތީގަ އެވެ.
ނަމަވެސް، މިދިޔަ މަހު ރާއްޖޭގެ އިތުރުން ދުނިޔޭގެ އެކި ހިސާބުތަކުގައި ކޮވިޑުގެ ހާލަތު އަނެއްކާވެސް ގޯސްވެ، އެޅި ފިޔަވަޅުތަކުގެ ސަބަބުން އެކަމުގެ ނޭދެވޭ އަސަރު ޓޫރިޒަމަށް ވެސް ކުރި އެވެ.
އެގޮތުން، މިދިޔަ މެއި މަހު ރާއްޖެއަށް ޒިޔާރަތްކޮށްފައިވަނީ 64،613 ފަތުރުވެރިންނެވެ.
އޭގެ ކުރީ ހަތަރު މަހު އެވަރެޖުކޮށް ދުވާލެއްގެ މައްޗަށް 3،000 އަށް ވުރެ ގިނަ ޓޫރިސްޓުން އައިއިރު، އެ އަދަދު މިދިޔަ މަހު ވަނީ 2،000 އަށް ވެއްޓިފަ އެވެ.
އެކަމުގެ އަސަރު މި މަހު ވެސް ކޮށްފައިވާއިރު، ޖޫން 23 އާ ހަމައަށް މި މަހު ރާއްޖެއަށް އައިސްފައިވަނީ 42،250 ޓޫރިސްޓުންނެވެ.
އެއާއެކު، އެ ދުވަހާ ހަމައަށް މި އަހަރު ރާއްޖޭގައި ޓޫރިސްޓުންގެ ޖުމްލަ އަދަދަކީ 496،633 ކަމަށް ޓޫރިޒަމް މިނިސްޓްރީން ބުންޏެވެ.
އެންމެ ގިނައިން ރަޝިއާ ޓޫރިސްޓުން
މިދިޔަ މަހާ ހަމައަށް ރާއްޖެއަށް އެންމެ ގިނައިން ޓޫރިސްޓުން އަންނަމުން ދިޔައީ އަވަށްޓެރި އިންޑިއާ އިންނެވެ. ނަމަވެސް، މެއި މަހުގެ ތެރޭގައި އިންޑިއާގައި އިންތިހާއަށް ކޮވިޑު ފެތުރި، އެ ގައުމުން މީހުން އައުން ހުއްޓުވައިލުމުން، އެ އަދަދު ވަނީ ދަށްވެފަ އެވެ.
ތަފާސްހިސާބުތައް ދައްކާ ގޮތުން، މިއަހަރުގެ މިހާތަނަށް އެންމެ ގިނައިން ފަތުރުވެރިން އައިސްފައިވަނީ ރަޝިއާ އިންނެވެ.
އެގޮތުން، ރަޝިއާ އިން 120،000 އަށް ވުރެ ގިނަ ޓޫރިސްޓުން އައިސްފައިވާއިރު، ދެ ވަނައިގައި އޮތް އިންޑިއާ އިން މިހާތަނަށް އައިސްފައިވަނީ ގާތްގަނޑަކަށް 90،000 ފަތުރުވެރިންނެވެ.
ޓޫރިޒަމް މިނިސްޓްރީން ބުނީ މެއި މަހުގެ ތެރޭގައި ޓޫރިޒަމް މަޑުޖެހިފައި އޮތުމަށްފަހު، އަނެއްކާވެސް މަޑުމަޑުން ރަނގަޅުވާން ފަށާފައިވާ ކަމަށެވެ.
ފިޔަވަޅުތައް ހަރުކަށި ކުރުމުގެ ސަބަބުން ޓޫރިޒަމް އަޑިއަޅާފައިވީ ނަމަވެސް، މިއަހަރު އަންނާނެކަމަށް އަންދާޒާކުރި އެއް މިލިއަނަށް ވުރެ ގިނަ ފަތުރުވެރިން އަހަރުގެ ނިޔަލަށް ރާއްޖެއަށް ޒިޔާރަތް ކުރާނެ ކަމަށް ފިނޭންސް މިނިސްޓަރު އިބްރާހިމް އަމީރު ވަނީ ލަފާކުރައްވައިފަ އެވެ.
އަދި ކޮވިޑުގެ ކުރިން ރާއްޖޭގެ ޓޫރިޒަމް އޮތް މިންވަރަށް ރުޖޫއަވާން ފަށާނެ ކަމަށް މިހާރު ލަފާކުރަނީ އަންނަ އަހަރުގެ ކުރީކޮޅުގައި ކަމަށް އަމީރު ވިދާޅުވެފައިވެ އެވެ.
މިނިސްޓަރު ވިދާޅުވީ މިއަހަރުގެ ބަޖެޓް ތައްޔާރުކުރި އިރު ފަތުރުވެރިން ޒިޔާރަތްކުރާނެ ކަމަށް އޭރު ލަފާކުރެވުނު އަދަދަށް ބިނާކޮށް ޖީޑީޕީ އިތުރުވާނެކަމަށް ބެލެވުނީ 13.5 ޕަސަންޓުން ކަމަށެވެ.
ނަމަވެސް، ޓޫރިޒަމަށް މިއަހަރު ލިބެމުންދާ ކުރިއެރުމުގެ ސަބަބުން އިގްތިސާދީ ދުވެލި 13.5 ޕަސަންޓާއި 34.1 ޕަސަންޓާ ދެމެދުގައި ކުރިއަރާނެ ކަމަށް ލަފާކުރެވޭ ކަމަށެވެ.
